Ditarɔnɔmi 1 - Krio Fɔs Oli Baybul

¹ Na di tin dɛn dɛnwanya we Mozis bin tɛl di Izrɛlayt dɛn we dɛn bin de na di ɛmti ples we pɔsin nɔ go ebul tap we de biɛn Riva Jɔdan. Dis ples ya de insay di Jɔdan vali we de bitwin Paran na wan say ɛn Tofɛl, Leban, Azirɔth ɛn Dizaab na di ɔda say.

² Na ilɛvin de pɔsin go tek fɔ waka frɔm Mawnt Saynay to Kedɛsh Bania, dat na if i pas bay Idɔm.

³ Di fɔs de na di ilɛvin mɔnt insay di ia we mek fɔti ia we di Izrɛlayt dɛn bin kɔmɔt Ijipt, Mozis bin tɛl dɛn ɔltin we PAPA GƆD bin tɛl am fɔ tɛl dɛn,

⁴ dat na afta we Mozis bin dɔn bit Sayɔn, we na di Amɔrayt Kiŋ we bin de rul na Ɛshbɔn ɛn Kiŋ Ɔg we na bin di Beshan kiŋ we bin de na Ashtarɔt ɛn Ɛdriay.

⁵ We dɛn bin de na Moab biɛn Riva Jɔdan, Mozis bigin ɛksplen bɔt di lɔ dɛn. I tɛl dɛn se,

⁶ PAPA GƆD we na dɛn GƆD bin tɛl dɛn na Mawnt Saynay se i dɔn du so we dɛn de na da mawnten de.

⁷ I tɛl dɛn fɔ pak dɛn tiŋs dɛn mek dɛn kɔntinyu dɛn patrol. I se dɛn fɔ go na dɛn Amɔrayt dɛn kɔntri we gɛt plɛnti plɛnti il, ɛn to dɛn neba dɛn kɔntri we de na di vali; to di kɔntri dɛn we de na il, di wan dɛn we de na flat grɔn, di ɔt ɛn dray ples, di wan dɛn we de nia di watasay, di Kenanayt dɛn kɔntri, na di nɔth say, te rich dɛn Libanɔn Mawnten, na di ist say, te rich di big big riva we na Riva Yufretis.

⁸ I se in PAPA GƆD dɔn gi dɛn ɔl di land, so dɛn fɔ go kapchɔ am ɛn tap na di land we PAPA GƆD bin dɔn prɔmis dɛn fɔstɛm-papa dɛn, Ebraam, Ayzak ɛn Jekɔb se i go gi dɛn ɛn dɛn grampikin dɛn we nɔ bɔn yet.

Mozis Pik Lida Dɛn

⁹ Mozis tɛl di Izrɛlayt dɛn se, na da tɛm de i bin tɛl dɛn se in waŋren nɔ go ebul kɔntrol dɛn igen

¹⁰ I se PAPA GƆD we na dɛn PAPA GƆD dɔn mek dɛn dɔn bɔn pikin te dɛn bɔku lɛk di sta dɛn na di skay.

¹¹ I pre mek PAPA GƆD, we na dɛn papa dɛn PAPA GƆD, mek dɛn bɔku wan tawzin tɛm mɔ, ɛn lɛ i blɛs dɛn jɛs lɛk aw i bin dɔn prɔmis dɛn.

¹² Mozis se in waŋren nɔ go ebul kɔntol dɛn ɔl wit ɔl di prɔblɛm dɛn ɛn af af cham-mɔt we dɛn kin gɛt if nɔbɔdi nɔ ɛp am.

¹³ I tɛl dɛn se mek dɛn pik sɔm man dɛn we no wetin na layf, we lan ɛn gɛt sɛns, wan wan na ɔl di fambul dɛn, mek i go mek dɛn edman.

¹⁴ Dɛn bin gri ɛn tɛl am se na gud tin i mɛmba so bikɔs dat go mek layf fayn fɔ dɛn.

¹⁵ So Mozis bin tek di man dɛn we dɛn bin pik ɛn mek dɛn edman. Sɔm pan dɛn na bin edman fɔ wan wan tawzin pipul, sɔm fɔ wam ɔndrɛd, sɔm fɔ fifti, ɛn sɔm fɔ tɛn pipul ɛn ɔda bigman dɛn na ɔl di difrɛn fambul dɛn.

