Daniɛl 5 - Krio Fɔs Oli Baybul

Bɛlshaza In Pati We I Mek

¹ Kiŋ Bɛlshaza bin mek wan pati fɔ wan tawzin pan in Rɛsidɛnt Minista dɛn, ɛn i bin drink wayn bifo dɛn wan tawzin pipul de.

² Wɛn Bɛlshaza tes di wayn, i gi ɔda se lɛ dɛn briŋ di gold ɛn silva kɔp dɛn we in papa, Nɛbyukadnɛza bin tek na di tɛmpul na Jerusɛlɛm, so dat in di kiŋ ɛn in Rɛsidɛnt Minista dɛn ɛn in wɛf ɛn switat dɛn, go drink pan dɛn.

³ So dɛn briŋ di gold ɛn silva kɔp dɛn we dɛn tek kɔmɔt na di tɛmpul, we na PAPA GƆD in os na Jerusɛlɛm; di kiŋ, ɛn in Rɛsidɛnt Minista dɛn, in wɛf ɛn switat dɛn ɔl drink pan dɛn.

⁴ Dɛn drink wayn ɛn prez dɛn gɔd dɛn we na bin gold ɛn silva, bras, ayɛn, bod ɛn ston.

⁵ Nain wantɛm dɛn si mɔtalman fiŋa dɛn jɛs apia de rayt na di wɔl na di kiŋ in os, ɔpozit di stand we di lamp bin de; di kiŋ bin si di an we i bin de rayt.

⁶ Di kiŋ in fes chenj kɔla, ɛn di tin dɛn we bin de kam nain maynd, bin mek i fred; in fut dɛn bigin trimbul ɛn in ni dɛn bigin jam dɛnsɛf.

⁷ Nain di kiŋ ala lawd lawd wan se mek dɛn briŋ di lukgrɔn man dɛm, di Babilonian dɛm, ɛn di man dɛm we no bɔt mun ɛn sta. Dɔn di kiŋ tɛl ɔl di sɛnsman dɛm na Babilɔn se, “Ɛnibɔdi we ebul fɔ rid wetin rayt na di wɔl, ɛn tɛl mi wetin i min, a go mek i wɛr pɔpul klos, ɛn wan gold chen rawnd in nɛk, ɛn i go bi di nɔmba tri rula na di kindɔm.”

⁸ Nain ɔl di kiŋ in sɛnsman dɛn tray bɔt dɛn nɔ bin ebul fɔ rid wetin rayt ɔ mek di kiŋ no di minin.

⁹ So Kiŋ Bɛlshaza bin fred bad bad wan ɛn in kɔla chenj, ɛn in Rɛsidɛnt Minista dɛn bin wɔri.

¹⁰ Wɛn di kwin yɛri wetin di kiŋ ɛn di Rɛsidɛnt Minista dɛn de tɔk, i kam insay di ɔl we di pati bin de ɛn tɔk se, “Mi kiŋ, lɛ yu gɛ lɔŋ layf! Nɔ lɛ wetin yu de tink mek yu fred ɔ lɛ yu kɔla chenj.

¹¹ Wan man de na yu kindɔm we gɛt di oli gɔd in spirit insay am. Di tɛm we yu papa na bin kiŋ, dɛn bin fɛnɔt se layt, ɔndastandin ɛn sɛns bin de pan dis man, lɛk di sɛns we di gɔd dɛn gɛt. Ɛn Kiŋ Nɛbyukadnɛza, yu papa, bin mek am di bigman pan ɔl di magik man, mɛrɛsin man, Babilonian ɛn man dɛn we no bɔt mun ɛn sta,

¹² bikɔs dɛn bin fɛnɔt se dis Daniɛl we di kiŋ bin gi nem Bɛlshaza, gɛt spirit we nɔ de mek mistek insay am, wit sabi ɛn ɔndastandin fɔ tɛl drim dɛn minin, fɔ sho ridul dɛn ansa ɛn klia prɔblɛm. So lɛ dɛn kɔl Daniɛl kam ɛn i go sho dɛn di minin.”

Daniɛl Ɛksplen Wetin Di Raytin Min

¹³ So dɛn briŋ Daniɛl kam bifo di kiŋ. Di kiŋ tɛl Daniɛl se, “Na yu na di Daniɛl we na wan pan di pipul, we di kiŋ, mi papa bin briŋ kɔmɔt Juda.”

¹⁴ A dɔn yɛri bɔt yu se yu gɛt di oli gɔd in spirit insay yu, ɛn yu gɛt layt ɛn ɔndastandin, ɛn gud gud sɛns.

