Ayzaya 50 - Krio Fɔs Oli Baybul

¹ Na dis PAPA GƆD se; “We yu mama in dayvɔs pepa, we a tek dayvɔs am? Ɔ uswan pan di wan dɛn we a o, we a sɛl una gi? No se, na fɔ yu sin dɛn mek dɛn sɛl yu ɛn na fɔ di bad bad tin dɛn we yu de du, mek a drɛb yu mami.

² Wetin mek, wɛn a bin kam, nɔbɔdi nɔ de? Wɛn a kɔl, nɔbɔdi nɔ bin de fɔ ansa? Mi an dɔn shɔt we a nɔ ebul sev? Adinɔ a nɔ gɛt pawa fɔ diliva? Lisin, we a tɔk pan di si, i dray, A tɔn di riva dɛn to ɛmti ples we pɔsin nɔ go ebul tap; dɛn fish smɛl bikɔs dɛn nɔ gɛt wata, ɛn day wit tɔsti.

³ A mek di skay wɛr blak klos, ɛn mek i kɔba wit saklɔth.

Di Obe We PAPA GƆD In Wokman Obe Am

⁴ Papa Gɔd we na Gɔd dɔn mek a sabi tɔk lɛk dɛn wan we dɛn tich, so dat a go no aw a go tɔk fɔ kɔrej pɔsin we dɔn fɛdɔp. Ɛvri mɔnin, i de wek, I de wek mi yes fɔ lisin lɛk di wan dɛn we dɛn tich.

⁵ Papa Gɔd we na Gɔd dɔn opin mi yes, ɛn a nɔ bin traŋayes, A nɔ tɔn bak.

⁶ A bin gi mi bak to di wan dɛn we de bit, ɛn mi jɔ to di wan dɛn we bin de pul di biabia; A nɔ bin ayd mi fes se a de shem, ɛn sɛf we dɛn bin de pit pan mi.

⁷ Bikɔs Papa Gɔd we na Gɔd de ɛp mi; Na dat mek dɛn nɔ ebul mi; fɔseka dat, a dɔn mek mi fes lɛk ayɛn ston; ɛn a no se dɛn nɔ go ebul mek a shem.

⁸ Di wan we go fri mi, de nia. Udat go chalenj mi? Lɛ wi tinap fes wisɛf. Udat na mi ɛnimi? Lɛ i kam mit mi.

⁹ Fɔ tru tru, Papa Gɔd we na Gɔd de ɛp mi; Udat go se a gilti? Luk, dɛn ɔl go dɔn lɛk ol klos; na moth go it dɛm.

¹⁰ Uswan pan una de fred PAPA GƆD ɛn de du wetin in wokman se, we de waka na daknɛs ɛn nɔ gɛt layt, bɔt stil trɔs PAPA GƆD in nem, ɛn abop pan in Gɔd?

¹¹ Bɔt una ɔl na pipul dɛn we de mek faya, pipul dɛn we de layt wud. Una waka wit una faya in flem, ɛn wit di wud dɛn we una dɔn layt faya pan! Na dis una go gɛt na mi an: una go lidɔm insay tɔmɛnt.