Daniɛl 6 - Krio Fɔs Oli Baybul

Dɛn Put Daniɛl Insay Usay Dɛn Layɔn Dɛn De

¹ Dariɔs bin gladi fɔ put wan ɔndrɛd ɛn twɛnti Rɛsidɛnt Minista ɔlsay na di kindɔm.

² I bin put tri prɛsidɛnt oba dɛn ɛn Daniɛl na bin wan. Na to dɛn di Rɛsidɛnt Minista dɛn fɔ ripɔt, so dat di kiŋ nɔ go lɔsis atɔl.

³ Dis Daniɛl ya bin bɛtɛ fafawe pas ɔl di ɔda prɛsidɛnt ɛn Rɛsidɛnt Minista dɛn, bikɔs i bin gɛt wan spirit we nɔ de mek mistek insay am; ɛn di kiŋ bin de plan fɔ put am oba di wanol kindɔm.

⁴ So ɔl di ɔda prɛsidɛnt ɛn Rɛsidɛnt Minista dɛn bigin fɔ fɛn we fɔ kɔmplen bɔt Daniɛl pan di wok we i de du na di kindɔm; bɔt dɛn nɔ bin ebul fɔ fɛn natin fɔ kɔmplen bɔt ɔ fɔ tek fɛn fɔlt pan am, bikɔs i bin tret, ɛn nɔn mistek ɔ fɔlt nɔ bin de pan am.

⁵ So dɛn man dɛn ya se, “Wi nɔ go ebul fɛn natin fɔ kɔmplen bɔt dis Daniɛl pas bɔt in PAPA GƆD in Lɔ.”

⁶ Nain di prɛsidɛnt dɛn ɛn di Rɛsidɛnt Minista dɛn mek plan; dɛn ɔl go to di kiŋ togɛda ɛn tɛl am se, “Kiŋ Dariɔs, lɛ yu gɛt lɔŋ layf!

⁷ Ɔl di prɛsidɛnt na di kindɔm, di ɔfisa ɛn di Rɛsidɛnt Minista dɛn, di kanselɔ ɛn di chif dɛn dɔn gri se, di kiŋ fɔ pas wan lɔ se, paopa ɛni pɔsin we pre fɔ ɛnitin to ɛni ɔda gɔd ɔ mɔtalman fɔ di nɛks tati dez, we nɔto yu nɔmɔ i pre to, dɛn fɔ trowe am insay usay dɛn layɔn dɛn de.

⁸ So, wi kiŋ, pas di lɔ ɛn sayn di pepa, so dat natin nɔ go chenj am, bikɔs na di lɔ dis we di Mɛdis ɛn Pashian dɛn se nɔ fɔ brok atɔl, ɛn nɔ de ɛva chenj.”

⁹ Naim Dariɔs sayn di pepa ɛn mek am lɔ.

¹⁰ Wɛn Daniɛl bin si se di pepa dɔn sayn, i go nain os usay in winda dɛn de nain rum ɔpstiaz, we opin to Jerusɛlɛm; ɛn nildɔŋ tri tɛm fɔ de ɛn pre ɛn tɛl PAPA GƆD tɛnki lɛk aw i bin dɔn de du.

¹¹ Dɔn dɛn man plan ɛn kam mit Daniɛl de pre to PAPA GƆD.

¹² So di man dɛn go nia am ɛn go tɛl di kiŋ bɔt di lɔ we dɛn bin pas. Dɛn se, “Kiŋ, yu nɔ bin pas wan lɔ se ɛnibɔdi we pre to ɛni ɔda gɔd ɔ mɔtalman, ɛn nɔ pre to yu waŋren fɔ tati dez, dɛn fɔ trowe am insay usay dɛn layɔn dɛn de?” Nain di kiŋ ansa se “Natin nɔ chenj; wetin di Mɛdis ɛn Pashian dɛn lɔ se, nɔ de chenj atɔl.”

¹³ Nain di man dɛn ansa di kiŋ se, “Kiŋ, da Daniɛl we na wan pan di wan dɛn we kɔmɔt Juda, nɔ rɛspɛkt di lɔ we yu dɔn mek, bikɔs i de pre tri tɛm fɔ de.”

