Ditarɔnɔmi 10 - Krio Fɔs Oli Baybul

Mozis Gɛt Di Kɔmandmɛnt Dɛn Bak.

¹ Mozis mɛmba di Izrɛlayt dɛn se di tɛm we PAPA GƆD bin wan gi dɛn di Kɔmandmɛnt, i bin tɛl am se lɛ i mek tu tablɛt wit ston jɛs lɛkɛ di fɔs wan dɛn, ɛn wan bɔks we i go put dɛn insay. Mozis se PAPA GƆD bin tɛl an se i fɔ kɛr dɛn go ɔp to am na di mawnten,

² so dat i go rayt ɔl wetin i bin rayt pan di fɔs wan dɛn we Mozis bin brok. Dis tɛm, i go put dɛn insay di bɔks.

³ Mozis se i bin mek di bɔks wit fayn rɛd bod, kɔt di ston tablɛt dɛn, ol dɛn nain an ɛn go ɔp di mawnten to PAPA GƆD.

⁴ I se we i kɛr dɛn go, PAPA GƆD bin rayt di Tɛn Kɔmandmɛnt pan dɛn bak; ɔl wetin i tɛl di Izrɛlayt dɛn we i bin tɔk to dɛn insay da faya. Mozis se PAPA GƆD gi am di tablɛt dɛn bak we i dɔn rayt pan dɛn dɔn.

⁵ I se nain in tɔn rawnd ɛn go dɔŋ di mawnten go put di tablɛt dɛn insay di bɔks we i bin mek; na de dɛn de bikɔs na so PAPA GƆD tɛl am fɔ du.

⁶ Afta ɔl dat, di Izrɛlayt dɛn travul frɔm dɛn Jaakan pipul dɛn wata wɛl go Mɔsɛra, usay Erɔn day, ɛn na de dɛn bɛr am. Na Ɛlieza, we na bin Erɔn in bɔypikin, dɛn mek di nyu man fɔ mek sakrifays fɔ pipul sin.

⁷ We dɛn bin kɔmɔt Mɔsɛra, dɛn travul go Gudgoda. Frɔm de, dɛn go Jɔbatha, di kɔntri we gɛt plɛnti plɛnti watasay ɛn wɛl dɛn.

⁸ Mozis kɔntinyu fɔ mɛmba di Izrɛlayt dɛn wetin ɛn wetin bin dɔn apin. I se na da tɛm de, PAPA GƆD bin se na di Livayt fambul dɛn nɔmɔ fɔ tot di Ak ɔf di Kɔvinant, mek sakrifays fɔ pipul sin, ɛn tek PAPA GƆD in nem blɛs di ɔda fambul dɛn, so PAPA GƆD go du gud tin dɛn fɔ dɛn, ɛn na so dɛn de du.

⁹ Na dat mek PAPA GƆD nɔ bin gi di Livayt dɛn prɔpati we i bin de gi di ɔda fambul dɛn; na fɔ wok fɔ PAPA GƆD na dɛn yon prɔpati, ɛn na dat i bin dɔn tɛl Erɔn.

¹⁰ Mozis mɛmba dɛn igen se, na da tɛm de i bin de ɔp di mawnten de pre fɔ dɛn bak, fɔ fɔti de ɛn fɔti nɛt, jɛs lɛk di fɔs tɛm we PAPA GƆD bin lisin to am ɛn sɔri fɔ dɛn ɛn nɔ bin dɔnawe wit dɛn.

¹¹ Mozis se PAPA GƆD bin tɛl am se lɛ i lid di pipul dɛn lɛ dɛn go kapchɔ di land we in PAPA GƆD bin dɔn prɔmis Izrɛl dɛn fɔstɛm-papa dɛn se i go gi dɛn.

Wetin PAPA GƆD Want

¹² Mozis tɛl di Izrɛlayt dɛn se PAPA GƆD se in want dɛn fɔ wɔship in PAPA GƆD we na dɛn PAPA GƆD ɛn wok fɔ am wit ɔl dɛn at ɛn ɔl dɛn sol,

¹³ ɛn du ɔl wetin i tɛl dɛn se dɛn fɔ du, so ɔltin go fayn fɔ dɛn.

¹⁴ Mozis se na PAPA GƆD gɛt ɔp di skay te rich ɔp ɔp ɛvin, ɛn di ath ɛn ɔl wetin de de.

¹⁵ Mozis se pan ɔl dat PAPA GƆD put in at to Izrɛl dɛn fɔstɛm-papa dɛn ɛn pik dɛn jɛnareshɔn fɔ bi in yon pipul, ɛn tek dɛn pas ɔl ɔda pipul dɛn, frɔm da de de.

¹⁶ I se, dɛn fɔ mek ɔp dɛn maynd ɛn chenj ɛn lɛf fɔ traŋayes,

¹⁷ PAPA GƆD we na dɛn PAPA GƆD, na di PAPA GƆD fɔ ɔl ɔda gɔd dɛn, ɛn Lɔd fɔ ɔl dɛn Lɔd dɛn. Na big ɛn wɔndaful PAPA GƆD. I nɔ de tek sayd ɛn nɔbɔdi nɔ ebul brayb am.

¹⁸ I nɔ lɛk advantej; i nɔ de gri lɛ pipul dɛn tek advantej pan pikin dɛn we nɔ gɛt mama ɛn papa, ɛn uman dɛn we dɛn man dɔn day. In na PAPA GƆD we lɛk di trenja dɛn we de wit di Izrɛlayt dɛn; i kin gi dɛn klos fɔ wɛr ɛn tin fɔ it.

¹⁹ Mozis se dɛn fɔ du gud to trenja bikɔs dɛnsɛf na bin trenja na Ijipt.

²⁰ I se dɛn fɔ rɛspɛkt PAPA GƆD ɛn wɔship in waŋren, sav am, ɛn yuz in nem fɔ prɔmis pɔsin ɛnitin.

²¹ I se na PAPA GƆD fɔ prez; nain na dɛn PAPA GƆD we dɔn du plɛnti tin dɛn we mek dɛn wɔnda.

²² We dɛn fɔstɛm-papa dɛn bin muf go Ijipt we Josɛf bin sɛn kɔl dɛn, na dɛn sɛvinti nɔmɔ bin go. Bɔt PAPA GƆD bin dɔn mek dɛn plɛnti te dɛn pas di sta dɛn na skay.