Ditarɔnɔmi 17 - Krio Fɔs Oli Baybul

¹ Mozis tɛl di Izrɛlayt dɛn se dɛn nɔ fɔ sakrifays animal we gɛt bɔt, ɔ ɛni ɔda siknɛs, to PAPA GƆD we na dɛn PAPA GƆD, bikɔs na bad bad tin fɔ PAPA GƆD we na dɛn PAPA GƆD.

² I tɛl dɛn se if dɛn si ɛni uman ɔ man de na ɛni pan dɛn siti dɛn we PAPA GƆD we na dɛn PAPA GƆD go dɔn gi dɛn, de du dɛn bad bad tin dɛn we PAPA GƆD we na dɛn PAPA GƆD dɔn se dɛn nɔ fɔ du, we min se i dɔn brok di Kɔvinant,

³ ɛn i dɔn go butu de wɔship ɛn wok fɔ ɔda gɔd dɛn, ɔ de wɔship di san ɔ di mun ɔ di sta dɛn na di skay, we PAPA GƆD bin dɔn se dɛn nɔ fɔ du,

⁴ ɛn if dɛn yɛri bɔt dɛn kayn tin dɛn de, dɛn fɔ fɛnɔt gud fɔ no if na tru se bad bad tin lɛkɛ dat dɔn apin na Izrɛl,

⁵ dɛn fɔ kɛr di man ɔ di uman we dɔn du da bad bad tin de go na do pas di get fɔ kam insay di siti, ɛn ston am te i day.

⁶ Mozis se bifo dɛn ston pɔsin se i gilti ɔf sɔntin, tu ɔ tri witnɛs dɛn fɔ de fɔ pruv am. I se dɛn nɔ fɔ kil pɔsin we na waŋren witnɛs nɔmɔ de.

⁷ Na di witnɛs dɛn fɔs fɔ bigin ston ɛni pɔsin we dɛn se gilti. Na so dɛn go ebul pul bad tin dɛn kɔmɔt na Izrɛl.

⁸ Mozis tɛl di Izrɛlayt dɛn se sɔm kes dɛn go de we nɔ go izi fɔ dɛn fɔ jɔj; kes dɛn lɛkɛ prɔpati kes, we dɛn wund pɔsin ɛn kes we dɛn go gɛt fɔ disayd if na we di pɔsin du in kɔmpin sɔntin mek i day, ɔ na ɔda tin mek i day. I se dɛn fɔ kɛr dɛn kayn kes dɛn de go na di ples we PAPA GƆD we na dɛn PAPA GƆD go pik fɔ de mek sakrifays to am ɛn wɔship am,

⁹ ɛn go tɛl di man dɛn we de mek sakrifays fɔ pipul sin ɛn di jɔj dɛn we go de de, ɛn dɛn go tɛl dɛn aw fɔ jɔj di kes.

¹⁰ Na wetin dɛn se na da ples de we PAPA GƆD go pik fɔ mek sakrifays to am ɛn wɔship am, nain dɛn fɔ tek, ɛn na wetin dɛn se dɛn fɔ du.

¹¹ Na wetin dɛn disayd, dɛn fɔ du. Dɛm nɔ fɔ chenj natin.

¹² Mozis se ɛnibɔdi we nɔ go du wetin di man dɛn we de mek sakrifays fɔ pipul sin ɔ di jɔj dɛn se, dɛn fɔ kil da pɔsin de. I se na so dɛn go tek de pul di bad tin dɛn kɔmɔt na di Izrɛl neshɔn.

¹³ I se we ɔlman go yɛri se dɛn ston pɔsin te i day fɔ dɛn tin dɛn de, dɛn go fred fɔ du dɛn kayn tin dɛn de.

¹⁴ Mozis tɛl di Izrɛlayt dɛn se, in no se we dɛn go dɔn sɛtul na di land we PAPA GƆD we na dɛn PAPA GƆD go dɔn gi dɛn, dɛnsɛf go want dɛn yon kiŋ lɛkɛ di ɔda neshɔn dɛn we de nia dɛn.

¹⁵ I se dɛn go gɛt kiŋ, bɔt na di kiŋ we PAPA GƆD we na dɛn PAPA GƆD go pik, ɛn i go bi wan pan dɛn, bikɔs fɔrina nɔ fɔ bi kiŋ na Izrɛl.

¹⁶ Bɔt i nɔ fɔ bi kiŋ we bigyay fɔ gɛt plɛnti plɛnti ɔs fɔ insɛf, ɔ kiŋ we de sɛl di pipul dɛn as slev ɔ as masinari dɛn to Ijipt fɔ seka ɔs; ɛn dat nɔ sɔpoz fɔ bi, bikɔs PAPA GƆD dɔn se, nɔbɔdi nɔ fɔ go bak na Ijipt.

¹⁷ Di kiŋ nɔ fɔ gɛt plɛnti wɛf, bikɔs dat go mek in at kɔmɔt pan PAPA GƆD. Igen, i se di kiŋ nɔ fɔ bi kiŋ we lɛk fɔ gɛda gɛda jɛntri.

¹⁸ Di pɔsin we go bi kiŋ, dɛn fɔ gi am wan kɔpi ɔf di lɔ ɔl di lɔ; dɛn go kɔpi di wan we di pipul dɛn we de mek sakrifays fɔ pipul sin, gɛt,

¹⁹ ɛn i fɔ de wit am ɔltɛm, so i go de rid am ɛvri de, so dat i go no wetin PAPA GƆD we na dɛn PAPA GƆD lɛk frɔm wetin i nɔ lɛk, so dat i go du ɔl wetin i want ɛn go gi PAPA GƆD we nain GƆD in ful rɛspɛkt.

²⁰ Dat go ɛp mek i nɔ fil se i bɛtɛ pas in kɔmpin dɛn, we go mek i pul at pan PAPA GƆD in lɔ dɛn ɛn du bad tin dɛn. If i de stɔdi PAPA GƆD in lɔ dɛn, dat nɔ go bi, ɛn i go bi kiŋ fɔ lɔŋ; in granpikin dɛn we nɔ bɔn yet, sɛf go rul Izrɛl.