¹⁶ Mozis bin tɛl dɛn jɔj dɛn traŋa traŋa wan se, dɛn nɔ fɔ tek nɔbɔdi pat we dɛn de jɔj kes bitwin tu Izrɛlayt ɔ wan Izrɛlayt ɛn fɔrina.

¹⁷ I se dɛn nɔ fɔ sayd nɔbɔdi we dɛn de jɔj kes. Dɛn fɔ lisin ɔlman, po man o, di wan we jɛntri o, dɛn fɔ lisin dɛn ɔl. Dɛn nɔ fɔ luk nɔbɔdi fes, bikɔs na PAPA GƆD dɛn de jɔj fɔ. I tɛl dɛn se, dɛn fɔ kɛr ɛni kes we traŋa fɔ dɛn go to am; in go andul am.

¹⁸ I se na da tɛm de in bin tɛl dɛn ɔl wetin dɛn sɔpoz fɔ de du.

Mozis Sɛn Sɔm Man Dɛn Go Wach Di Land

¹⁹ Mozis kɛri ɔn fɔ tɛl di Izrɛlayt dɛn ɔl wetin bin dɔn bi; I se we dɛn bin kɔmɔt Mawnt Saynay, dɛn bin si se dɛn bin pas insay da bad bad ɛmti ples we pipul nɔ go ebul tap we dɛn bin de go na di Amɔrayt dɛn kɔntri we de na dɛn il, jɛs lɛkɛ aw dɛn PAPA GƆD bin dɔn tɛl dɛn fɔ du; dɛn bin go na Kedɛsh Bania.

²⁰ I se in bin tɛl dɛn se dɛn dɔn rich na dɛn Amɔrayt dɛn kɔntri we de na il, we PAPA GƆD we na dɛn PAPA GƆD bin dɔn gi dɛn.

²¹ I tɛl dɛn se mek dɛn luk di land we PAPA GƆD dɔn rɛdi fɔ gi dɛn, lɛ dɛn go kapchɔ am ɛn tap de, jɛs lɛk aw PAPA GƆD we na dɛn fɔstɛm-papa dɛn PAPA GƆD, bin dɔn tɛl dɛn. I tɛl dɛn se mek dɛn nɔ fred ɔ pwɛl at pan natin.

²² I se na da tɛm de dɛn ɔl bin go mit am ɛn tɛl am se, dɛn fɔ sɛn sɔm man dɛn go wach di land, so dɛn go kam tɛl dɛn aw i tan ɛn aw dɛn go pas go de.

²³ I se bikos in bin si se dat go gud, i bin pik wan wan man pan ɔl di twɛlv fambul ɛn sɛn dɛn go.

²⁴ Dɛn bin go ɔp di kɔntri we de na il go wach wach te rich di dray Ɛshkɔl Vali.

²⁵ We dɛn bin kam bak, dɛn bin kam wit sɔm pan di frut dɛn we bin de gro na di land ɛn bin tɛl dɛn se di land we PAPA GƆD we na dɛn PAPA GƆD de gi dɛn, na land we gud fɔ plant.

²⁶ Mozis se, pan ɔl dat dɛn nɔ bin gri fɔ du wetin PAPA GƆD we na dɛn GƆD, bin tɛl dɛn fɔ du,

²⁷ bifo dat dɛn bin sidɔm insay dɛn tɛnt de grɔmbul se, PAPA GƆD nɔ lɛk dɛn, nain mek i pul dɛn kɔmɔt na Ijipt ɛn kɛr dɛn go usay di Amɔrayt dɛn de, so dat dɛn go kil dɛn.

²⁸ I se di Izrɛlayt dɛn se if na da ples de dɛn fɔ go, we dɛn brɔda dɛn dɔn tɛl dɛn bad bad tin dɛn bɔt, tin dɛn we mek dɛn fred. We dɛn se di pipul dɛn ay ay pas dɛn, ɛn di wɔl dɛn we de rawnd di siti ay te dɛn de rich di skay, ɛn na jayant dɛn de de.

²⁹ Mozis se in bin tɛl dɛn se dɛn nɔ fɔ fred dɛn pipul dɛn de ɛn dɛn nɔ fɔ pwɛl at atɔl.

