Daniɛl 11 - Krio Fɔs Oli Baybul

¹ Di tin we mi bin du di fɔs ia we Dariɔs, we kɔmɔt Mɛdis, bin de rul, a tinap fɔ am ɛn sɔpɔt am.

² Naw a go tɛl yu di tru tin. Tri mɔ kiŋ dɛn go kɔmɔt na Pashia; afta dat di nɔmba fo kiŋ go kam we go jɛntri fafawe pas ɔl di ɔda wan dɛn; bɔt wɛn i dɔn gɛt bɔku pawa bikɔs i jɛntri, i go mek ɔlman de agens di Grik Kindɔm..

Ijipt Ɛn Siria Dɛn Kindɔm Dɛn

³ Afta dat, wan pawaful kiŋ go kam, ɛn i go rul wit bad bad kɔntrol ɛn du wetin in fil fɔ du.

⁴ Wɛn i go dɔn gɛt pawa gud gud wan, in kindɔm go skata ɛn go sheb to di fo say we briz de blo kɔmɔt ɛvin, bɔt nɔto to nɔn pan in jɛnareshɔn, ɛn nɔto bay di kayn pawa we i bin de tek rul; bikɔs dɛn go jɔg di kindɔm nain an ɛn i go go to ɔda pipul dɛn we nɔ blant in jɛnareshɔn.

⁵ “Di kiŋ we de na di sawt go gɛt pawa, bɔt wan pan in prins dɛn go gɛt pawa pas am, ɛn in yon rul go pawaful bad bad.

⁶ Afta sɔm ia go dɔn pas, di kiŋ na Ijipt go mek wan wɔd wit di kiŋ na Siria, ɛn go gi am in gyal pikin fɔ mared. Bɔt di wanwɔd nɔ go las; dɛn go kil in ɛn in pikin, in man in papa ɛn in wokman dɛn we go wit am.

⁷ Dɛn tɛm dɛn de, wan pan di kiŋ in fambul dɛn go bi kiŋ; i go go insay di kiŋ na Siria in ples we dɛn kin ayd ɛn go dil wit dɛn ɛn go kɔnka dɛn.

⁸ I go kɛr dɛn gɔd dɛn go Ijipt, wit dɛn imej we dɛn mek wit mɛtal ɛn dɛn gold ɛn silva tin dɛn; Fɔ sɔm tɛm, i go lɛf fɔ atak di kiŋ na Siria.

⁹ Afta dat, di kiŋ na Siria go kam fɛt di kiŋ na Ijipt, bɔt i go tɔn bak go nain yon land.

¹⁰ “Di kiŋ na Siria in bɔypikin dɛn go mek wa ɛn gɛda bɔku bɔku ami man, we go kam te dɛn pasmak, dɔn dɛn pas go, ɛn dɛn go kɛr di wa go igen te rich na dɛn baraks.

¹¹ Dɛn di kiŋ na Ijipt go vɛks bad bad wan, ɛn go kɔmɔt kam fɛt di kiŋ na Siria; plɛnti plɛnti pipul dɛn go go wit am, bɔt di kiŋ na Siria go kapchɔ am.

¹² Ɛn wɛn i go dɔn kapɔch bɔku bɔku sojaman dɛn, i go fil prawd ɛn kil tawzin tawzin, bɔt stil, i nɔ go win.

¹³ Di kiŋ na Siria go gɛda bɔku bɔku pipul bak we plɛnti pas di las tɛm; afta sɔm ia go dɔn pas, i go kam wit big big ami ɛn bɔku bɔku tin dɛn fɔ it wɛr ɛn fɛt.

¹⁴ “Dɛn tɛm dɛn de, bɔku pipul go de agens di kiŋ na Ijipt; ɛn dɛn man dɛn we lɛk fɛt we de wit una yon pipul dɛn, go mek prawd so dat di vishɔn go kam tru, bɔt dɛn nɔ go ebul.

¹⁵ Dɛn di kiŋ na Siria go kam blɔk blɔk di eria ɛn kapchɔ wan siti we dɛn de gyad gud gud wan. Di ami na Ijipt nɔ go ebul fɛt dɛn; di ami we na pik dɛn pik dɛnsɛf nɔ go ebul fɛt dɛn.

