Ayzaya 53 - Krio Fɔs Oli Baybul

¹ Udat dɔn biliv wetin we dɔn yɛri? Ɛn to udat PAPA GƆD dɔn sho in an?

² Bikɔs I gro bifo am lɛk yɔŋ plant, ɛn lɛk rut we bɔs kɔmɔt na dray grɔn; I nɔ gɛt shep ɔ fayn fes we go mek wi go luk am, ɛn nɔ gɛt da fayn fes we go mek pɔsin want am.

³ Mɔtalman dɛn luk dɔŋ pan am ɛn shub am fa; na man we gɛt pen ɛn brok at, ɛn na lɛk udat pipul dɛn de ayd fes pan dɛn luk dɔŋ pan am, ɛn wi nɔ rɛspɛkt am atɔl.

⁴ Fɔ tru tru, i dɔn tek ɔl di tin dɛn we de mɔna wi kɔmɔt pan wi go ɛn dɔn tek ɔl wi pen dɛn go; pan ɔl dat, wi si am lɛk udat dɛn jɛs pɔnish fɔ natin, pɔsin we PAPA GƆD jɛs pɔnish ɛn tɔmɛnt bad bad wan.

⁵ Bɔt na fɔ wi sin mek dɛn wund am, ɛn na fɔ wi sin mek dɛn brus brus am; na pan am dɛn put ɔl di pɔnishmɛnt we sev wi, ɛn na di flag we dɛn flag am, mek wi wɛl.

⁶ Wi ɔl dɔn go astre lɛk ship; ɔlman dɔn go in yon we; ɛn PAPA GƆD dɔn put wi ɔl sin dɛn pan am.

⁷ Dɛn bin dɛn trit am bad ɛn i bin sɔfa, pan ɔl dat I nɔ se wan wɔd; lɛ ship pikin we dɛn de kɛr go fɔ go kil, ɛn lɛk we ship kin tɔn mumu bifo di wan dɛn we de kɔt in ia nain bɔdi, na so i nɔ se wan wɔd.

⁸ Na bay aw dɛn trit ɛn jɔj am, mek dɛn kɛr am go; ɛn as fɔ in jɛnareshɔn, udat pan dɛn bin kɔnsida se dɛn kil am kɔmɔt na dis wɔl, ɛn mek i sɔfa fɔ mi pipul dɛn sin?

⁹ Ɛn dɛn bɛr am wit dɛn wikɛd pipul ɛn wit wan jɛntriman, we I day, pan ɔl we i nɔ du natin bad, ɛn nɔn lay nɔ bin de nain mɔt.

¹⁰ Bɔt ɔl dat, na bin PAPA GƆD in plan fɔ mek dɛn brus am; I mek i sɔfa; we i mek insɛf di sakrifays fɔ sin, I go si in pikin dɛn, I go mek i gɛt lɔŋ layf; PAPA GƆD in plan go sɔksid nain an;

¹¹ I go si di bɛnifit fɔ di pen we in sol sɔfa, ɛn i go satisfay; na bay in sɛns di pɔsin we de waka tret na PAPA GƆD in yay, we na mi wokman, mek PAPA GƆD kɔnt bɔku pipul dɛn se, dɛn de waka tret nain yay; ɛn i go tot dɛn sin dɛm.

¹² Fɔseka dat, a go mek say fɔ am wit dɛn pipul dɛn we gɛt ay rɛspɛkt, ɛn nain ɛn di pawaful pipul dɛn go sheb di viktri; bikɔs i gi insɛf fɔ day fɔ di wɔl we nɔbɔdi nɔ fos am, ɛn dɛn bin kɔnt am as wan sina; pan ɔl dat, i tot bɔku pipul sin, ɛn bin pre fɔ di pipul dɛn we de kɔmit sin.