Ayzaya 66 - Krio Fɔs Oli Baybul

PAPA GƆD Jɔj Di Neshɔn Dɛm

¹ Na dis PAPA GƆD se: “Ɛvin na mi tron ɛn di ath na mi fut rɛst: uskayn os una go bil fɔ mi, ɛn uskayn ples a go tap?

² PAPA GƆD se, Ɔl dɛn tin ya na mi mek dɛm, so ɔl dɛn tin ya na mi yon. Bɔt na dis kayn man a go luk to, man we ɔmbul ɛn de ripɛnt ɛn de trimbul we dɛn yɛri mi wɔd.

³ “Di pɔsin we de kil kaw na lɛk pɔsin we kil mɔtalman; pɔsin we de sakrifays ship pikin na lɛk udat brok dɔg nɛk; pɔsin we de mek sid ɔfrin na lɛk pɔsin we de sakrifays ɔg blɔd; pɔsin we de mek sakrifays wit insɛns fɔ mɛmba wetin bin dɔn bi, na lɛk pɔsin we de blɛs lay lay gɔd. Dɛn dɔn pik dɛn yon we, we dɛn want fɔ de, dɛn sol de gladi fɔ du dɛn bad bad tin dɛm we PAPA GƆD nɔ lɛk.

⁴ Misɛf igen go pik siknɛs ɛn waala fɔ dɛm ɛn mek di tin dɛn we dɛn de fred, mit dɛm; bikɔs, wɛn a bin kɔl dɛm, nɔbɔdi nɔ ansa, wɛn a bin tɔk, dɛn nɔ lisin; bɔt dɛn du tin dɛn we ivul na mi yay.”

⁵ Una yɛri PAPA GƆD in wɔd yu we de trimbul we yu yɛri in wɔd: ‘Yu brɔda dɛn we et yu ɛn trowe yu na do fɔseka mi nem dɔn se, “Lɛ PAPA GƆD tek glori so dat wi go si se yu gladi’; bɔt na dɛn go shem.

⁶ Una lisin, ala ala de na di siti! Vɔys de kɔmɔt na di tɛmpul! Na PAPA GƆD in vɔys, I de pe in ɛnimi dɛn bak!

⁷ Bifo I go into lɛbɔ so I dɔn bɔn; bifo pen ol am so I dɔn bɔn bɔypikin.

⁸ Udat dɔn yɛri tin lɛk dat wande? Udat dɔn si tin lɛk dat wande? Kɔntri go mek insay wande? Dɛn go ebul mek wanol neshɔn insay wan minit? Bikɔs as Zayɔn go into lebɔ so I bɔn in bɔypikin dɛm.

⁹ PAPA GƆD aks se, A fɔ opin di wumb ɛn nɔ mek i bɔn? Mi we de mek uman bɔn fɔ lɔk di wumb? Na so una Gɔd aks.

¹⁰ “Una gladi wit Jerusɛlɛm ɛn una gladi fɔ am, una ɔl we lɛk am; gladi wit am fɔr in jɔy, una ɔl we de sɔri fɔ am;

¹¹ so dat una go sɔk ɛn satisfay wit in bɔbi we de bayo bayo; so dat una drink gud wit ɛnjɔymɛnt kɔmɔt nain glori we i gɛt abɔmpa.”

¹² Bikɔs na di PAPA GƆD se; “A de tɛl una, a go mek prɔspɛriti go to am lɛk riva, ɛn di neshɔn dɛn jɛntri go to am lɛk riva we de ova flo; ɛn una go sɔk, ɛn i go tot una nain fut ɛn mek una dans nain ni.

¹³ Lɛk pikin we in mami de bayo bayo, na so a go bayo bayo una; una go gɛt kɔnfɔt na Jerusɛlɛm.

¹⁴ Una go si ɛn una go gladi; una bon dɛm go ɛlti lɛk gras; ɛn dɛn go no se PAPA GƆD de blɛs in wokman dɛm ɛn in wamat na pan in ɛnimi dɛm.

¹⁵ “Bikɔs, PAPA GƆD go kam wit faya, ɛn in chariɔt dɛn go kam lɛk tinada, fɔ pul in bad bad wamat wit vɛksteshɔn, ɛn kɔrɛkt pipul wit faya.

¹⁶ Bikɔs na wit faya PAPA GƆD go kɛriawt jɔjmɛnt; ɛn wit in sɔd pan ɔlman na wɔl; ɛn di wan dɛn we PAPA GƆD kil go plɛnti.

¹⁷ PAPA GƆD se, ɔl dɛn wan dɛn we de mek dɛnsɛf klin na dɛn lay lay gɔd dɛn yay fɔ go insay dɛn gadin, de it ɔg bif, dɛn insɛkt dɛn we de pwɛl fam ɛn arata, go day togɛda.

¹⁸ Bikɔs a no wetin dɛn de du ɛn aw dɛn kin tink, ɛn a de kam gɛda ɔl di neshɔn ɛn difrɛn laŋwej dɛm; ɛn dɛn go kam, ɛn dɛn go si mi glori;

¹⁹ Ɛn a go put wan sayn to dɛn. Ɛn a go sɛn di wan dɛn we nɔ day pan dɛn go na difrɛn neshɔn dɛm, dat na Tashish, Tubal ɛn Javan, to dɛn fa fawe kɔntri dɛn we de nia si, ɛn nɔ yɛri bɔt mi yet ɛn nɔ si mi glɔri yet; na dɛn go go tɛl dɛn bɔt mi glɔri.

²⁰ Ɛn dɛn go briŋ ɔl una brɔda dɛn kɔmɔt na ɔl di neshɔn dɛm lɛk ɔfrin to PAPA GƆD, pan ɔs ɛn pan chariɔt dɛm, insay Karavan ɛn pan dɔŋki ɛn kamɛl go na mi oli mawnten Jerusɛlɛm, jɛs lɛk aw di Izrɛlayt dɛn de briŋ sid ɔfrin na klin plet na PAPA GƆD in os. Na so PAPA GƆD se.

²¹ PAPA GƆD se, “na sɔm pan dɛm bak a go tek mek di man we de mek sakrifays fɔ pipul sin, ɛn livayt dɛm”.

²² PAPA GƆD se, “Bikɔs, lɛk we di nyu skay dɛm ɛn di nyu ath we a go mek go de bifo mi sote go, na so yu jɛnareshɔn ɛn yu nem go de.

²³ Frɔm nyu mun to nyu mun, ɛn frɔm de fɔ blo ɛn rɛst to de fɔ blo ɛn rɛst, ɔlman go kam wɔship mi. Na so PAPA GƆD se.

²⁴ “Ɛn dɛn go kɔmɔt go, go luk di man dɛn we tɔn dɛn bak pan mi dɛn dedebɔdi dɛm; bikɔs dɛn tumbu nɔ go day, dɛn faya nɔ go ɔt. Nɔbɔdi nɔ go gladi fɔ si dɛm.