Daniɛl 7 - Krio Fɔs Oli Baybul

Daniɛl In Vishɔn Dɛn ( 7:1–12:13 ) Di Fo Bist

¹ Di fɔs ia we Bɛlshaza, Babilɔn dɛn kiŋ bin de na pawa, Daniɛl bin drim ɛn si vishɔn we i bin lidɔm nain bed. So i rayt dɔn di drim ɛn tɔk ɔl wetin i si.

² Daniɛl se, “insay mi vishɔn we a si na nɛt, a si fo difrɛn kayn briz we kɔmɔt na ɛvin de blo, ɛn miksɔp di big big si.

³ Ɛn fo big big bist bin grap kɔmɔt na di si, ɛn dɛn ɔl bin difrɛn.

⁴ Di fɔs wan bin tan lɛk layɔn ɛn gɛt fɛda dɛn lɛk igul. Ɛn as a bin de luk, dɛn pul ɔl in fɛda dɛn kɔmɔt pan am ɛn mek i tinap wit tu fut lɛkɛ mɔtalman; ɛn dɛn bin gi am mɔtalman maynd, so i go ebul tink lɛk mɔtalman.

⁵ Ɛn a si wan ɔda bist, di sɛkɛn wan. In bin tan lɛkɛ bia. Dɛn bin es am ɔp wansay; i bin gɛt tri bon rib insay in mɔt midul in tit dɛn, ɛn dɛn bin tɛl am se, ‘grap, it bɔku bɔku flɛsh.’

⁶ Afta dawande, a luk bak, ɛn a si ɔda wan we in tan lɛk lɛpɛt, ɛn i gɛt fo fɛda lɛk bɔd yon nain bak; ɛn i gɛt fo ed; ɛn dɛn gi am pawa fɔ kɔntrol ɔltin.

⁷ Afta dis, insay dis vishɔn ya na nɛt, a si di nɔmba fo bist; in bin ebi fɔ luk, ɛn bin fiaful ɛn bin gɛt trɛnk bad; i bin gɛt ayɛn tit dɛm; i bin de it awaŋɔt we ɛn bin de brok brok pis pis, ɛn mas mas di wan dɛn we lɛf, wit in fut. I bin difrɛn frɔm ɔl di ɔda bist dɛn we bin dɔn kam bifo am; ɛn in bin gɛt tɛn ɔn.

⁸ A bin de wach di ɔn dɛn, nain a si wan ɔda wan bɔs midul dɛn, wan smɔl wan, ɛn dɛn jɔg tri pan di fɔs ɔn dɛn kɔmɔt na dɛn rut; ɛn a si se dis ɔn ya bin gɛt yay dɛn we tan lɛk mɔtalman yon, ɛn mɔt we de tɔk impɔtant tin dɛn.

Di Vishɔn Bɔt Di Wan We Bin Dɔn De Te Go

⁹ As a bin de luk, nain dɛn kan put tron dɛn ɛn di wan we bin dɔn de lɔlɔntɛm, kam sidɔm; in klos bin wayt lɛk sno, ɛn in ia nain ed tan lɛk tru tru wul; na faya dɛn tek mek in tron, ɛn in wil dɛn na faya we de kech.

¹⁰ Bɔku faya bin kɔmɔt de kech bifo am; tawzin tawzin pipul bin de wok fɔ am; ɛn tɛn tawzin tayms tɛn tawzin bin de advays am; di kot bin de ɔn ɛn di buk dɛn bin opin.

¹¹ Nain a luk insay de bikɔs ɔf di big wɔd dɛn we di ɔn bin de tɔk. Ɛn as a bin de luk, dɛn kil di bist; dɛn nyakanyaka in bɔdi ɛn mek dɛn go bɔn am wit faya.

¹² As fɔ di ɔda bist dɛn, dɛn bin tek dɛn pawa kɔmɔt na dɛn an, bɔt dɛn bin mek dɛn layf de fɔ sɔm tɛm.

¹³ Insay di vishɔn dɛn na nɛt, a si pɔsin insay di klawd dɛn we de ɔp, pɔsin we tan lɛk mɔtalman, nain i kam to di Enshɛnt ɔf Dez ɛn dɛn sho am to am.

