Lɛta Fɔ Kɔlɔse 2 - Krio Fɔs Oli Baybul

¹ A want mek una no aw a wok traŋa fɔ una ɛn fɔ dɛn Kristiɛn na Laodisya ɛn fɔ ɔl dɛn ɔda pipul we nɔ no mi yet bikɔs dɛn nɔ mit mi yet.

² Di tin we mek a want du so na fɔ mek dɛn gɛt kɔrej ɛn mek dɛn ɔl gɛt wan at ɛn lɛk dɛn kɔmpin mɔ ɛn mɔ. Dat go mek dɛn ɔndastand wetin tru gud gud ɛn dɛn go biliv fɔ shɔ, dɛn nɔ go dawt igen. Na so dɛn go tek no wetin Gɔd bin ayd frɔm dɛn, dat na Krays insɛf.

³ Nain de mek pipul no di sɛns we Gɔd gɛt ɛn ɔl dɛn wɔndaful tin we i sabi, we nɔbɔdi nɔ bin dɔn no fɔstɛm.

⁴ So una nɔ mek ɛnibɔdi agyu wit una ɛn tek lay mek una ful, ilɛk sɛf i tan lɛkɛ se na tru dɛn de tɔk.

⁵ Pan ɔl we a nɔ de wit una mi at de wit una. A gladi fɔ si se una ɔl gɛt wan at pan di biliv we una biliv pan Krays ɛn una mekɔp traŋa wan se nɔbɔdi nɔ go ebul mek una tap fɔ biliv pan am.

Una Go Gɛt Gud Gud Layf Wɛn Una Gɛt Wanwɔd wit Jizɔs Krays

⁶ We una dɔn gri mek Jizɔs Krays bi una Masta, una fɔ gɛt wanwɔd wit am ɔltɛm.

⁷ We una liv, una fɔ fasin pan am lɛkɛ aw rut de fasin na grɔn, nain fɔ bi di fawndeshɔn na una layf, una fɔ de abop pan am mɔ ɛn mɔ lɛk aw dɛn bin dɔn lan una fɔ du. Pantap dat, una fɔ de tɛl Gɔd tɛnki ɔltɛm.

⁸ Una luk shap, mek nɔbɔdi nɔ mek una ful ɛn tɔn una lɛkɛ slev wit in yon mɔtalman sɛns we nɔ min natin; di tin dɛn we dɛn pipul ya de tɔk na wetin dɛn lɔntɛm pipul bin de lan pipul, ɛn na dɛn spirit we de rul dis wɔl mek dɛn no dɛn tin ya. Dɛn tin ya nɔ kɔmɔt to Krays.

⁹ Gɔd insɛf bin de insay Krays, pan ɔl we Krays na bin mɔtalman,

¹⁰ ɛn una dɔn gɛt di tru layf we una dɔn gɛt wanwɔd wit Krays. Krays de rul oba ɔl dɛn spirit we de rul ɛn we gɛt pawa.

¹¹ We una gɛt wanwɔd wit Krays, una dɔn sakɔmsayz, ɛn di sakɔmsayz we una dɔn sakɔmsayz nɔto di sakɔmsayz we mɔtalman de sakɔmsayz, bɔt na di sakɔmsayz we Krays de sakɔmsayz, dat na we i de mek sin nɔ gɛt pawa oba una.

¹² Wɛn dɛn baptayz una, i bin jɛs tan lɛkɛ se dɛn bɛr una wit Krays, ɛn i bin tan lɛkɛ se Gɔd we mek Krays rayz frɔm di grev wit in pawa bin mek unasɛf rayz frɔm di grev, bikɔs una biliv se i gɛt pawa fɔ du ɔltin.

¹³ Tɛm bin de we i bin tan lɛkɛ se una bin dɔn day, bikɔs una bin de pan sin ɛn una bin tan lɛkɛ dɛn pipul we nɔto Ju we nɔ gɛt di Lɔ we Gɔd gi Mozis. Bɔt naw we una dɔn gɛt wanwɔd wit Krays, Gɔd dɔn gi una di tru layf. Gɔd dɔn padin ɔl wi sin dɛn.

¹⁴ Gɔd dɔn ires dɛn dɛt we wi bin gɛt fɔ pe, ɛn dɛn lɔ we bin mek wi tan lɛkɛ slev fɔseka di dɛt dɛn. Gɔd pwɛl dɛn we i nel dɛn pan Krays in krɔs.

¹⁵ Wɛn Krays bin de na di krɔs, i bin mek dɛn spirit we bin de rul, tap fɔ rul; we i dɔn win dɛn, i mek dɛn waka lɛkɛ slev biɛn am ɛn mek ɔlman si dɛn.

¹⁶ So una nɔ mek ɛnibɔdi tɛl una wetin una fɔ it ɔ wetin una fɔ drink; us pati kla de dɛn pan di ia fɔ pre to Gɔd; us de pan di mɔnt fɔ mek sɔntin fɔ mɛmba di nyu mun; us de pan di wik fɔ pre ɛn blo.

¹⁷ Ɔl dɛn lɔ ya na shado we de sho wetin de kam, bɔt di bɔdi insɛf na Krays.

¹⁸ Una nɔ mek ɛnibɔdi we se in bɛtɛ pas una bikɔs Gɔd de mek i si tin dɛn na vishɔn, tɛl una se una nɔ de du rayt. Dɛn pipul ya de pin se pipul fɔ de fast ɛn dɛn fɔ de pre to enjɛl. Pipul lɛkɛ dɛn wan ya jɛs de mek prawd fɔ natin, na aw dɛn de tink wit dɛn yon mɔtalman sɛns de mek dɛn fil prawd.

¹⁹ Pipul lɛkɛ dɛn wan ya dɔn tap fɔ biliv pan Krays we na di ed fɔ di bɔdi, dat na di chɔch. Na Krays de kɔntrol di bɔdi. I de fid am fɔ mek i gro, i mek ɔl di difrɛn pat dɛn jɔyn to dɛn kɔmpin ɛn fasin gud, ɛn di bɔdi de gro lɛkɛ aw Gɔd want mek i gro.

Una Tru Layf de wit Krays

^20-21 I jɛs tan lɛkɛ se wɛn Krays day, unasɛf day, so dɛn spirit we de rul di wɔl nɔ de rul una igen. So wetin mek una de du lɛkɛ di pipul dɛn na wɔl? Wetin mek una de fala dɛn lɔ ya we se, “Nɔ tɔch dis it ya,” “Nɔ tes da wande,” “Nɔ tek da wande fɔ it am?”

²² Ɔl dɛn tin ya we di lɔ se nɔ fɔ it ɔ drink go dɔn wɛn pɔsin it dɛn ɔ drink dɛn. Na mɔtalman mek dɛn lɔ ya we dɛnsɛf de lan pipul.

²³ Fɔ tru, i tan lɛkɛ se dɛn pipul we bin mek dɛn kayn lɔ ya bin gɛt sɛns, bikɔs dɛn se paopa pipul fɔ pre to enjɛl, dɛn bin de mek lɛkɛ se dɛn nɔ prawd ɛn dɛn se pɔsin fɔ sɔfa. Bɔt dɛn lɔ ya nɔ de ɛp pipul fɔ kɔntrol wetin dɛn at gi dɛn fɔ du, dat sho se di pipul dɛn we mek dɛn, nɔ gɛt sɛns.