Ayzaya 52 - Krio Fɔs Oli Baybul

PAPA GƆD Go Sev Jerusɛlɛm

¹ Grap o, grap, pik trɛnk, yu Zayɔn; wɛr yu fayn fayn klos dɛn, Yu Jerusɛlɛm, we na di oli siti; bikɔs dɛn nɔ go kam insay to yu igen dɛn wan we nɔ sakɔmsayz ɛn we nɔ klin

² Shek yusɛf kɔmɔt na dɔti, grap, Yu Jerusɛlɛm we dɛn kapchɔ; lus di rop dɛn kɔmɔt na yu nɛk, Yu Zayɔn in gyal pikin we dɛn kapchɔ.

³ Bikɔs na dis PAPA GƆD se, “Dɛn nɔ sɛl yu wit mɔni, ɛn dɛn nɔ go ridim yu wit mɔni.

⁴ Bikɔs na dis Papa Gɔd we na Gɔd se: Fɔs mi pipul dɛn bin go dɔŋ na Ijipt fɔ go tap de, ɛn di Asirian dɛn sɔprɛs dɛn fɔ natin.

⁵ PAPA GƆD se, wetin a de du na ya, we yu luk se dɛn dɔn kɛr mi pipul dɛn go fɔ natin? Dɛn rula dɛn kray bita wan, ɛn ol de, dɛn de fityay mi nem. Na so PAPA GƆD se.

⁶ Fɔseka dat, mi pipul dɛn go no mi nem; so, na da de de dɛn go no se, na Mi de tɔk; luk Mi na ya.”

⁷ Luk we dɛn fayn na dɛn mawnten dɛn dɛn pipul dɛn we de briŋ gud yus, we de anawns bɔt pis, we de briŋ nyuz bɔt gud tin, we de anawns bɔt salveshɔn, we de tɛl Zayɔn se, “Na yu Gɔd de ren.”

⁸ Una lisin, una wachman dɛn de ala, dɛn de siŋ togɛda wit jɔy; bikɔs dɛn de si yay to yay we PAPA GƆD de tɔn bak kam Zayɔn.

⁹ Una ɔl bigin siŋ togɛda, una dɛn ɛmti ples dɛn na Jerusɛlɛm; bikɔs PAPA GƆD dɔn koks in pipul dɛn, I dɔn ridim Jerusɛlɛm.

¹⁰ PAPA GƆD dɔn lɛf in oli an na do bifo ɔl dɛn neshɔn dɛn yay; ɛn ɔl di kɔna na wɔl go se wi Gɔd in salveshɔn.

¹¹ Una go, una go, una go yanda, nɔ tɔch natin we dɔti na PAPA GƆD in yay; kɔmɔt to am go, go mek unasɛf klin na PAPA GƆD in yay, una we de tot di tin dɛn we dɛn de yuz na PAPA GƆD in os.

¹² Bikɔs una nɔ go kɔmɔt go ɔri ɔri wan, ɛn una nɔ go go lɛk udat de rɔnawe, bikɔs PAPA GƆD go de bifo una, ɛn na Izrɛl dɛn Gɔd go gyad una bak.

Di Wokman We De Sɔfa

¹³ Biliv mi, mi wokman go prɔspa, dɛn go es am ɔp, ɛn i go de ay ay wan.

¹⁴ Lɛk we dɛn bin plɛnti we bin wɔnda pan am- we i bin damej ɛn nɔ bin fiba mɔtalman igen, ɛn nɔ bin shep lɛk mɔtalman igen-

¹⁵ na so i go shɔk plɛnti neshɔn dɛm; kiŋ dɛn go sɛt dɛn mɔt fɔseka am; bikɔs di tin we dɛn nɔ ɛva tɛl dɛn bɔt, dɛn go si, ɛn na di tin we dɛn nɔ yɛri bɔt wande, dɛn go ɔndastand.