Ayzaya 59 - Krio Fɔs Oli Baybul

Di Prɔfɛt Kɔndɛm Di Pipul dɛn Sin

¹ Luk, PAPA GƆD in an nɔ shɔt fɔ mek I nɔ ebul sev; ɔ in yes nɔ kɔk we I nɔ go ebul yɛri;

² bɔt una sin dɛn dɔn mek sɛpreshɔn bitwin una ɛn una Gɔd, ɛn una sin dɛn dɔn ayd in fes pan una we mek I nɔ de yɛri.

³ Bikɔs una an dɛn dɔti wit blɔd ɛn yu fiŋa dɛn, wit sin; una lip dɛn dɔn tɔk laylay tɔk dɛn, dɔn una tɔŋ de tɔk wikɛd wikɛd tin dɛn.

⁴ Nɔbɔdi nɔ de kɛr pɔsin go kot we i nɔ gɛt bakin, nɔbɔdi nɔ de kɛr pɔsin go kot ɔnɛs wan; dɛn kin abop pan ɛmti pli, ɛn kin lay, dɛn kin plan na dɛn maynd fɔ du bad, bɔt na sin dɛn kin kɔmit

⁵ Dɛn ach snek eg dɛn, dɛn wiv spayda wɛb; udat it dɛn eg go day, ɛn pan wan we dɛn brok, na pikin snek de kɔmɔt.

⁶ Pɔsin nɔ go ebul wɛr spaydawɛb fɔ klos ɛn mɔtalman nɔ go ebul kɔba insɛf wit wetin dɛn kin mek. Dɛn wok dɛn na sinful wok ɛn na fɔ du bad de na dɛn an.

⁷ Dɛn de rɔn fɔ go du bad, ɛn de mekes fɔ shɛd inosɛnt blɔd; na fɔ kɔmit sin nɔmɔ de na dɛn at, na ɛmtinɛs, ɛn fɔ distrɔy, de na dɛn ay we dɛn.

⁸ Dɛn nɔ no di rod fɔ fɛn kolat, ɛn jɔstis nɔ de na dɛn pan ɔl wetin dɛn de du; dɛn dɔn mek dɛn rod dɛn bɛn bɛn, ɛn nɔbɔdi we de wit dɛn, nɔ gɛt kolat.

Di Pipul Dɛn Kɔnfɛs Dɛn Sin

⁹ Fɔseka dat, jɔstis nɔ de nia wi, ɛn fɔ waka tret na PAPA GƆD in yay, nɔ de rich wi; we luk fɔ layt, bɔt na daknɛs wi si, ɛn fɔ braytnɛs, bɔt na dak wi de waka.

¹⁰ Wi de fil fil di wɔl dɛn lɛk blɛn yay, waka de fil fil lɛk dɛn wan we nɔ gɛt yay; we de bɔkfut sansan tɛm lɛk aw dɛn de bɔk fut na nɛt, we wi de wit dɛn wan we get ɛnaji, wi kin tan lɛk dayman.

¹¹ Wi ɔl de grɔmbul lɛk dɛn dɔg, wi de pini, ɛn pini lɛk dɔv; we de luk fɔ jɔstis, bɔt i nɔ de; fɔ salveshɔn sɛf, bɔt i de fa frɔm wi.

¹² Bikɔs wi sin dɛn bɔku bifo yu, ɛn wi sin dɛn dɔn tɔk agens wi; bikɔs wi sin dɛn de wit wi, ɛn wi no wi sin dɛn:

¹³ fɔ kɔmit sin, ɛn de dinay PAPA GƆD, ɛn tɔn kɔmɔt, lɛf fɔ fala wi Gɔd, de tɔk aw fɔ sɔprɛs pipul ɛn fɔ ribɛl, de plan na dɛn maynd, ɛn de tɔk laylay wɔd kɔmɔt na wi at.

¹⁴ Dɛn dɔn drɛb Jɔstis go bak, ɛn, fɔ waka tret na PAPA GƆD in yay, in tinap fawe; tru in dɔn fɔdɔm na dɛn pɔblik skwaya dɛn, ɛn sobanɛs in nɔ ebul go insay.

¹⁵ Tru nɔ de igen, ɛn di wan we lɛf wikɛdnɛs, de mek insɛf pɔsin we dɛn fɔ du bad to. PAPA GƆD bin si am, ɛn I nɔ bin pliz we nɔn jɔstis nɔ de.

PAPA GƆD De Rɛdi Fɔr Sev In Pipul

¹⁶ I si se pɔsin nɔ bin de, ɛn i wɔnda se nɔbɔdi nɔ de fɔ put mɔt de, na datɛnde, in yon an mek i gɛt viktri, ɛn in raychɔsnɛs mek i ebul tinap.

¹⁷ I wɛr raychɔsnɛs fɔ brɛsplet, ɛn wan ɛlmɛt ɔf salveshɔn, nain ed; I wɛr gamɛnt ɔf vɛnjɛns, fɔ in klos, ɛn rap insɛf insay bad bad vɛksteshɔn, fɔ ovakot.

¹⁸ Na akɔdin to wetin dɛn du, i go pe dɛn bak, vɛksteshɔn fɔ di wan dɛn we de agens am, ɛn i go sho lɔv to in ɛnimi dɛn; i go sho lɔv to di kɔntri dɛn we de nia di si.

¹⁹ So dɛn go fred PAPA GƆD in nem na di wɛst, ɛn in glori kɔmɔt usay di san de rayz; bikɔs I go kam lɛk watasay we di wata de rɔn wit spid, we na PAPA GƆD in briz de push am.

²⁰ “Ɛn I go kam na Zayɔn fɔ sev pipul, fɔ dɛn wan dɛn na Jekɔb we tap fɔ kɔmit sin. Na so PAPA GƆD se.

²¹ “PAPA GƆD se, “As fɔ mi, dis na mi Kɔvinant wit dɛm: mi spirit we de pan yu ɛn mi wɔd we a dɔn put na yu mɔt, nɔ go kɔmɔt na yu mɔt, i nɔ go kɔmɔt na yu pikin dɛm mɔt, ɔ dɛn yon pikin pikin dɛn mɔt. Na so PAPA GƆD se, frɔm naw, ɛn sote go.”