Daniɛl 12 - Krio Fɔs Oli Baybul

Di Tɛm We Ɔltin Go Dɔn

¹ Da tɛm de, Maykɛl, we na di pawaful akenjɛl we de kia fɔ una pipul, go grap. Tɛm go kam we trɔbul go de we nɔ bi wande frɔm we di wɔl bigin te tide; bɔt na da tɛm de dɛn go fri una pipul dɛn, ɔl dɛn wan dɛn we dɛn nem rayt insay di buk.

² Bɔku pan di wan dɛn we dɔn day go wek. Sɔm go gɛt layf sote go ɛn sɔm go gɛt shem ɛn disgres sote go.

³ Ɛn di wan dɛn we gɛt sɛns, go shayn lɛk aw di skay kin shayn brayt wan, Di wan dɛn we sho bɔku pipul aw fɔ waka di rayt we, go shayn lɛk di sta dɛn, sote go.

⁴ Bɔt yu Daniɛl, nɔ tɔk natin ɛn lɔk di buk, te di tɛm we di ɛnd go kam. Bɔku go de rɔn ɔp ɛn dɔŋ ɛn pipul go gɛt plɛnti sɛns.

⁵ Nain mi Daniɛl wach ɛn si tu ɔda pipul dɛn tinap; wan na dis sho ɛn di ɔda wan na di ɔda sho obasay.

⁶ Nain a aks di man we wɛr linin klos, we bin de ɔp say se, “aw lɔŋ i go tek bifo dɛn wɔnda ya go dɔn?”

⁷ Di man we bin wɛr linin klos we bin de ɔp say oba di watasay, es in rayt an ɛn lɛf an ɔp to ɛvin, ɛn a yɛri we i de swɛ wit di wan we nɔ de day in nem, se i go bi fɔ tri ɛn af ia. Dɔn i se, na wɛn di oli pipul dɛn pawa go dɔn, ɔl dɛn tin ya go dɔn bi.

⁸ A bin yɛri, bɔt a nɔ bin ɔndastand. Nain a se, “Du ya masta, wetin ɔl dɛn tin ya min?”

⁹ Nain i se, “Daniɛl, go usay yu de go, bikɔs dɛn dɔn kɔba ɛn lɔk tayt ɔl wetin dɛn se, te di tɛm kam we di wɔl go dɔn.

¹⁰ Bɔku go mek dɛnsɛf klin na PAPA GƆD yay, ɛn mek dɛnsɛf wayt ɛn luk gud; bɔt di wikɛd pipul dɛn go du mɔ wikɛd tin dɛn; ɛn nɔn pan di wikɛd pipul dɛn nɔ go ɔndastand, bɔt di wan dɛn we gɛt sɛns go ɔndastand.

¹¹ Frɔm di tɛm we dɛn go pul di bɔn sakrifays we nɔ de tap, dat na di bad bad tin we dɛn du, go bi wan tawzin, tu ɔndrɛd ɛn naynti de.

¹² Blɛsin go de fɔ di pɔsin we go ebul wet ɛn si di wan tawzin, tri ɔndrɛd ɛn tati fayv de.

¹³ Bɔt yu go yu we te di tɛm we ɔltin go dɔn go kam; go ɛn go rɛst. Yu go tinap na di ples we dɛn dɔn kip fɔ yu we di tɛm kam we ɔltin fɔ dɔn.