Lɛta Fɔ Kɔlɔse 4 - Krio Fɔs Oli Baybul

¹ Una dɛn masta, una fɔ de du wetin rayt ɛn gud to di pipul dɛn we de wok fɔ una. Una fɔ mɛmba se unasɛf gɛt Masta we de na ɛvin.

Pɔl Tɔk Wetin Dɛn Fɔ Du

² Una fɔ de pre ɔltɛm; una fɔ put una at pan dɛn tin we una de tɛl Gɔd ɛn una fɔ de tɛl am tɛnki.

³ Ɛnitɛm we una de pre, una pre fɔ wi, so dat Gɔd go gi wi chans fɔ tɛl pipul in mɛsej bɔt Krays, we di pipul dɛn nɔ bin yɛri yet. A de na jel naw bikɔs a de tɛl pipul dis mɛsej ya.

⁴ Una pre fɔ mi, so dat a go ebul tɔk dis mɛsej ya lɛkɛ aw a fɔ du so dat pipul go ɔndastand am.

⁵ Wɛn una de wit dɛn pipul we nɔ biliv pan Krays, una fɔ du ɔltin wit sɛns. Ɛni chans we una gɛt, una fɔ tɛl dɛn di Gud Nyuz.

⁶ Wɛn una de tɔk wit pipul, una fɔ tɛl dɛn tin we go mek dɛn gladi fɔ yɛri wetin una de tɔk ɛn we go mek dɛn want fɔ yɛri mɔ, ɛn una fɔ no aw fɔ ansa ɔlman.

Pipul de Tɛl Adu

⁷ Taychikɔs go tɛl una ɔl wetin de bi to mi; na Kristiɛn lɛkɛ wisɛf, ɛn insɛf de wok fɔ di Masta; wi lɛk am ɛn wi trɔs am.

⁸ A de sɛn am go to una so dat wɛn i tɛl una wetin de bi na ya, dat go kɔrej una.

⁹ Wan ɔda Kristiɛn, Onɛsimɔs, we wi lɛk ɛn we wi trɔs, go fala Taychikɔs go to una; na wan pan una. In ɛn Taychikɔs go tɛl una ɔl wetin de bi na ya.

¹⁰ Aristakɔs, we de na jel wit mi, ɛn Mak, we na Banabas in kɔzin tɛl una adu. (A bin dɔn sɛn tɛl una se, wɛn Mak go to una, una fɔ mek i tap to una).

¹¹ Jɔshwa, we sɔm pipul de kɔl Jɔstɔs, insɛf de tɛl una adu. Pan ɔl dɛn wan we de wok wit mi, di tri pipul dɛn we a jɛs tɔk bɔt, na dɛn nɔmɔ na Ju we dɔn biliv pan Krays ɛn dɛn de wok wit mi fɔ mek Gɔd go rul di wɔl. Dɛn dɔn kɔrej mi plɛnti.

¹² Ɛpafras, we na wan pan una, ɛn we de wok fɔ Jizɔs lɛkɛ unasɛf, insɛf de tɛl una adu. I de pre fɔ una wit ɔl in at; i de pre mek una nɔ tap fɔ biliv pan Gɔd, mek una shɔ bɔt wetin una biliv, mek una no ɔl wetin una fɔ no bɔt Gɔd, ɛn mek una du ɔl wetin Gɔd want una fɔ du.

¹³ A no se Ɛpafras dɔn wok traŋa fɔ ɛp una ɛn dɛn pipul na Laodisya ɛn Iarapolis.

¹⁴ Lyuk, da dɔkta we wi lɛk, ɛn Dimas, dɛnsɛf tɛl una adu.

¹⁵ Una tɛl di chɔch pipul dɛn na Laodisya, wit Nimfa ɛn dɛn chɔch pipul we de mit nain os, adu.

¹⁶ Wɛn una dɔn rid dis lɛta ya dɔn, una mek dɛn rid am to di chɔch mɛmba dɛn na Laodisya. Unasɛf fɔ rid di lɛta we a bin dɔn rayt ɛn sɛn to di chɔch mɛmba dɛn na Laodisya.

¹⁷ Una tɛl Akipɔs se i fɔ si dat i du ɔl di wok we di Masta dɔn gi am fɔ du.

¹⁸ Na misɛf yon an a de tek rayt dis pat: “Na mi, Pɔl, de tɛl una adu.” Una nɔ fɔgɛt se a de na jel! A de pre mek Gɔd sho una aw i gud.