¹⁵ Naw dɛn bin dɔn briŋ di sɛnsman dɛn ɛn di mɛrɛsin man dɛn kam bifo mi fɔ rid dis raytin, ɛn mek a no di minin; bɔt dɛn nɔ bin ebul tɛl mi wetin di raytin min.

¹⁶ Bɔt a yɛri se yu kin tɛl pipul wetin sɔntin min ɛn kin sɔlv prɔblɛm. Luk, if yu kin rid wetin rayt so, ɛn mek a no di minin, a go drɛs yu wit pɔpul, put gold chen na yu nɛk ɛn mek yu di nɔmba tri rula na dis kindɔm.”

¹⁷ Nain Daniɛl ansa bifo di kiŋ se, “Ol ɔl yu prɛzɛnt dɛn to yusɛf, ɛn gi ɔda pɔsin di pe; bɔt a go stil rid wetin rayt, to di kiŋ ɛn tɛl am di minin.

¹⁸ Kiŋ, na PAPA GƆD we ay pas ɔl bin mek Nɛbyukadnɛza, we na yu papa, kiŋ, ɛn gi am pawa, gud nem ɛn rɛspɛkt.

¹⁹ Bikɔs ɔf di pawa we PAPA GƆD gi am, ɔl kayn pipul, neshɔn ɛn dɛn wan we de tɔk difrɛn difrɛn laŋwej bin de trimbul ɛn de fred am; udat Nɛbyukadnɛza wan fɔ kil, i kil. Udat i wan fɔ fri, i fri; udat i wan fɔ promot, i promot, ɛn udat i wan fɔ briŋ dɔn, i briŋ kam dɔŋ.

²⁰ Na wɛn Nɛbyukadnɛza bigin fil se in bɛtɛ pas ɔlman ɛn in at bigin traŋa, nain i bigin mek prawd we mek dɛn pul am nain tron ɛn in rɛspɛkt bin dɔn;

²¹ dɛn drɛb am kɔmɔt usay mɔtalman tap, ɛn in maynd tɔn to animal yon, ɛn i tap wit dɛn wayl dɔŋki dɛn; dɛn fid am wit gras lɛk kaw. In bɔdi bin de sok wit di dyu we de fɔdɔm kɔmɔt ɔp di klawd, te te i no se na PAPA GƆD we ay pas ɔl, de rul mɔtalman in kindɔm, ɛn na im de put udat in want fɔ rul oba kindɔm dɛn.

²² Ɛn yu in bɔypikin, Bɛlshaza, yu nɔ bin ɔmbul yusɛf, ɔlwe yu bin no bɔt ɔl dɛn tin dɛn de.

²³ Bɔt yu dɔn es yusɛf ɔp agens PAPA GƆD na ɛvin ɛn yu dɔn mek dɛn briŋ dɛn kɔp dɛn we bin de na PAPA GƆD in os kam na ya, ɛn yu ɛn yu wɛf ɛn switat dɛn tek dɛn drink wayn, ɛn yu dɔn prez di silva, gold, bras, ayɛn, wud ɛn ston gɔd dɛn, we nɔ de si ɔ yɛri ɛn nɔ no natin; bɔt una nɔ rɛspɛkt PAPA GƆD we nain an una layf dɛn de, ɛn we nain de kɔntrol ɔl wetin de apin to una.

²⁴ So PAPA GƆD sɛn dis an ya so we rayt dɛn wɔd ya na di wɔl.

²⁵ Ɛn na dis i rayt: MƐNƐ, MƐNƐ, TƐKƐL ɛn PASIN

²⁶ ɛn i min se: MƐNƐ min se PAPA GƆD dɔn kɔnt fɔ aw lɔŋ yu kindɔm de, ɛn i dɔn mek i dɔn fɔdɔm;

²⁷ TEKEL min se, PAPA GƆD dɔn we yu na di skel ɛn i fɛnɔt se yu gilti;

²⁸ Pɛrɛz min se yu kindɔm dɔn sheb ɛn PAPA GƆD dɔn gi am to di Mɛdis ɛn Pashian pipul dɛn.

²⁹ Nain Bɛlshaza gi ɔda, so dɛn wɛr pɔpul klos pan Daniɛl ɛn put gold chen rawnd in nɛk, dɔn dɛn anawns se na im fɔ bi di nɔmba tri rula na di kindɔm.

³⁰ Da sem nɛt de, dɛn kil Bɛlshaza we na di Babilonian kiŋ.

³¹ Ɛn di kindɔm bin go to Dariɔs we na Mɛdi ɛn i bin ol bɔt siksti-tu ia.