Ayzaya 5 - Krio Fɔs Oli Baybul

Di Siŋ Na Di Greps Fam

¹ Mek a siŋ fɔ mi lɔva wan lɔv siŋ we tɔk bɔt in greps fam; Mi lɔva bin gɛt greps fam na wan il we di grɔn gud fɔ plant.

² I dig am ɛn i klia ɔl di ston ston kɔmɔt, ɛn plant dɛn fɔs klas greps de; i bil wachman tawa midul de, dɛn i dig usay fɔ mas di greps fɔ pul di wayn; ɛn bin luk fɔ am fɔ bia greps, bɔt na sawa greps i bia.

³ Duya o, una we tap na Jerusɛlɛm ɛn una di man dɛn na Juda, a de beg una mek una kɔt dis kes bitwin mi ɛn mi greps fam.

⁴ Wetin mɔ a fɔ du fɔ mi grep fam we a nɔ du yet? Wɛn a de luk se i go bia greps, wetin mek i bia sawa grep?

⁵ Ɛn naw a go tɛl una wetin a go du to mi greps fam. A go pul di fɛnch we de rawnd am, datɛnde, dɛn go pwɛl pwɛl am; A go brok in wɔl dɛn kam dɔŋ ɛn dɛn go mas mas am.

⁶ A go mek i yuslɛs; dɛn nɔ go de trim am ɔ de put dɔti nain rut, so dat wayl bush ɛn chuk chuk go gro de; Dɔn a go kɔmand di klawd dɛm mek nɔn ren nɔ fɔdɔm pan an.

⁷ PAPA GƆD Ɔlmayti in greps fam na Izrɛl, ɛn di man dɛn na Juda na di fayn fayn plant dɛn we i plant; ɛn i luk fɔ jɔstis bɔt oya, soso blɔd; i luk fɔ di wan dɛn we de waka tret wit PAPA GƆD, bɔt oya, na kray!

Di Bad Bad Tin Dɛn We Pipul De Du

⁸ Swɛ go fɔdɔm pan dɛm, dɛn wan we jɛs de gɛda os, ɛn jɛs de gɛda grɔn, sote nɔn say sɛf nɔ lɛf igen, ɛn na yu wangren dɛn go mek tap na di land.

⁹ A yɛri PAPA GƆD Ɔlmayti dɔn swɛ se; “fɔ tru tru, bɔku os dɛm go ɛmti, big ɛn fayn os dɛn, nɔbɔdi no go lib de.

¹⁰ Na et lita wayn nɔmɔ go kɔmɔt pan tɛn eka greps fam, tri ɛn af bag sid nɔ go bia rich af bag sɛf.”

¹¹ Swɛ go fɔdɔm pan dɛm wan dɛn we de grap ali mɔnin go fɛn traŋa rɔm, ɛn de drink te nɛt kam so te dɛn drɔŋɔ.

¹² Dɛn gɛt git ɛn ap, tamborin ɛn flut ɛn wayn na dɛn pati dɛn; Bɔt dɛn nɔ bisin bɔt wetin PAPA GƆD de du ɔ ivin si di wok we i de wok.

¹³ So mi pipul dɛn go ɛgzayl, bikɔs dɛn ful; di man dɛn we dɛn rɛspɛkt de day wit aŋri ɛn tɔsti de kil dɛn bɔku bɔku pipul dɛn.

¹⁴ Fɔseka dat, ɛl dɔn aŋri fɔ it bad bad wan ɛn i dɔn opin in mɔt pas aw i blant opin am, fɔ swɛla di aristo dɛn na Jerusɛlɛm ɛn in bɔku bɔku pipul dɛm, in krawd ɛn di wan dɛn we de prez am.

¹⁵ Mɔtalman dɛn de butu dɛn ed ɛn dɛn blɔf dɔn dɔn, ɛn di prawd pipul dɛn yay dɔn kan dɔŋ.

