Ayzaya 60 - Krio Fɔs Oli Baybul

Jerusɛlɛm In Glori We I Go Gɛt

¹ Grap ɛn shayn; bikɔs yu layt dɔn kam, ɛn PAPA GƆD in glori dɔn kam pan yu.

² Bikɔs, daknɛs go kɔba di wanol wɔl, ɛn tik daknɛs go kɔba di neshɔn dɛm; bɔt PAPA GƆD go kam pan yu, ɛn dɛn go si in glori pan yu.

³ Neshɔn dɛm go kam to yu layt, ɛn kiŋ dɛn to di brayt layt we go de sho pan yu.

⁴ Es yu yay ɔp luk rawnd yu, lɛ yu si fɔ yusɛf; dɛn ɔl dɔn gɛda togɛda, dɛn kam to yu; Yu bɔypikin dɛn go kɔmɔt fawe kam, ɛn dɛn go tot yu gyal pikin dɛn na an.

⁵ Dɔn yu go si ɛn go shayn, yu at go pliz ɛn gladi pasmak, bikɔs dɛn go gi yu di beberebe tin dɛn we de na di si, di neshɔn dɛn jɛntri go kam to yu.

⁶ Nɔto kɔmɔn kamɛl go ful yu land, yɔŋ kamɛl dɛn na Midian ɛn Ɛfa; ɔl dɛn wan dɛm na Shiba go kam. Dɛn go briŋ gold ɛn churay, ɛn dɛn go anawns PAPA GƆD in prez.

⁷ Dɛn go gɛda ɔl Kɛda in got ɛn ship dɛn kan to yu, di manship dɛn na Nɛbayɔth, go sav yu; dɛn go kam ɔp na mi ɔlta ɛn a go gri fɔ dɛm, ɛn a go mek dis mi os we gɛt glori gɛt mɔ glori.

⁸ Udat dɛn wan ya we de flay lɛk klawd, ɛn lɛk dɔv dɛn we de flay go na dɛn winda?

⁹ Bikɔs dɛn kɔntri dɛn we de na di si, go wet fɔ mi, Tashish in ship dɛn fɔs, fɔ briŋ yu bɔypikin dɛn kɔmɔt fa, ɛn dɛn silva ɛn gold kam wit dɛn, fɔseka PAPA GƆD we na yu Gɔd, in nem; ɛn fɔ di Oli Wan na Izrɛl, bikɔs, i dɔn mek yu de shayn.

¹⁰ Fɔrina dɛn go bil yu wɔl dɛm, ɛn dɛn kiŋ dɛn go sav yu; bikɔs na we a vɛks a bin bit yu, bɔt bikɔs a fevɔ yu, a bin dɔn fɔgiv yu.

¹¹ Yu get dɛn go opin ɔltɛm; de ɛn nɛt, dɛn nɔ go lɔk; so dat pipul dɛn go briŋ dɛn neshɔn dɛn jɛntri kam to yu, wit dɛn kiŋ dɛn ɔl na di prosɛshɔn.

¹² Bikɔs di neshɔn ɛn di kindɔm we nɔ gri sav, yu go pɛrish; Dɛn neshɔn de go distrɔy kpatakpata.

¹³ Libanɔn in glori go kam to yu, di sayprɛs tik, plen tik ɛn payn tik, fɔ kam byutifay di ples fɔ wɔship mi; ɛn a go mek di ples fɔ mi fut gɛt glori.

¹⁴ Dɛn wan dɛn we bin de sɔprɛs yu, dɛn bɔypikin dɛn go kam de dɔbalɛ to yu, ɔl dɛn wan dɛn we nɔ tek yu mek natin go butu na yu fut; dɛn go kɔl yu, PAPA GƆD in Siti, di Oli Wan na Izrɛl in Zayɔn.

¹⁵ Pan ɔl we dɛn bin dɔn fɔsek yu, ɛn nɔbɔdi nɔ de pas insay yu, A go mek yu lɛk kiŋ sote go, ples fɔ gladi fɔ, insay ɔl di jɛnareshɔn dɛn.

¹⁶ Yu go sɔk dɛn neshɔn dɛn milk, yu go sɔk kiŋ dɛn bɔbi; ɛn yu go no se Mi, na PAPA GƆD, mi na yu seviɔ ɛn yu Ridima, Jekɔb in Mayti Wan.

¹⁷ Usay na bras, a go briŋ gold, ɛn usay na ayɛn, a go briŋ silva; usay na wud, bras, usay na ston, ayɛn. A go mek kol at bi yu ovasia dɛn, ɛn raychɔsnɛs, bi di wan dɛn we de gi pipul wok fɔ du.

¹⁸ Dɛn nɔ go yɛri bɔt fɛt fɛt na yu land igen, wahala ɛn distrɔkshɔn nɔ go de insay yu bɔda dɛn igen; yu go kɔl yu wɔl dɛn, Salveshɔn, ɛn kɔl yu get dɛn, prez.

¹⁹ Dis san nɔ go gi yu layt igen de tɛm, fɔ mek di ples brayt di mun sɛf nɔ go sho yu layt na nɛt; bɔt na PAPA GƆD go bi yu layt we go las sote go, ɛn yu Gɔd go bi yu glori.

²⁰ Yu san nɔ go go dɔŋ igen, ɛn yu mun sɛf naɔ go ayd insɛf; bikɔs na PAPA GƆD go bi yu layt we go las sote go, ɛn yu tɛm fɔ fil sɔri, go tap.

²¹ Yu pipul dɛn ɔl go waka tret na PAPA GƆD in yay; di land go blant dɛn sote go, di yɔŋ wan dɛn we bɔs pan di plant we plant, di tin dɛn we na misɛf du, mek a go gɛt glori.

²² Di las wan go bi ɛkstɛndɛd famili, ɛn di wan we smɔl pas ɔl go bi wan big big neshɔn; Mi na PAPA GƆD; we di tɛm rich, A go mekes du am.