Ditarɔnɔmi 13 - Krio Fɔs Oli Baybul

¹ Mozis tɛl di Izrɛlayt dɛn se if ɛni pan dɛn brɔda ɔ sista kɔmɔt se in na prɔfɛt, ɔ i de drim pipul, ɛn intaprit drim, ɛn ivin du tin dɛn we ɔdinari pipul dɛn nɔ ba du ɔ gi yu ɛni sayn,

² dɔn di tin dɛn we i se go bi, bi, dɔn i kam tɛl dɛn fɔ go wɔship ɔda gɔd dɛn,

³ dɛn nɔ fɔ gri; sɔntɛnde, na PAPA GƆD we na dɛn PAPA GƆD go de tɛst dɛn, dɛn nɔ no. I go wan no if dɛn lɛk am wit ɔl dɛn at ɛn sol.

⁴ I se na PAPA GƆD nɔmɔ dɛn fɔ put dɛn at to; dɛn fɔ rɛspɛkt am ɛn du ɔl wetin I se, ɛn nain nɔmɔ dɛn fɔ lisin to, wɔship ɛn biliv in waŋren.

⁵ So da pɔsin we go se in na prɔfɛt ɔ de intaprit drim, we go tɛl dɛn fɔ wɔship ɔda gɔd, dɛn fɔ kil am, bikɔs i go de tray fɔ lɛ dɛn kɔmɔt biɛn PAPA GƆD ɛn tɔn rebɛl pan am; PAPA GƆD we pul dɛn kɔmɔt pan slev layf na Ijipt usay dɛn bin de sɔfa lɛkɛ dɔg. Da kayn pɔsin de nɔ go fit fɔ de wit dɛn.

⁶ I se if dɛn brɔda, ɔ dɛn wan dadi brɔda, ɔ wan mami brɔda, ɔ dɛn bɔypikin ɔ gyal pikin, ɔ ivin dɛn wɛf we dɛn lɛk bad bad wan, ɔ dɛn bɛst padi, tray fɔ koks dɛn sikrit wan fɔ wɔship ɔda gɔd we dɛn ɛn dɛn fɔstɛmpapa dɛn nɔ bin no,

⁷ i lɛk na dɛn pipul we de fawe ɔ nia dɛn, ɔ ɛnisay na di wanol wɔl dɛn gɔd,

⁸ dɛn nɔ fɔ gri, ɛn dɛn nɔ fɔ sɔri se bikɔs na dɛn pɔsin, dɛn nɔ go le in kɔmplen.

⁹ I se dɛn fɔ kil am. Na di pɔsin we i tɔk bɔt dat to fɔs fɔ ston am, so ɔlman go ston am,

¹⁰ ɛn dɛn fɔ ston am te i day, bikɔs i bin wan pul di pɔsin kɔmɔt biɛn PAPA GƆD we na dɛn PAPA GƆD, we pul dɛn kɔmɔt pan slev layf na Ijipt.

¹¹ We dɛn ston wan pɔsin, ɔlman go fred we dɛn yɛri, so nɔbɔdi na Izrɛl nɔ go gɛt maynd fɔ du da kayn tin de igen

¹² Mozis tɛl di Izrɛlayt dɛn se if dɛn yɛri se, na wan pan di siti dɛn we PAPA GƆD we na dɛn PAPA GƆD gi dɛn fɔ de,

¹³ sɔm fulish man dɛn dɔn mek di pipul dɛn gri fɔ fala dɛn fɔ de wɔship ɔda gɔd dɛn we dɛn nɔ bin no,

¹⁴ dɛn fɔ fɛnɔt gud ɛn if dɛn ebul pruv se fɔ tru tru, bad bad tin lɛkɛ dat de apin insay Izrɛl,

¹⁵ Mozis se dɛn fɔ kil ɔl di pipul dɛn na da siti de; dɛn kaw ɛn dɛn ship dɛnsɛf nɔ fɔ lɛf; dɛn fɔ pwɛl ɔltin kpatakpata.

¹⁶ I se dɛn fɔ put ɔl di pipul dɛn tiŋs dɛn na forod ɛn bɔn dɛn fɔ sakrifays to PAPA GƆD we na dɛn PAPA GƆD. Aw dɛn go si di siti dɔn tan we i go dɔn bɔn dɔn, na so i fɔ lɛf; nɔbɔdi nɔ fɔ bil am bak.

¹⁷ I advays dɛn se dɛn nɔ fɔ tek natin pan di tin dɛn we na fɔ PAPA GƆD. I se dɛn fɔ bɔn dɛn ɔl. Dat go mek PAPA GƆD nɔ go vɛks pan dɛn igen, bɔt i go de sɔri fɔ dɛn ɛn go mek bɛtɛ fala dɛn. I se i go mek dɛn bɔn bɔku pikin dɛn, jɔs lɛk aw i bin dɔn prɔmis dɛn fɔstɛm-papa dɛn,

¹⁸ dat na if dɛn du ɔl wetin PAPA GƆD we na dɛn PAPA GƆD se dɛn fɔ de du, ɛn trit dɛn kɔmpin dɛn fayn fayn wan.