Ditarɔnɔmi 15 - Krio Fɔs Oli Baybul

Di Ia We Mek Sɛvin

¹ Mozis tɛl di Izrɛlayt dɛn se, ɛvri sɛvin ia, fɔ bi ia we nɔ fɔ kɔldɛt igen

² Dat min se, nɔbɔdi nɔ fɔ aks in kɔmpin we bin lɛnt mɔni nain an fɔ pe am; i nɔ fɔ mek in kɔmpin we na Izrɛlayt we nain brɔda, pe am wetin i o am, bikɔs na so PAPA GƆD dɔn se fɔ bi.

³ Bɔt if na fɔrina, i fɔ mek i pe wetin i o; Bɔt wans na Izrɛlayt yon, nain brɔda yon.

⁴ Nɔn pan dɛn nɔ go de we nɔ go gɛt bɛtɛ tin, bikɔs PAPA GƆD we na dɛn PAPA GƆD go blɛs dɛn ɔl na di land we i gi dɛn fɔ prɔpati;

⁵ wans dɛn du ɔl wetin PAPA GƆD we na dɛn Gɔn dɔn tɛl dɛn fɔ du; dat na fɔ du ɔl wetin di Lɔ se we nain, i de tɛl dɛn bɔt so.

⁶ PAPA GƆD go blɛs dɛn as i bin dɔn se, ɛn dɛn go de lɛnt mɔni gi di ɔda neshɔn dɛn, ɛn dɛn nɔ go go lɛnt mɔni to di ɔda neshɔn dɛn, ɛn na dɛn go de kɔntrol ɔl dɛn neshɔn dɛn de.

⁷ I se if ɛni wan pan dɛn we na Izrɛlayt we tap na di land we PAPA GƆD we na dɛn PAPA GƆD gi dɛn, nɔ gɛt bɛtɛ tin, nɔ fɔ mek traŋa at pan am;

⁸ bɔt dɛn fɔ ɛp am, gi am ɔl wetin i want, i lɛk wetin dat bi.

⁹ Dɛm fɔ tek tɛm mek dɛn nɔ bigin tink bad tin lɛkɛ se di ia we mek sɛvin we na ia we nɔ fɔ pe dɛt, de kam jisnɔ ɛn if i kam, dɛn brɔda nɔ go gɛt fɔ pe igen; dat go mek dɛn nɔ gi dɛn brɔda natin ɛn i go go kray to PAPA GƆD ɛn PAPA GƆD go se dɛn dɔn sin.

¹⁰ Na fɔ gi am wetin i want wit ɔl dɛn at; nɔto fɔ mek traŋa at ɛn ipokrit we dɛn de gi am ɛnitin bikɔs na fɔ dɛn kayn tin dɛn de go mek PAPA GƆD go blɛs ɛnitin we dɛn put dɛn an pan.

¹¹ Mozis se, bikɔs po pipul dɛn mɔs de na di land ɔltɛm, so, na dat mek PAPA GƆD se dɛn nɔ fɔ mek traŋa at ɛn gridi dɛn brɔda; pipul we want ɛp ɛn di wan dɛn we po.

Aw Fɔ Trit Slev

¹² Mozis tɛl di Izrɛlayt dɛn se if ɛni pan dɛn Ibru brɔda ɔ sista pɔŋ insɛf to dɛn fɔ wok fɔ dɛn fɔ natin, i fɔ wok fɔ siks ia nɔmɔ; afta dat, dɛn fɔ fri am we di ia we mek sɛvin bigin,

¹³ ɛn dɛn fɔ mek shɔ se dɛn gi am smɔl tin we i go go tek stat layf fɔ insɛf.

¹⁴ Dɛm fɔ gi am pan dɛn ship dɛn, di tin dɛn we dɛn avɛst na dɛn fam ɛn pan dɛn wayn sɛf. Dɛn fɔ mek shɔ se wetin dɛn gi am, ful yay; di we we PAPA GƆD we na dɛn PAPA GƆD blɛs dɛn, na so dɛnsɛf fɔ frian to am.

¹⁵ Mozis tɛl dɛn se dɛnsɛf fɔ mɛmba wetin dɛn bin pas we dɛn na bin slev dɛn na Ijipt, bifo PAPA GƆD we na dɛn PAPA GƆD go pul dɛn de. I se na ɔl dat mek in tɛl dɛn se, dɛn fɔ fri dɛn slev dɛn afta siks ia ɛn gi dɛn sɔntin fɔ dɛnsɛf.

¹⁶ Mozis se sɔm pan dɛn slev dɛn we go dɔn yus ɛn lɛk dɛn masta bikɔs dɛn bin ol dɛn fayn, nɔ go wan go igen

¹⁷ I se if dat bi di kes, mek i liŋ in ed nain masta in frɔnt do, dɔn in masta go tek shap tin ɛn bɔs in yes fɔ sho se i go de ɔnda am sote i day; dɛn fɔ du di sem tin fɔ uman ɛn man.

¹⁸ I se dɛn nɔ fɔ fil am we dɛn de lɛf slev fɔ go. Aftawɔds, na af wetin dɛn bin fɔ de pe wokman nain dɛn go gɛt fɔ spɛnd pan di slev, ɛn di slev go du di wok we tu wokman bin fɔ du. Mozis tɛl dɛn se if dɛn du wetin i tɛl dɛn so, PAPA GƆD we na dɛn PAPA GƆD sɛf go blɛs ɔl wetin dɛn put an pan.

Di Fɔs Man Pikin We Di Animal Dɛm Go Bɔn

¹⁹ Mozis se ɔl di fɔs man pikin dɛn we dɛn kaw ɛn ship dɛn go bɔn, dɛn fɔ gi to PAPA GƆD we na dɛn PAPA GƆD; dɛn nɔ fɔ put di kaw dɛn fɔ wok na fam ɛn dɛn nɔ fɔ pul di ship dɛn ia fɔ mek wul.

²⁰ I se na dɛn animal dɛn de dɛn ɛn dɛn pikin dɛn go it ɛvri ia we dɛn go go usay PAPA GƆD go pik fɔ lɛ dɛn go de mek sakrifays to am.

²¹ I tɛl dɛn se dɛn nɔ fɔ sakrifays animal we gɛt bɔt, to PAPA GƆD we na dɛn PAPA GƆD; dat na animal we nɔ de waka ɔ we blɛn.

²² Dɛm wan dɛn de, pɔsin we klin bifo PAPA GƆD ɛn di wan we nɔ klin, kin it dɛn na dɛn siti, jɛs lɛk aw dɛn go it Fritambo ɔ Dia.

²³ Wan tin we Mozis wɔn dɛn bɔt na fɔ lɛ dɛn nɔ it di animal dɛn blɔd; i se dɛn fɔ trowe am na grɔn lɛk wata.