Ditarɔnɔmi 12 - Krio Fɔs Oli Baybul

Di Waŋren Ples Fɔ Wɔship

¹ Mozis tɛl di Izrɛlayt dɛn se in de gi dɛn di lɔ dɛn we dɛn gɛt fɔ go obe na di land we PAPA GƆD we na dɛn fɔstɛm-papa dɛn PAPA GƆD bin dɔn gi dɛn sote go.

² I tɛl di Izrɛlayt dɛn se we dɛn go na di land, dɛn fɔ brok brok ɔl usay di pipul dɛn we bin de de bin de wɔship dɛn gɔd dɛn; i lɛk na ɔp mawnten, dɔŋ vali ɔ ɔnda tik dɛn de,

³ dɛn fɔ brok ɔl dɛn ɔlta dɛn, di pila dɛn ɛn dɛn ston dɛn we dɛn rɛspɛkt, pis pis, bɔn da dɛn Ashɛra in imej ɛn brok brok ɔl di ɔda imej dɛn. Mozis se dɛn fɔ so nyakanyaka dɛn, dat nɔbɔdi nɔ go mɛmba dɛn igen

⁴ Mozis wɔn di Izrɛlayt dɛn nɔ fɔ wɔship PAPA GƆD we na dɛn PAPA GƆD di we, we dɛn pipul de bin de wɔship dɛn gɔd dɛn.

⁵ I se dɛn fɔ fɛn di ples we PAPA GƆD insɛf go pik na wan pan dɛn siti dɛn fɔ de wɔship am, ɛn na da ples de ɔlman fɔ go wɔship am.

⁶ Na de dɛn go de mek ɔl dɛn sakrifays dɛn fɔ bɔn na faya to PAPA GƆD. Ɔda sakrifays dɛn, dɛn tayth di sakrifays we dɛn fɔ gi wit dɛn yon an, di wan we dɛn bin dɔn prɔmis se dɛn go de gi PAPA GƆD, di wan we na dɛnsɛf go fil na dɛn at fɔ gi PAPA GƆD, ɛn di fɔs pikin we dɛn ship ɛn kaw go bɔn.

⁷ Mozis tɛl di Izrɛlayt dɛn se na de dɛn ɛn di wan dɛn we de na os to dɛn fɔ it ɛn tɛl PAPA GƆD we na dɛn PAPA GƆD tɛnki fɔ ɔl wetin i dɔn du fɔ dɛn.

⁸ I tɛl dɛn se dɛn nɔ fɔ de du tin ɛni aw dɛn lɛk. Dɛm bin de du tin aw dɛn lɛk bikɔs

⁹ dɛn nɔ bin go insay di land we PAPA GƆD we na dɛn PAPA GƆD dɔn gi dɛn yet.

¹⁰ I se we dɛn go dɔn krɔs Riva Jɔdan go insay di land we PAPA GƆD we na dɛn PAPA GƆD dɔn gi dɛn, ɛn i dɔn pul ɔl dɛn ɛnimi dɛn rawnd dɛn ɛn dɛn dɔn gɛt kol at,

¹¹ da tɛm de, dɛn fɔ kɛr ɔltin we i bin dɔn tɛl dɛn se dɛn fɔ kɛr go; dɛn animal dɛn fɔ bɔn na faya to PAPA GƆD ɛn di ɔda sakrifays dɛn, dɛn tayth, di wan we dɛn fɔ gi wit dɛn yon an ɛn di wan dɛn we dɛn bin dɔn prɔmis se dɛn go de gi PAPA GƆD.

¹² Mozis tɛl dɛn se na de dɛn fɔ sɛlibret ɛn tɛl PAPA GƆD we na dɛn PAPA GƆD tɛnki; dɛn ɛn dɛn bɔy ɛn gyal pikin dɛn, dɛn wokman ɛn wokuman dɛn ɛn di Livayt dɛn we de na dɛn siti, as dɛn nɔ bin gɛt land fɔ dɛnsɛf.

¹³ Mozis wɔn dɛn nɔ fɔ grap kil animal ɛn mek sakrifays ɛni say dɛn fil.

¹⁴ I se na di ples nɔmɔ we PAPA GƆD go pik na wan pan dɛn siti dɛn dɛn fɔ mek de sakrifays ɛn du ɔl wetin i bin de tɛl dɛn, dɛn fɔ mek sakrifays.

¹⁵ I tɛl dɛn se to aw PAPA GƆD we na dɛn PAPA GƆD dɔn blɛs dɛn, dɛn fri fɔ kil ɛn it dɛn animal dɛn usay dɛn de aw dɛn want, jɔs lɛk aw dɛn go it dia ɛn fritambo. Di wan dɛn we klin ɛn di wan dɛn we nɔ klin na PAPA GƆD yay, ɔl kin it.

¹⁶ Di waŋren tin na dat dɛn nɔ fɔ it di blɔd; dɛn fɔ trowe am na grɔn lɛkɛ aw dɛn go trowe wata na grɔn.

