Daniɛl 8 - Krio Fɔs Oli Baybul

Di Manship Ɛn Di Got

¹ Insay di tɔd ia we kiŋ Bɛlshaza bin de rul, wan vishɔn bin kam to mi Daniɛl, afta dɛn fɔs wan dɛn.

² Insay di vishɔn, we a luk, a bin de na Susa, di kapital siti we de na Ɛlam prɔvins; ɛn a si misɛf insay di vishɔn se a de na di riva Ulay

³ We a es mi yay ɔp, a si wan manship tinap na di sho. I bin gɛt tu ɔn; ɔl tu bin ay, bɔt wan bin ay pas in kɔmpin, bɔt na di wan we ay pas di ɔda wan bin kam ɔp afta di fɔs wan.

⁴ A si di manship de rɔn wit spid de go wɛst, nɔt ɛn sawt; nɔn ɔda bist nɔ bin ebul tinap bifo am, ɛn nɔbɔdi nɔ go ebul pul pɔsin kɔmɔt nain an; i bin jɛs de du wetin i lɛk ɛn i bin de es insɛf ɔp.

⁵ As a bin de wɔnda, nain a si wan mangot kɔmɔt frɔm di wɛst krɔs di wanol wɔl, ɛn nɔ bin tɔch di grɔn. Di got bin gɛt wan ɔn we ɔl man go si izi wan bitwin in yay dɛn.

⁶ I bin kam to di manship we bin gɛt di tu ɔn, ɛn we a bin si tinap na di sho, ɛn di got bin atak di ship traŋa wan wit vɛksteshɔn.

⁷ A si di got we i bin kam nia di manship, ɛn i bin so vɛks pan am dat i bɔt di manship ɛn brok in tu ɔn; ɛn di manship nɔ bin gɛt ɛni pawa igen fɔ fɛt di got, bɔt di got bin ib di manship na grɔn ɛn mas mas am; nɔbɔdi nɔ bin ebul fɔ pul di manship na di got in an.

⁸ Dɛn di man got bigin fɔ es insɛf ɔp bad bad wan; bɔt wɛn i bin dɔn gɛt bɔku pawa, di big big ɔn bin brok. Usay da ɔn de bin kɔmɔt, fo ɔn we ɔlman go si izi wan bɔs de, de pɔynt to di fo difrɛn say we briz de blo.

⁹ Wan lili ɔn kɔmɔt pan wan pan di ɔn dɛn ɛn gro big big wande pɔynt sawt, ist ɛn to di lan we dɛn de prez pas ɔl.

¹⁰ I gro big big wan, te rich ɛvin; i trowe sɔm pan di sta dɛn na grɔn ɛn mas mas dɛn.

¹¹ I mek insɛf big lɛk di man na os; i ɔpoz di lida na di ami na ɛvin, tap di ɛvride sakrifays we dɛn de mek to PAPA GƆD ɛn briŋ disgres to PAPA GƆD in os.

¹² PAPA GƆD in pipul dɛn bigin kɔmɔt biɛn am ɛn gi dɛnsɛf to di ɔn in pawa.

¹³ Nain a yɛri wan Oli Wande tɔk; ɛn wan ɔda Oli wan tɛl di wan we bin de tɔk se, “aw lɔŋ dis vishɔn ya bɔt di sakrifays we dɛn de bɔn ɔltɛm, ɛn di sin dɛn we de pwɛl at, ɛn di tek we dɛn dɔn tek di ples we dɛn de pre, ɛn aw dɛn de mas mas di man na os ɔnda dɛn fut?”

¹⁴ Ɛn i ansa am se, “Fɔ wan tawzin, wan ɔndrɛd ɛn fifti dez, di ples we dɛn de pre go kam bak to di rayt we, aw i bin tan bifo.’

Eŋɛl Gebrɛl Ɛksplen Wetin Di Vishɔn Min

¹⁵ Wɛn mi, Daniɛl, dɔn si di vishɔn, a bigin tray fɔ fɛnɔt wetin i min, ɛn wantɛm wantɛm, sɔntin we fiba mɔtalman bin kan tinap bifo mi.

¹⁶ Ɛn a yɛri wan man vɔys de kɔmɔt bitwin di tu say dɛn pan di riva Ulay ɛn de kɔl se, “Gebrɛl, sho dis man mek i ɔndastand wetin di vishɔn min.”

¹⁷ So Gebrɛl bin kam nia usay a bin tinap; ɛn wɛn i kam, a bin fred ɛn butu mi fes na grɔn. Bɔt i tɛl mi se, “Mɔtalman, a wan lɛ yu ɔndastand se, dis vishɔn na fɔ di tɛm we di wɔl go dɔn.’

¹⁸ As i bin de tɔk to mi, a bigin slip dip dip wan, wit mi fes na grɔn, bɔt i tɔch mi ɛn mek a tinap.

¹⁹ I se, “Luk, a go mek yu no wetin go bi na di las pat wɛn di vɛksteshɔn go dɔn; i gɛt fɔ du wit di tɛm we dɛn bin dɔn pik fɔ lɛ di wɔl dɔn.

²⁰ As fɔ di manship wit di tu ɔn we yu si, di tu ɔn na fɔ di Midian ɛn Pashian kiŋ dɛn.

²¹ Ɛn di mangot na di Grik dɛn kiŋ, ɛn di big ɔn we bin de bitwin in yay dɛn, na fɔ di fɔs kiŋ.

²² As fɔ di ɔn we bin brok, we fo ɔdawan dɛn bin tek in ples, i de sho se fo ɔda kindɔm go kɔmɔt insay in neshɔn bɔt nɔn nɔ go gɛt di sem pawa lɛk di fɔs kiŋ.

²³ Ɛn bay di tɛm we dɛn yon pawa de dɔn, wɛn dɛn wikɛd wan dɛn kɔp go dɔn ful, wan kiŋ we nɔ de laf we sabi andul prɔblɛm, go kam.

²⁴ I go gɛt bɔku pawa ɛn i go so de pwɛl ɛn kil, dat pipul dɛn go de fred am. I go de win pan ɔl wetin i de du, ɛn i go nyakanyaka plɛnti bigman dɛn, ɛn semwe, dɛn pipul we biliv pan PAPA GƆD.

²⁵ Bay in kɔni kɔni, di tɛm we i de na pawa, i go mek pipul dɛn prɔfit pan fɔls layf, ɛn i go de tink nain maynd se in na bigman wit bɔku pawa. Di tɛm we pipul dɛn nɔ de tink am, i go kil bɔku; ɛn i go ivin fɛt di prins we ay pas ɔl di prins dɛn; bɔt i go rich in watalo we nɔto bay mɔtalman an.

²⁶ Di vishɔn we yu si ivin ɛn mɔnin we yu dɔn no di minin naw, na tru tru tin; bɔt kip di vishɔn sikrit bikɔs i nɔ go bi jis nɔ.”

²⁷ Mi Daniɛl, bin fil wik ɛn sik lidɔm fɔ tu tri de; dɔn a bin grap ɛn bigin du di kiŋ in wok bak; bɔt di vishɔn bin shɔk mi ɛn a nɔ bin ɔndastand am atɔl.