¹⁶ Bɔt di wan we go kam fɛt am, go du wetin in fil fɔ du, ɛn nɔbɔdi nɔ go ebul tinap bifo am; ɛn i go tinap na di land we dɛn de prez pas ɔl, ɛn i go gɛt pawa oba ɔl.

¹⁷ I go mekɔp in maynd fɔ kam wit ɔl di pawa nain wanol kindɔm, ɛn i go briŋ kɔndishɔn dɛn fɔ lɛ pis go de, ɛn i go du wetin dɛn se. I go gi am uman dɛn gyal pikin we fɔ pwɛl di kindɔm; bɔt dat nɔ go wok ɛn in nɔ go bɛnifit am.

¹⁸ Afta dat, i go tɔn in atɛnshɔn to di kɔntri dɛn we de nia wata, ɛn i go kapchɔ bɔku; bɔt wan kɔmanda go tap in fityay; fɔ tru i go tɔn di kiŋ na Siria in fityay bak pan am.

¹⁹ So di kiŋ go tɔn de go bak na di barik nain yon kɔntri, bɔt i go bɔk in fut ɛn fɔdɔm, ɛn dɛn nɔ go si am igen

²⁰ Ɔda pɔsin go tek in ples ɛn in go sɛn pɔsin we go de pik taks mɔni lɛ di kindɔm go bɛtɛ; bɔt insay tru tri de, dɛn go kil am; nɔto bay vɛksteshɔn ɛn nɔto insay fɛt.

Di Bad Kiŋ Na Siria

²¹ Di pɔsin we go tek in ples na sɔmbɔdi we nɔ rɛspɛkt nɔbɔdi ɛn nɔ no bɔn na kiŋ layn; nɔbɔdi nɔ go se i kam fɔ pawa bɔt i go tek swit mɔt tek pawa.

²² I go nyakanyaka bɔku bɔku ami dɛm nain rod kpatakpata; ɛn di rula sɛf we Gɔd pik.

²³ Ɛn frɔm di tɛm we dɛn go mek wanwɔd wit am, i go biev lɛk grin snek na grin gras.

²⁴ Ɛn i go gɛt mɔ pawa wit pipul dɛn we nɔ plɛnti. Di tɛm we nɔbɔdi nɔ de tink, i go kam na di say we jɛntri pas ɔlsay na di kɔntr; ɛn in go du wetin in papa dɛn ɛn in papa dɛn papa dɛn nɔ bin du; i go sheb tin dɛn we dɛn tif tin dɛn we dɛn kapchɔ we dɛn go fɛt, ɛn ɔda tin dɛn gi di pipul dɛn we dɛn bin ebul tek. I go mek plan fɔ pwɛl di barik dɛn, bɔt dat nɔ go las lɔŋ.

²⁵ I go mek wan big big ami we go mek i gɛt pawa ɛn in maynd go de pan di kiŋ na Ijipt; bɔt di kiŋ na Ijipt go fɛt wit wan big pawaful ami, bɔt i nɔ go ebul tinap, bikɔs dɛn go mek difrɛn difrɛn plan dɛn fɔ am.

²⁶ Ivin di wan dɛn we bin de it in gud it go tɔn pan am; dɛn go klia in wanol ami ɛn bɔku go day.

²⁷ As fɔ di tu kiŋ dɛn, na fɔ du bad nɔmɔ go de na dɛn maynd; dɛn go sidɔm na di sem tebul de lay gi dɛnsɛf. Dɛn nɔ go gɛt wetin dɛn want bikɔs di tɛm nɔ kam yet we PAPA GƆD se i fɔ bi.

²⁸ Ɛn i go go bak nain land wit bɔku bɔku tin dɛn, bɔt in at nɔ go pliz wit di oli Kɔvinant. Ɛn i go du wetin in want fɔ du, ɛn go bak nain yon kɔntri.

²⁹ We di tɛm kam we PAPA GƆD se, i go tɔn bak go na di sawt; bɔt dis tɛm nɔ go tan lɛk aw i bin bi fɔstɛm.

³⁰ Bikɔs ship dɛn we kɔmɔt Kitim go kam fɛt am, ɛn i go fred ɛn tɔn bak kɔmɔt de; i go tɔn bak, ɛn i go vɛks bad bad wan ɛn fɛt di oli Kɔvinant. I go tɔn bak ɛn lisin to di wan dɛn we dɔn tɔn dɛn bak pan di oli Kɔvinant.

