Daniɛl 9 - Krio Fɔs Oli Baybul

Daniɛl Pre Fɔ In Pipul Dɛn

¹ Di fɔs ia we Dariɔs, Zaksis in bɔypikin, we bɔn na Mɛdia, bɔt bin bi kiŋ na di Babilonian dɛn kindɔm,

² insay di fɔs ia we i bi kiŋ, mi Daniɛl, bin si insay di buk dɛn, ɔmɔs ia go gɛt fɔ pas bifo Jerusɛlɛm go kan to akɔdin to wetin PAPA GƆD bin tɛl Prɔfɛt Jɛrimaya, ɛn dat na sɛvinti ia.

³ Nain a put mi atɛnshɔn to PAPA GƆD de pre ɛn beg am. A wɛr chɛr chɛr klos ɛn rɔb ashis.

⁴ A pre to PAPA GƆD we na mi Gɔd de kɔnfɛs se, “PAPA GƆD we ay pas ɔl ɛn we fɔ fred, we de kip in prɔmis, ɛn di lɛk we i lɛk di wan dɛn we lɛk am ɛn de du wetin i se, nɔ de shek.

⁵ Wi dɔn kɔmit sin ɛn dɔn du bad, ɛn biev wikɛd wan ɛn tɔn wi bak ɛn nɔ du wetin yu lɔ ɛn ɔda dɛn se;

⁶ Wi nɔ bin lisin wetin yu wokman dɛn, di prɔfɛt dɛn bin de tɔk wetin yu tɛl dɛn fɔ tɛl wi kiŋ dɛn, wi prins dɛn, ɛn wi papa dɛn, ɛn to ɔl di pipul na di land.

⁷ PAPA GƆD, fɔ waka tret de na yu an, bɔt wi de disgres wisɛf ɔltɛm to di man dɛn na Juda, to di wan dɛn we tap na Jesuselɛm, ɛn to ɔl Izrɛl; dɛn wan dɛn we de nia ɛn di wan dɛn we de fa we, bikɔs ɔf di wikɛd tin dɛn we wi dɔn du to yu.

⁸ PAPA GƆD, wi de disgres wisɛf ɔltɛm; wi kiŋ dɛn de disgres dɛnsɛf, wi bigman dɛn de disgres dɛnsɛf ɛn wi papa dɛn de digres dɛnsɛf, bikɔs wi de sin agens yu.

⁹ PAPA GƆD, sɔri at ɛn fɔgivnɛs de na yu an; bikɔs wi dɔn tɔn wi bak gi am,

¹⁰ ɛn nɔ de du wetin PAPA GƆD we na wi Gɔd se, dat na fɔ du wetin in wokman ɛn prɔfɛt dɛn tich wi.

¹¹ Di wanol Izrɛl dɔn disobe yu ɛn tɔn wi bak, ɛn nɔ gri fɔ du wetin yu se. Di swɛ dɛn ɛn di wanwɔd we wi mek fɔ du wetin rayt insay Mozis in lɔ we na PAPA GƆD in wokman, dɔn fɔdɔm pan wi, bikɔs wi dɔn kɔmit sin to yu.

¹² PAPA GƆD dɔn du wetin i se i go du wɛn wi bigman dɛn we de oba wi, we i briŋ big big wahala kam pan wi; bikɔs wetin bi to Jerusɛlɛm, nɔ bi nɔwe na dis wɔl wande.

¹³ As i rayt na Mozis in lɔ, na so ɔl dis wahala dɔn mit wi. Pan ɔl dat, wi nɔ tɛl PAPA GƆD tɛnki fɔ di sɔri we PAPA GƆD we na wi Gɔd sɔri fɔ wi.

¹⁴ Nain mek so PAPA GƆD bin dɔn rɛdi di trɔbul ɛn sɛn am pan wi; bikɔs PAPA GƆD we na wi GƆD de waka tret pan ɔltin we i dɔn du ɛn wi nɔ gri du wetin i se.

¹⁵ So duya PAPA GƆD we na wi Gɔd, yu we pul yu pipul dɛn kɔmɔt Ijipt wit yu pawa, dɔn gɛt gud nem te dis tɛm ya; wi dɔn kɔmit sin, wi dɔn du bad.

