Lɛta Fɔ Kɔlɔse 1 - Krio Fɔs Oli Baybul

¹ Na mi Pɔl we Gɔd pik fɔ bi Jizɔs Krays in apɔsul lɛkɛ aw i want, ɛn Timoti we na wi Kristiɛn brɔda, de sɛn dis lɛta.

² A de rayt dis lɛta to di Kristiɛn dɛn na Kɔlɔse, we tru to Gɔd ɛn we gɛt wanwɔd wit Krays lɛkɛ wisɛf. Mek Gɔd we na wi Papa blɛs una ɛn gi una kol at.

Pɔl Tɛl Gɔd Tɛnki

³ Ɔltɛm we wi de pre fɔ una, wi kin tɛl Gɔd, we na wi Masta Jizɔs Krays in Papa, tɛnki.

⁴ Wi de tɛl Gɔd tɛnki bikɔs wi yɛri se una biliv pan Jizɔs Krays ɛn una lɛk ɔl Gɔd in pipul dɛn.

⁵ Di fɔs tɛm we dɛn tɛl una di Gud Nyuz we na tru, una no se Gɔd kip gud tin fɔ una na ɛvin; ɛn we una de wet fɔ da gud tin de we una no fɔ shɔ se una go gɛt, dat mek una biliv pan Krays mɔ ɛn lɛk Gɔd in pipul dɛn.

⁶ Di Gud Nyuz de prɛd ɔlɔbɔt na wɔl ɛn i de mek pipul gɛt blɛsin, jɛs lɛkɛ aw i rich una ɛn i de blɛs una frɔm di de we una yɛri ɛn ɔndastand fɔ tru aw Gɔd lɛk una ɛn aw i gud to una.

⁷ Ɛpafras, we wi lɛk, ɛn we de du Krays in wok de fɔ wi, nain bin tɛl una aw Gɔd lɛk una ɛn aw i gud to una. I siriɔs pan di wok we i de du fɔ Krays. I bin de ɛp wi fɔ tɛl una di Gud Nyuz.

⁸ I dɔn tɛl wi aw Gɔd in Spirit de mek una lɛk una kɔmpin Kristiɛn dɛn.

⁹ Na dat mek frɔm di de we wi yɛri bɔt una, wi de pre fɔ una ɔltɛm. Wi de aks Gɔd mek in Spirit gi una sɛns ɛn mek una sabi bɔt am, so dat una go no wetin Gɔd want una fɔ du, ɛn una nɔ go dawt.

¹⁰ Dat go mek una ebul du wetin di Masta want, ɛn ɔltɛm una go de du di tin we go mek i gladi; una go de du ɔl kayn gud wok, ɛn una go de no mɔ ɛn mɔ bɔt Gɔd.

¹¹ A de pre mek Gɔd mek in wɔndaful pawa mek una gɛt maynd so dat una go ebul bia ɔltin.

¹² Una fɔ gladi ɛn tɛl wi Papa tɛnki fɔ we i mek una bi pipul we fit fɔ gɛt pan di tin we i dɔn prɔmis fɔ gi in pipul dɛn we i de rul ɛn we de na layt.

^13-14 I pul wi kɔmɔt pan sin we bin gɛt pawa oba wi ɛn we bin mek wi de na dak ɛn i briŋ wi kam ɔnda in Pikin we i lɛk bad, in pawa. Na Gɔd in Pikin dɔn pul wi kɔmɔt ɔnda sin in pawa, dat na we i dɔn padin wi.

Krays ɛn di Wok we I Du

¹⁵ Krays we pipul dɔn si, nain mek wi no aw Gɔd, we wi nɔ de si, tan. Nain fɔs bin de bifo Gɔd mek ɛnitin we de na di wɔl.

¹⁶ Tru Krays, Gɔd mek ɔl wetin de na ɛvin ɛn dis wɔl, dɛn tin we wi de si ɛn dɛn wan we wi nɔ de si; ivin dɛn spirit sɛf we gɛt pawa ɛn we de rul. Tru Krays, Gɔd mek ɔltin we de na ɛvin ɛn dis wɔl ɛn ɔltin de fɔ ɔna Krays.

¹⁷ Krays bin dɔn de bifo Gɔd mek ɛnitin ɛn na Krays de mek ɔltin na di wɔl de na di ples we dɛn fɔ de.

¹⁸ Krays na di ed pan di bɔdi, we na di chɔch; nain de gi di bɔdi layf. Krays na Gɔd in fɔs Pikin we Gɔd mek rayz frɔm di grev, so dat in wangren go de oba ɔltin ɛn ɔlman.

¹⁹ Gɔd gladi fɔ mek in Pikin gɛt ɔl wetin insɛf gɛt.

²⁰ Na Krays Gɔd go mek briŋ ɔltin we de na dis wɔl ɛn we de na ɛvin kam bak to insɛf. Na tru di day we Krays day na di krɔs, Gɔd mek mɔtalman ebul kam to insɛf.

²¹ Una nɔ bin de klos Gɔd ɛn una nɔ bin lɛk am; di tin dɛn we una bin de du ɛn tink bin mek una nɔ lɛk am.

²² Bɔt we Gɔd in Pikin kam day na di krɔs, dat dɔn mek una bi Gɔd in padi dɛn, so dat di tɛm we una go tinap bifo am una nɔ go gɛt fɔlt, i nɔ go blem una fɔ ɛnitin.

²³ Na so i go bi if una stil biliv di Gud Nyuz ɛn una nɔ dawt Gɔd. Una nɔ fɔ gri mek ɛnibɔdi mek una lɛf fɔ abop pan di tin we di Gud Nyuz we una dɔn yɛri mek una abop pan. Mi yon wok na fɔ tɛl una di Gud Nyuz we ɔlman na wɔl dɔn yɛri.

Pɔl de Wok fɔ di Kristiɛn dɛn na di Chɔch

²⁴ A gladi naw we a de sɔfa fɔ una, bikɔs di pen we a de sɔfa naw na pat pan di sɔfa we Krays bin sɔfa fɔseka in bɔdi we na di chɔch, ɛn we pipul stil gɛt fɔ sɔfa.

²⁵ Na fɔ wok fɔ di Kristiɛn dɛn Gɔd pik mi fɔ ɛp una ɛn fɔ tɛl una ɔl di mɛsej we i gi mi.

²⁶ Bifo naw, ɔl di tɛm, Gɔd nɔ bin mek ɛnibɔdi na wɔl no dis mɛsej ya, bɔt i dɔn tɛl in yon pipul dɛn naw.

²⁷ Gɔd mekɔp fɔ mek in yon pipul dɛn no dis wɔndaful, wɔndaful mɛsej we nɔbɔdi nɔ bin no fɔs tɛm, ɛn i mekɔp fɔ mek ɔlman yɛri am. Dis wɔndaful tin ya na we Krays de insay una at ɛn dat go mek una de wit Gɔd di say we i de rul.

²⁸ Na bɔt Krays wi de tɛl ɔlman. Wit ɔl di sɛns we Gɔd gi wi, wi de tɛl dɛn wetin nɔ fɔ du ɛn lan dɛn wetin fɔ du, so dat ɔlman go no ɔl wetin Gɔd want dɛn fɔ du, dɛn go want du am wit ɔl dɛn at, ɛn dɛn go gɛt wanwɔd wit Krays.

²⁹ Na di tin dis we a de swɛt fɔ du, ɛn a de yus di pawa we de insay mi, we Krays gi mi, we mek a ebul du wetin a de du so.