³¹ In ami dɛn go kam dɛsikret di tɛmpul ɛn di barik, ɛn go tap di bɔn sakrifays we nɔ de tap ɛn du tin we PAPA GƆD nɔ lɛk we go briŋ trɔbul.

³² I go mek swit mɔt to pipul ɛn dɛn go sɔpɔt in wanwɔd we in mek; bɔt di pipul dɛn we no dɛn PAPA GƆD, go tinap traŋa wan ɛn tek akshɔn.

³³ Di wan dɛn we gɛt sɛns pan di pipul dɛm go mek bɔku ɔndastand, ɔlwe dɛn go de kil dɛn wit sɔd ɛn faya, ɛn de mek dɛn slev, ɛn tek ɔl dɛn prɔpati fɔ sɔm tɛm.

³⁴ Wɛn dɛn go de kil dɛn, na tu tri pipul nɔmɔ go ɛp dɛn. Bɔku go mek ipokrit to dɛn lɛk dɛn de wit dɛn;

³⁵ Ɛn dɛn go kil sɔm pan di wan dɛn we gɛt sɛns, bɔt dat go mek di pipul dɛn klin na PAPA GƆD yay, te di tɛm rich bikɔs di tɛm nɔ rich yet.

³⁶ Di kiŋ go de du wetin in want fɔ du. I go mek prawd ɛn mek insɛf big pas ɔl dɛn gɔd, ɛn i go de tɔk strenj tin dɛn agens PAPA GƆD we ay pas ɔl dɛn gɔd. Bɛtɛ go fala am te i satisfay se in dɔn trit di pipul dɛn bad dɔn; bikɔs wetin i plan fɔ du, i mɔs du am.

³⁷ I nɔ go bisin bɔt in papa dɛn gɔd dɛn, ɛn di gɔd we uman dɛn lɛk bad; i nɔ go bisin bɔt ɛni ɔda gɔd, bikɔs i go mek insɛf big pas dɛn ɔl.

³⁸ Bifo i rɛspɛkt di ɔda gɔd dɛn, i go rɛspɛkt di gɔd we de na barik; gɔd we in papa dɛn nɔ no na im i go ɔna wit gold ɛn silva ɛn dayamɔn ɛn dia dia prɛzɛnt dɛn.

³⁹ I go tinap fɔ in traŋa traŋa barik dɛn, ɛn na wan fɔrin gɔd go ɛp am; i go gi big rɛspɛkt to di wan dɛn we gri fɔ am. I go mek dɛn rul oba plɛnti pipul ɛn go sheb land gi dɛn fɔ we dɛn gri fɔ am.

⁴⁰ We di tɛm rich, di kiŋ na di sawt go atak am; bɔt di kiŋ na nɔt go rɔsh pan am lɛk ebi briz wit ɔs ɛn karej ɛn pipul we de rayd ɔs, ɛn wit plɛnti plɛnti ship. I go atak kɔntri dɛn lɛk briz ɛn pas go.

⁴¹ I go kam na di land we dɛn de prez pas ɔl ɛn tɛn tawzin tawzin go day, bɔt dɛn kɔntri dɛn ya go sev: Idɔm ɛn Moab ɛn di men pat pan di Amonayt dɛn kɔntri.

⁴² I go atak sɔm kɔntri dɛn ɛn Ijipt no go go fri.

⁴³ I go bi di pɔsin we de kɔntrol ɔl di jɛntri; di gold ɛn silva ɛn ɔl di tin dɛn we gɛt prayz na Ijipt; afta dat, i go go to Libia ɛn Ithiopia.

⁴⁴ Bɔt nyuz we go kɔmɔt na di ist ɛn na Ijipt go mek i fred, ɛn i go go wit di bad bad vɛksteshɔn fɔ kil ɛn nyakanyaka ɔmɔs i ebul.

⁴⁵ Ɛn i go mek in tɛnt dɛm, we i go tap lɛk kiŋ, bitwin di si ɛn di oli mawnten we dɛn de prez pas ɔl; bɔt pan ɔl dat, i go rich in watalo ɛn nɔbɔdi nɔ go ɛp am.