Ayzaya 61 - Krio Fɔs Oli Baybul

Di Gud Yus We Na Dilivrans

¹ Papa Gɔd we na Gɔd in Spirit de pan mi, bikɔs PAPA GƆD dɔn anɔynt mi fɔ briŋ gud yus to di wan dɛn we de sɔfa; I dɔn sɛn mi fɔ mɛn dɛn wan we gɛt brok at, fɔ anawns to dɛn wan we dɛn bin dɔn kapchɔ, se, dɛn dɔn fri, fɔ opin di jel yad fɔ di wan dɛn we dɛn tay;

² fɔ anawns se dis na di ia fɔ PAPA GƆD in fevɔ, ɛn di de we wi Gɔd go rivɛnj; fɔ koks ɔl udat at de blid;

³ fɔ gi dɛn wan dɛn na Zayɔn we dɛn at de blid– fɔ gi dɛn galans instɛd ɔf ashis, gladi gladi ɔyl, instɛd ɔf at we de blid, Prez ova kot instɛd ɔf taya bɔdi; so dat dɛn go kɔl dɛn di kɔtintri fɔ waka tret na PAPA GƆD in yay, di tin we PAPA GƆD plant, mek I go gɛt glori.

⁴ Dɛn go bil dɛn ol ol ples we bin dɔn brok brok, dɛn go bil na say dɛn we bin dɔn pwɛl pwɛl bad bad wan; dɛn go mek di siti dɛn we bin dɔn pwɛl bak, we bin dɔn pwɛl bad bad wan lɔlɔntɛm.

⁵ Trenja dɛm go tinap fid una ship ɛn got dɛm, Fɔrina dɛn go dig una fam ɛn sibɔt una greps gadin dɛm;

⁶ Bɔt dɛn go kɔl una PAPA GƆD in man we de mek sakrifays fɔ pipul sin dɛm, pipul dɛn go tɔk bɔt una se una na wi GƆD in minista dɛm; una go it di neshɔn dɛn jɛntri, ɛn una go ɛnjɔy insay dɛn jɛntri.

⁷ Bifo una shem, na dɔbul blɛsin una go gɛt, Bifo una disgres, na gladi una go jɛs de gladi; gladi pan wetin na dɛn yon; fɔseka dat, na dɔbul blɛsin una go gɛt na una land ɛn una gladi go de sote go.

⁸ Bikɔs, mi we na PAPA GƆD lɛk jɔstis, A et tif ɛn fɔ de du rɔŋ tin; A go mɔs pe dɛn bak, ɛn a go mek Kɔvinant we go de sote go, wit dɛm.

⁹ Dɛn go no dɛn jɛnareshɔn dɛn na di neshɔn dɛm, ɛn di difrɛn difrɛn pipul dɛm na di wɔl, go no dɛn pikin dɛm; ɔl udat si dɛm go no dɛn se, na dɛn na di pipul dɛn we PAPA GƆD dɔn blɛs.

¹⁰ A go gladi ebi ebi wan fɔ PAPA GƆD, mi sol go es mi Gɔd ɔp; bikɔs i dɔn wɛr salveshɔn klos pan mi, I dɔn kɔba mi wit raychɔsnɛs gawn, lɛk aw dɛn ɔkɔ kin put plɛnti plɛnti galans pan insɛf, ɛn lɛk we yawo kin drɛs insɛf wit in riŋ ɛn chen dɛm.

¹¹ Bikɔs, lɛk aw yɔŋ plant de bɔs kɔmɔt na grɔn, ɛn lɛk aw gadin de mek wetin dɛn plant insay am, bɔs kam ɔp, na so Papa Gɔd we na Gɔd go mek raychɔsnɛs ɛn prez bɔs bifo ɔl di neshɔn dɛm.