¹⁴ We di kiŋ yɛri dat in at pwɛl bad, ɛn i bigin plan aw fɔ sev Daniɛl; ɛn i tray te ivin tɛm fɔ sev am.

¹⁵ Dɔn dɛn sem man dɛn mek plan ɛn go bak to di kiŋ go tɛl am se, “Mɛmba o, kiŋ, se insay di Mɛdis ɛn Pashian lɔ, nɔn lɔ nɔ de we di kiŋ go mek we fɔ chenj.”

¹⁶ Nain di kiŋ gi ɔda, ɛn dɛn go tek Daniɛl ɛn trowe am insay usay dɛn layɔn dɛn de. Di kiŋ tɛl Daniɛl se, “Yu PAPA GƆD we yu de wok fɔ ɔltɛm, go sev yu ya!”

¹⁷ Nain dɛn tek wan ston ɛn kɔba di ples we dɛn layɔn dɛn de in domɔt. Nain di kiŋ stamp am wit in stamp we de nain riŋ ɛn wit di bigman dɛnsɛf yon stamp so dat natin nɔ go chenj pan Daniɛl in kes.

¹⁸ Nain di kiŋ go nain pales ɛn nɔ it ɔ drink ɛnitin ol nɛt. I nɔ mek dɛn briŋ ɛnitin we go mek in at gladi, ɛn slip lɔs pan am.

¹⁹ As do de klin so, di kiŋ grap ɛn go kwik kwik wan to di ples we dɛn de kip dɛn layɔn dɛn, insay usay dɛn bin put Daniɛl.

²⁰ Wɛn i kam nia di ol we Daniɛl bin de, i ala lawd wan wit bɔku pen nain vɔys se, “Daniɛl, PAPA GƆD we de sote go we na yu PAPA GƆD we yu de wok fɔ ɔl tɛm, i bin ebul fɔ sev yu frɔm di layɔn dɛn?”

²¹ Nain Daniɛl ansa di kiŋ se, “Mi kiŋ, lɛ PAPA GƆD gi yu lɔŋ layf!

²² Mi PAPA GƆD sɛn in eŋɛl kan lɔk di layɔn dɛn mɔt, ɛn dɛn nɔ du mi natin bikɔs bifo PAPA GƆD, a nɔ bin du natin bad; ɛn a nɔ bin du ɛnitin bad to yu.”

²³ So di kiŋ bin gladi bad bad wan, ɛn bin gi ɔda se mek dɛn pul Daniɛl kɔmɔt insay di say usay dɛn layɔn dɛn de. So dɛn pul Daniɛl kɔmɔt ɛn dɛn bin si se natin nɔ bin du am, bikɔs i bin biliv in PAPA GƆD.

²⁴ Nain di kiŋ gi ɔda, ɛn dɛn briŋ ɔl dɛn man dɛn we bin go tɛl di kiŋ bɔt Daniɛl, dɛn pikin ɛn dɛn wɛf dɛn, ɛn trowe dɛn ɔl insay di say we dɛn layɔn dɛn de; bifo dɛn de fɔdɔm go dɔŋ so, di layɔn dɛn dɔn jomp, gɛda dɛn ɛn brok brok ɔl dɛn bon dɛn smɔl smɔl wan.

²⁵ Kiŋ Dariɔs bin rayt to ɔl di pipul dɛn, neshɔn ɛn di wan dɛn we de tɔk difrɛn difrɛn laŋwej we tap na di wɔl, se, “Lɛ pis ɛn kol at de beberebe wan to una ɔl.

²⁶ A de mek wan lɔ se, ɔlman we de ɔlsay we de ɔnda mi, di kiŋ in kɔntrol, fɔ wɔship Daniɛl in PAPA GƆD, bikɔs na PAPA GƆD we gɛt layf, ɛn i de sote go; In kindɔm nɔ go ɛva fɔdɔm ɛn in pawa go de te ɔltin dɔn.

²⁷ In de sev ɛn pul kɔmɔt pan trɔbul i de du wɔndaful tin dɛn na ɛvin ɛn na dis wɔl sɛf, in we dɔn sev Daniɛl lɛ di Layɔn dɛn nɔ it am.”

²⁸ So bɛtɛ bin fala Daniɛl di tɛm we Dariɔs bin de rul ɛn we Sayrɔs we na Pashian bin de na pawa.