¹⁶ Duya PAPA GƆD, fɔseka ɔl di tret waka we yu de waka, lɛ yu wamat ɛn yu pɔnishmɛnt nɔ kam pan Jerusɛlɛm we na siti we na yu oli il; fɔseka wi sin dɛn ɛn di bad tin dɛn we wi papa dɛn dɔn du, Jerusɛlɛm ɛn yu pipul dɛn tɔn tin fɔ laf, to di pipul dɛn we de rawnd wi.

¹⁷ So duya wi PAPA GƆD, yɛri di prea we yu wokman de pre, ɛn de beg we i de beg yu, ɛn fɔ yu yon sek, PAPA GƆD, mek yu fes shayn pan yu oli ples we dɛn de pre to yu, bɔt we dɔn pwɛl naw.

¹⁸ Duya PAPA GƆD, opin yu yes ɛn yɛri; opin yu yay dɛn ɛn luk aw wi dɔn nyakanyaka, ivin di siti we gɛt yu nem; fɔ wi nɔ de beg yu PAPA GƆD bikɔs wi gɛt rayt sa, bɔt bikɔs yu na PAPA GƆD we kin sɔri dip dip wan.

¹⁹ PAPA GƆD duya, yɛri; PAPA GƆD, duya, sɔri fɔ wi; PAPA GƆD yɛri wi ɛn du sɔntin; nɔ wes tɛm, fɔ yu pipul dɛn sek, duya mi PAPA GƆD, bikɔs na yu nem de pan yu siti ɛn yu pipul dɛn.

Gebrɛl Ɛksplen Di Prɔfisi

²⁰ We a bin de tɔk ɛn pre, de beg PAPA GƆD fɔ mi ɛn mi pipul dɛm we na Izrɛl, dɛn sin, ɛn bin de put mi kes bifo PAPA GƆD we na mi Gɔd fɔseka mi Gɔd in oli il;

²¹ We a bin de pre, di man we nem Gebrɛl, we a bin dɔn si insay di fɔs vishɔn, bin flay kam usay a bin de, wit spid. Dat apin di tɛm we wi kin mek di ivintɛm sakrifays.

²² I ɛksplen se, “Daniɛl, a dɔn kam naw fɔ kam gi yu sɛns ɛn mek yu ɔndastand.

²³ Di tɛm we yu bin bigin beg PAPA GƆD, wɔd bin kɔmɔt, ɛn a kam fɔ tɛl yu wetin dɛn se, bikɔs ɔlman lɛk yu; so, tink bɔt wetin a go tɛl yu ɛn ɔndastand di vishɔn.

²⁴ “Dɛn dɔn put sɛvinti tayms sɛvin ia, we na lɔ fɔseka una oli siti ɛn yu pipul dɛn, fɔ tap wikɛdnɛs, fɔ tap sin, ɛn fɔ pe fɔ di bad bad tin dɛn, lɛ pipul de waka tret ɔltɛm, fɔ kɔba di vishɔn ɛn di prɔfɛt ɛn fɔ pre fɔ wan ples we go oli pas ɔl mek i go klin.

²⁵ A wan mek yu no ɛn ɔndastand se, frɔm di tɛm we dɛn tɔk se mek di pipul dɛn kam bak to PAPA GƆD ɛn bil Jerusɛlɛm, te di tɛm we di wan we dɛn dɔn anɔynt, we na prins, go kam, dat go bi sɛvin wik. Dɛn fɔ siksti tu wik dɛn go bil bak wit skwaya dɛn ɛn dip dip gɔta we go ful wit wata, bɔt i go bi tɛn we wahala go de.

²⁶ Wɛn di siksti tu wik go dɔn dɔn, dɛn go kil di pɔsin we dɛn dɔn anɔynt ɛn i go tɔn po man. Ɛn di prins we go gɛt fɔ kam, in pipul dɛm go nyakanyaka di siti ɛn di ples we dɛn de pre. Ɔltin go dɔn wantɛm wantɛm. Bay di tɛm we ɔltin go dɔn, wa go fɔdɔm. I go bi lɔ se dɛn fɔ nyakanyaka di siti.

²⁷ I go mek traŋa Kɔvinant wit bɔku pipul fɔ wan wik; ɛn fɔ af da tɛm de, i go mek dɛn tap fɔ mek sakrifays ɛn ɔfrin. Pɔsin go kɔmɔt na di say we dɛn de du wetin PAPA GƆD et, te di tɛm we di lɔ go kech di pɔsin we de pwɛl ɔlsay.”