³⁰ I se, PAPA GƆD we na dɛn GƆD we de wit dɛn, go ɛp dɛn fɛt jɛs lɛkɛ aw i fɛt fɔ dɛn we dɛnsɛf bin si wit dɛn yon yay na Ijipt,

³¹ ɛn na di ɛmti ples we pɔsin nɔ go ebul tap; dɛn bin no aw PAPA GƆD we na dɛn GƆD bin tinap fɔ dɛn ɔl usay dɛn bin go tete dɛn rich de, jɛs lɛkɛ aw ɛni papa go tinap fɔ in pikin.

³² I se pan ɔl di tɔk we i tɔk to dɛn, dɛn bin stil nɔ biliv PAPA GƆD we na dɛn GƆD,

³³ in we bin de waka wit dɛn wit faya na nɛt ɛn tik klawd santɛm de sho dɛn rod ɛn fɛn ples fɔ dɛn fɔ blo.

Aw PAPA GƆD Pɔnish Izrɛl

³⁴ Mozis se PAPA GƆD bin yɛri ɔl wetin dɛn bin de tɔk ɛn i bin vɛks, so i bin swɛ se,

³⁵ bikɔs dɛn we de da tɛm de na pipul dɛn we de mɛmba fɔ du bad, dɛn nɔn nɔ go si di land we i bin dɔn prɔmis se in go gi dɛn fɔstɛm-papa dɛn;

³⁶ pas Kelɛb we na Jɛfunɛ in bɔypikin, bikɔs in rɛspɛkt am ɛn de du ɔl wetin i se, so nain ɛn in jɛnareshɔn dɛn in go gi ɔl usay we i bin dɔn go na di land.

³⁷ Mozis se, PAPA GƆD bin dɔn vɛks pan am fɔ wetin di Izrɛlayt dɛn bin dɔn du, so PAPA GƆD bin dɔn se Mozis sɛf nɔ go go insay di land.

³⁸ Na Jɔshwa we na Nɔn in bɔypikin we na bin Mozis in aprɛntis, go lid dɛn go. In go go na di land so dɛn fɔ de gi am maynd mek in at go de traŋa fɔ ebul tinap lɛkɛ man.

³⁹ I se PAPA GƆD bin tɛl dɛn ɔl se na dɛn lili pikin dɛn we nɔ no gud ɛn bad yet we dɛn bin se pipul dɛn go kil, in go gi di land ɛn na dɛn go go de.

⁴⁰ Mozis tɛl di Izrɛlayt dɛn se lɛ dɛn jɔs tɔn bak go na di ɛmti ples we pipul nɔ go ebul tap ɛn fala di rod we de go na di Rɛd Si.

⁴¹ Mozis se we i bin tɛl dɛn dat, dɛn bin tɔk se dɛn dɔn sin. Bɔt naw, dɛn dɔn rɛdi fɔ go kapchɔ di land bikɔs na so PAPA GƆD we na dɛn PAPA GƆD se dɛn fɔ du. I se nain dɛn wɛr dɛn sojaman klos, tek dɛn tiŋs dɛn we dɛn kin tek fɛt fɔ go ɔp de, bikɔs dɛn bin min to se i go izi.

⁴² I se, PAPA GƆD bin tɛl am traŋa wan se lɛ dɛn nɔ mistek go fɛt de o, bikɔs in nɔ go go wit dɛn. If dɛn go de, dɛn ɛnimi dɛn go bit dɛn soba wan.

⁴³ Mozis se i bin tɛl dɛn wetin PAPA GƆD se, bɔt pan ɔl dat dɛn nɔ gri fɔ du wetin PAPA GƆD se, bifo dat dɛn mek pɔmpɔs ɛn go ɔp di il.

⁴⁴ Naim di Amɔrayt dɛn bɔs pan dɛn lɛkɛ ɔni ɛn rɔnata dɛn te rich Ɔma na Idɔm, de bit dɛn lɛkɛ dɔg.

⁴⁵ So dɛn bin tɔn bak go kray to PAPA GƆD fɔ ɛp dɛn, bɔt PAPA GƆD nɔ bin braskitul dɛnsɛf.

Di Izrɛlayt Dɛn Travul Kɔmɔt Kedɛsh Go Riva Anɔn

⁴⁶ Mozis mɛmba dɛn se, dɛn bin de na Kedɛsh fɔ lɔŋ.