¹⁶ Bɔt dɛn de es PAPA GƆD Ɔlmayti ɔp bikɔs i de trit ɔlman di sem, ɛn di oli Gɔd de sho insɛf se i oli bay we i de waka tret.

¹⁷ Da tɛm de, dɛn ship pikin go it usay fayn gras de gro, di animal dɛn we dɛn de mɛn fɔ mek dɛn fat ɛn dɛn got pikin go it na broko broko ples.

¹⁸ Swɛ go fɔdɔm pan wan dɛn we de kɔmit sin wit bɔku bɔku laylay, di wan dɛn we de waka wit sin biɛn dɛn lɛk we dɛn de drɔ ɔmɔlanke,

¹⁹ di wan dɛn we kin se, “lɛ I mekes lɛ I du in wok kwik kwik so dat we go si am; lɛ di tin we di Oli Wan na Izrɛl mekup, apin jisnɔ, ɛn lɛ i bi naw naw, so dat we go si am!”

²⁰ Swɛ go fɔdɔm pan dɛm wan we de kɔl bad, gud ɛn gud, bad, we de si daknɛs, i se na layt ɛn layt, i se daknɛs, i si bita, i se na swit ɛn swit, i se na bita!

²¹ Swɛ go fɔdɔm pan dɛm wan we tink se dɛn gɛt sɛns ɛn fil se dɛn klɛva!

²² Swɛ go fɔdɔm pan dɛm wan we na champiɔn fɔ drink rɔm, ɛn dɛn man dɛn we nɔ de fred fɔ miks traŋa rɔm,

²³ dɛn wan dɛn we de fri pɔsin we gilti fɔ seka brayb ɛn nɔ de gi di wan we nɔ gilti, in rayt.

²⁴ Fɔseka dat, lɛk aw faya de bɔn di af af tik we kin lɛf na grɔn we dɛn kɔt rɛs, ɛn lɛk aw dray gras kin bɔn na faya, na so dɛn rut go tan lɛk tin we rɔtin di flawa we dɛn pul go flay go ɔp lɛk dɔst, bikɔs dɛn nɔ gri fɔ du wetin PAPA GƆD Ɔlmayti in lɔ se, ɛn nɔ gɛt rɛspɛkt fɔ di Oli Wan na Izrɛl in wɔd.

²⁵ Fɔseka dat PAPA GƆD in at bin wam pan in pipul dɛn, so i tɔn pan dɛn ɛn kil dɛn, ɛn di mawnten dɛn trimbul; ɛn dɛn dedebɔdi dɛn skata lɛk dɔti na di trit dɛn. Pan ɔl dat in at stil nɔ kol, ɛn i stil wan pɔnish dɛn.

²⁶ I go mek sayn fɔ wan neshɔn we de fawe, ɛn i go wisul kɔl am, frɔm di say we di wɔl tap; ɛn luk o! I de kam wit spid lɛk briz.

²⁷ Nɔn nɔ taya, nɔ wan nɔ bɔk fut, nɔn nɔ bayfɔl ɔ slip, wan lapa nɔ lus, wan sandal rop nɔ kɔt;

²⁸ dɛn aro dɛn shap, ɔl dɛn bo dɛn bɛn, dɛn ɔs dɛn sus tan lɛk shap ston, ɛn dɛn wil dɛn tan lɛk traŋa briz dɛn we de tɔn wan ples ɛn grap.

²⁹ Dɛn de ala lɛk layɔn, lɛk we yɔŋ layɔn de ala; dɛn pul big vɔys ɛn kech dɛn it fɔ it, dɛn bɔn am go ɛn nɔbɔdi nɔ ebul pul am na dɛn an.

³⁰ Dɛn go ala ala fɔ am da de de, lɛk we si rɔf. Ɛn as yu si di land so, na daknɛs ɛn brok at yu go si, ɛn klawd dɛn mek di layt dak.