¹⁷ I se dɛn nɔ fɔ it dɛn tin ya insay dɛn siti dɛn; dɛn tayth dɛn pan di tin dɛn we dɛn kɔt na dɛn fam; dat na di wayn di ɔyl, di fɔs pikin dɛn we dɛn kaw ɛn ship bɔn, ɛn di tin dɛn we dɛn go dɔn gi PAPA GƆD wit ɔl dɛn at ɛn di ɔfrin we dɛn fɔ gi wit dɛn yon an.

¹⁸ Mozis se na bifo PAPA GƆD we na dɛn PAPA GƆD na di ples we i go pik se fɔ wɔship am, dɛn ɛn dɛn pikin ɛn wokman dɛn, ɛn di Livayt dɛn we de na dɛn yon eria, fɔ it dɛn yon pan di sakrifays ɛn mek dɛn gladi gladi fɔ tɛl PAPA GƆD tɛnki fɔ ɔltin.

¹⁹ I se lɛ dɛn mek shɔ se dɛn nɔ fɔgɛt fɔ de du gud to di Livayt dɛn, wans dɛn gɛt layf.

²⁰ Mozis se we PAPA GƆD go dɔn gi dɛn mɔ land lɛkɛ we i bin dɔn prɔmis se i go du, dɛn kin it ɔmɔs bif dɛn fil fɔ it.

²¹ I se sɔm pan dɛn we go de fa frɔm usay PAPA GƆD we na dɛn PAPA GƆD go dɔn pik fɔ wɔship am, dɛn kin kil ɛn it dɛn kaw ɛn ship dɛn we PAPA GƆD go gi dɛn, aw dɛn lɛk, na dɛn yon siti dɛn as i bin dɔn tɛl dɛn,

²² jɔs lɛk aw ɛnibɔdi kin ɛn it dia ɔ fritambo. Di wan dɛn we nɔ klin ɛn di wan dɛn we klin na PAPA GƆD in yay ɔl kin it,

²³ pas we dɛn nɔ fɔ it di blɔd bikɔs, blɔd na layf ɛn dɛn nɔ fɔ it bif we gɛt layf.

²⁴ Mozis se dɛn nɔ fɔ it am; dɛn fɔ trowe di blɔd na grɔn lɛkɛ aw dɛn go trowe wata.

²⁵ I wɔn dɛn bak se dɛn nɔ fɔ it di animal dɛn blɔd, ɛn se if dɛn du ɔl wetin PAPA GƆD want dɛn fɔ de du, ɔltin go fayn fɔ dɛn ɛn dɛn jɛnareshɔn dɛn.

²⁶ I tɛl dɛn se lɛ dɛn nɔ fɔgɛt fɔ de go mek dɛn sakrifays dɛn to PAPA GƆD na di ples we i go pik, ɛn dɛn fɔ kɛr di tin dɛn we dɛn bin dɔn prɔmis se dɛn go de go gi PAPA GƆD,

²⁷ ɛn we dɛn de mek dɛn sakrifays dɛn we dɛn fɔ bɔn na faya, dɛn fɔ bɔn di wanol animal na PAPA GƆD in ɔlta. I se dɛn fɔ de mek dɛn sakrifays dɛn we dɛn kin it di flɛsh, bɔt fɔ tɔn ɔl di blɔd na PAPA GƆD we na dɛn PAPA GƆD in ɔlta.

²⁸ Mozis tɛl dɛn se if dɛn du ɔl wetin i tɛl dɛn, na wetin PAPA GƆD we na dɛn PAPA GƆD se gud fɔ du, dɛn go de du. Dat go mek ɔltin fayn fɔ dɛn ɛn dɛn jɛnareshɔn dɛn.

Di Izrɛlayt Dɛn Nɔ Fɔ Wɔship Nɔn Ɔda PAPA GƆD

²⁹ Mozis wɔn di Izrɛlayt dɛn se we PAPA GƆD we na dɛn PAPA GƆD go dɔn dɔnawe wit ɔl di pipul dɛn we bin de na di land we dɛn bin de go kapchɔ fɔ dɛnsɛf fɔ de,

³⁰ lɛ dɛn nɔ bigin de go tray fɔ no aw di pipul dɛn we bin de de bin de wɔship dɛn gɔd dɛn, lɛ dɛnsɛf nɔ go go fɔdɔm na di trap ɛn tɔn de wɔship dɛn.

³¹ I se di Izrɛlayt dɛn nɔ fɔ wɔship PAPA GƆD we na dɛn GƆD di we we dɛn pipul dɛn de bin de wɔship dɛn yon gɔd, bikɔs dɛn bin de du ɔl di bad bad tin dɛn we PAPA GƆD et, fɔ dɛn gɔd dɛn; dɛn dɔn ivin bɔn dɛn pikin dɛn na faya gi dɛn gɔd dɛn.

³² I se dɛn fɔ mek shɔ se dɛn du ɔl wetin i bin dɔn tɛl dɛn se PAPA GƆD se dɛn fɔ de du; dɛn nɔ fɔ put de, dɛn nɔ fɔ pul de.