Ayzaya 55 - Krio Fɔs Oli Baybul

PAPA GƆD In Masi We I Gi Fri

¹ E, lɛ ɔlman we tɔsti, kam na di watasay dɛn; ɛn lɛ udat we nɔ gɛt kɔpɔ, kam, bay ɛn it! Kam, bay wayn ɛn milk i lɛk yu nɔ gɛt kɔpɔ ɛn dɛn nɔ gɛt prayz.

² Wetin du una de spɛnd una kɔpɔ pan tin we nɔto tin fɔ it, ɛn put yu lebɔ pan tin we nɔ de mek yu satisfay? Lisin mi gud gud wan, ɛn it wetin gud, ɛn gladi fɔ dɛn rich it dɛn.

³ Opin una yes lisin, ɛn kam to mi; una yɛri, mek una go gɛt layf; ɛn a go mek Kɔvinant wit yu we go de sote go, mi tru tru lɛk we nɔ de chenj, we a lɛk Devid.

⁴ A dɔn mek am witnɛs to di difrɛn difrɛn pipul dɛn, ɛn di lida ɛn kɔmanda fɔ di pipul dɛm.

⁵ A de tɛl yu, yu go sɛn kɔl neshɔn dɛn we una nɔ no, ɛn neshɔn dɛn we nɔ bin no, go rɔn kam to yu, Fɔseka PAPA GƆD we na una Gɔd, di Oli Wan na Izrɛl bikɔs I dɔn es una ɔp na wɔl.

⁶ PAPA GƆD se “Luk fɔ PAPA GƆD di tɛm we mɔtalman kin ebul fɛn am, pre to am we i de nia;

⁷ lɛ wikɛd pɔsin lɛf fɔ du bad, ɛn di pɔsin we nɔ de waka tret na PAPA GƆD in yay, chenj di we we i de tink; mek i tɔn bak go to PAPA GƆD, mek i go sɔri fɔ am, dat na to wi Gɔd, bikɔ i go padin am fɔ ɔltin.

⁸ Bikɔs una nɔ de tink di we, we mi de tink, ɛn una nɔ de du tin, di we we mi de du tin, na so PAPA GƆD se.

⁹ Bikɔs, lɛk aw di skay ay pas di grɔn, na so di we we a de du tin, ay pas una yon ɛn di we we a de tink, ay pas di we we una de tink.

¹⁰ “Bikɔs lɛk aw ren ɛn sno de fɔdɔm kan dɔŋ kɔmɔt na di skay, ɛn nɔ de go ɔp bak, bɔt de wata di grɔn, de mek tin dɛn bia ɛn gro, de gi sid to di pɔsin we de plant, ɛn tin fɔ it to di wan we de it,

¹¹ na so mi wɔd we de kɔmɔt na mi mɔt, go bi; i nɔ go tɔn bak kan to mi i nɔ du natin, bɔt i go du wetin a sɛn am fɔ du, ɛn i go do wɛl pan di tin we a sɛn am fɔ go du.

¹² “Bikɔs una go wit gladi, ɛn dɛn go lid una go wit kolat; di mawnten dɛn ɛn di il dɛn we de bifo yu go bɔsawt de siŋ, ɛn ɔl di tik dɛn na di fil go klap dɛn an.

¹³ Instɛd ɔf chuk chuk, na Sayprɛs tik go gro, Instɛd ɔf wayl bush, na matul tik go gro; ɛn i go bi tin fɔ tek mɛmba PAPA GƆD, we go bi sayn we go de sote go, ɛn nɔ go ɛva dɔn.”