¹⁴ Ɛn dɛn bin gi di mɔtalman pawa ɛn gud nem ɛn kindɔm, so dat ɔl kayn pipul, neshɔn ɛn dɛn wan we de tɔk difrɛn difrɛn laŋwej fɔ wok fɔ am; in pawa na pawa we go de sote go, i nɔ go ɛva dɔn, ɛn in kindɔm na wan kindɔm we nɔ go fɔdɔm.

Dɛn Sho Wetin Di Vishɔn Dɛn Min

¹⁵ “Ɛn as fɔ mi Daniɛl, mi spirit bin wɔri bad bad wan ɛn di vishɔn dɛn we a bin de tink bɔt, bin de mek a fred.

¹⁶ So a bin go to wan pan dɛn wan dɛn we bin tinap de ɛn aks am fɔ tɛl mi tru tru wetin ɔl dɛn tin ya min. Nain i tɛl mi ɛn mek a no wetin ɔl dɛn tin ya min.

¹⁷ ‘Dɛn fo bist na fo kiŋ we go rul na di wɔl.

¹⁸ Bɔt di oli wan dɛm we biliv pan PAPA GƆD we ay pas ɔl, go gɛt di kindɔm sote go.

¹⁹ “Dɔn a bin wan no di tru tru tin bɔt di nɔmba fo bist, we bin difrɛn pas ɔl di ɔda wan dɛn, ɛn we bin bad te i bad natin, wit in ayɛn tit dɛn ɛn bras fiŋa nel dɛm. Di sem wan bin tek tin dɛm ɛn bin brok dɛm pis pis ɛn mas mas di wan dɛm we lɛf wit in fut.

²⁰ Ɛn igen, di tɛn ɔn we bin de nain ed, ɛn di ɔda ɔn we bin bɔs midul dɛn, we na bifo am tri pan dɛn bin fɔdɔm; da ɔn de we bin gɛt yay ɛn mɔt we de tɔk impɔtant tɔk, ɛn we bin luk lɛk se i gɛt pawa pas ɔl in kɔmpin dɛn.

²¹ As a bin de luk, dis ɔn ya bigin fɛt wit dɛn wan dɛn we biliv pan PAPA GƆD,

²² ɛn i bin de win dɛn, te di wan we bin dɔn de lɔlɔntɛm kam, ɛn i gi jɔjmɛnt fɔ seka di wan dɛn we biliv pan PAPA GƆD we ay pas ɔl, ɛn di tɛm rich wɛn di wan dɛn we biliv pan PAPA GƆD gɛt di kindɔm.

²³ “Naim i se: ‘As fɔ di nɔmba fo bist, wan ɔda kindɔm we go bi nɔmba fo, go kam na di wɔl, ɛn i go difrɛn pas ɔl di ɔda kindɔm dɛn, ɛn i go kapchɔ di wanol wɔl, ɛn i go mas mas am ɛn brok brok am pis pis.

²⁴ Ɛn di tɛn ɔn dɛn we kɔmɔt insay da kindɔm de, tɛn kiŋ dɛn go rul, dɔn afta dat, wan ɔda wan go rul; in go difrɛn pas di fɔs wan dɛn,

²⁵ I go tɔk bad tin bɔt PAPA GƆD we ay pas ɔl, ɛn i go mɔna dɛn wan dɛn we biliv pan PAPA GƆD ɛn i go tink fɔ chenj aw tin tan, ɛn di lɔ; ɛn i go gɛt di pawa fɔ tri ɛn di af ia.

²⁶ Bɔt di kot go sidɔm ɛn jɔj am, ɛn dɛn go tek in pawa nain an, ɛn dɛn go nyakanyaka am kpatakpata.

²⁷ Di kindɔm ɛn di pawa ɛn di kindɔm in pawa ɔnda di wanol ɛvin go go to di pipul dɛn we biliv pan PAPA GƆD we ay pas ɔl; dɛn kindɔm go de sote go ɛn ɔl ɔda pawa dɛn go wok fɔ dɛn ɛn go obe dɛn.’

²⁸ ‘Na so di wɔd go. As fɔ mi Daniɛl, di tin dɛn we a bin de tink, bin mek a de fred bad bad wan, ɛn mi fes in kɔla bin chenj; bɔt a bin kip ɔl dɛn tin ya na mi at.”