Ayzaya 49 - Krio Fɔs Oli Baybul

Izrɛl, Layt Fɔ Di Neshɔn Dɛn

¹ Lisin to mi, una dɛn kɔntri dɛn nia di si, ɛn pe atɛnshɔn, una dɛn neshɔn dɛn we de fawe, PAPA GƆD kɔl mi frɔm we a de na bɛlɛ, nainsay mi mami bɛlɛ i gi mi nem.

² I mek mi mɔt lɛk shap sɔd, na ɔnda in an in shado i bin ayd mi; i mek mi lɛk aro we dɛn pɔlish, ɛn ayd mi insay di bag we i de kip aro.

³ Ɛn i tɛl mi se, “Yu na mi wokman, yu Izrɛl, we na pan yu a go gɛt glori.”

⁴ Bɔt a se, “A dɔn lebɔ fɔ natin, Mi trɛnk ɔl dɔn wes ɛn go fɔ natin; bɔt a shɔ se mi rayt de wit PAPA GƆD, ɛn mi riwɔd de wit mi Gɔd.”

⁵ Ɛn naw PAPA GƆD de se, In we mol mi frɔm mi mami bɛlɛ, fɔ briŋ Jekɔb kam bak to am, ɛn fɔ mek Izrɛl gɛda kam to am, bikɔs a gɛt ɔna na PAPA GƆD in yay ɛn mi Gɔd dɔn bi mi trɛnk-

⁶ I se: “Na smɔl tin fɔ mek yu bi mi wokman fɔ gɛda Jekɔb in difrɛn fambul dɛn ɛn fɔ briŋ di wan dɛn pan Izrɛl we a kip, kam bak; A go mek yu lɛk layt to di neshɔn dɛm, lɛ mi salveshɔn go rich usay di wɔl tap.”

⁷ Na dis PAPA GƆD, we na Izrɛl in Ridima ɛn in Oli Wan se, to di wan we ɔlman dɔn shub na kɔna ɔltogɛda, we di neshɔn dɛn dɔn shub fa, we na di rula dɛn wokman: “kiŋ dɛm go si ɛn tinap; bigman dɛm, ɛn dɛn go lidɔm na grɔn wit dɛn bɛlɛ; bikɔs PAPA GƆD we de waka tret, we na di Oli Wan na Izrɛl, we dɔn pik yu.”

Dɛn Go Mek Jerusɛlɛm Bak

⁸ Na dis PAPA GƆD se; “Di tɛm fɔ fevɔ, a dɔn ansa yu di de fɔ salveshɔn, a dɔn ɛp yu; A dɔn kip yu ɛn gi yu fɔ bi Kɔvinant to di pipul dɛn, fɔ mek di kɔntri go tinap traŋa wan, fɔ sheb sheb di ɛmti land;

⁹ de tɛl di prizina dɛn se, ‘Una kan na do,” ɛn tɛl di wan we de na daknɛs se, “Una apia,’ Dɛn go de it na rod we dɛn de go, ɛn ɔl dɛn mawnten we dray, go bi ples we plɛnti de fɔ dɛn fɔ it;

¹⁰ dɛn nɔ go aŋri ɛn dɛn nɔ go tɔsti, ɔt briz ɔ san sɛf go mɔna dɛm, bikɔs na di wan we de sɔri fɔ dɛn go lid dɛm, ɛn na usay watasay dɛn de i go pas dɛn.

¹¹ Ɛn a go mek ɔl mi mawnten dɛm bi rod, ɛn dɛn go bil mi men rod dɛn.

¹² A de tɛl una, dɛnwanya go kɔmɔt fawe, ɛn fɔ tru tru, dɛn go kɔmɔt nɔt ɛn na di wɛst, ɛn dɛnwanya we kɔmɔt Aswan na di sawt.”

¹³ Siŋ wit jɔy, yu skay, ɛn yu ath, gladi; bɔs wit siŋ una dɛn mawnten dɛn, bikɔs PAPA GƆD dɔn koks in pipul dɛn, ɛn go sɔri fɔ in pipul dɛn we de sɔfa.

¹⁴ Bɔt Zayɔn se, “PAPA GƆD dɔn fɔsek mi, Mi Gɔd dɔn fɔgɛt mi.”

¹⁵ “Kombra go fɔgɛt in pikin we de sɔk bɔbi, we i nɔ go sɔri fɔ di bɔypikin we kɔmɔt nain bɛlɛ? Dɛn sɛf kin fɔgɛt, bɔt mi, nɔ go fɔgɛt yu.

¹⁶ A de tɛl yu, a dɔn kav yu na mi an dɛn; yu wɔl dɛn de bifo mi ɔltɛm.

¹⁷ Di wan dɛn we de bil fɔ yu, impɔtant pas di wan dɛn we de pwɛl yu, ɛn di wan dɛn we bin ɛmti yu, go kɔmɔt lɛf yu go.

¹⁸ Es yu yay ɔp, luk rawnd ɛn si; dɛn ɔl gɛda, dɛn kam to yu. PAPA GƆD se, wans a de, yu go wɛr dɛn ɔl lɛk trinkɛt, yu go fiks dɛn pan yusɛf lɛk aw yawo kin du.

¹⁹ “Fɔ tru yu ples dɛn we natin ɛn nɔbɔdi nɔ de ɛn yu land we dɔn pwɛl kpatakpata- fɔ tru, yu go tu smɔl naw fɔ di wan dɛn we tap de, ɛn di wan dɛn we bin swɛla yu, go de fawe.

²⁰ Di pikin dɛn we bɔn di tɛm we yu bin gɛt bɛrin go tɔk wande na yu yes se: ‘Di ples tu smɔl fɔ mi; mek say we a go tap.”

²¹ Datɛnde yu go tɔk na yu at se: “Udat bin bɔn dɛnwanya fɔ mi? A bin gɛt bɛrin ɛn a nɔ bin de bɔn pikin, dɛn sɛn mi go ɛgzayl ɛn drɛb mi, bɔt udat mɛn dɛn wan ya? A de tɛl yu, dɛn lɛf mi wangren; so usay dɛn wan ya kɔmɔt?’”

²² Na dis PAPA GƆD de se: “A de tɛl yu, A go es mi an to di neshɔn dɛn ɛn mek mi sayn to di pipul dɛn; ɛn dɛn go briŋ yu bɔypikin dɛm na dɛn buzɔm, ɛn dɛn go bɔn yu gyal pikin dɛm na dɛn sholda.

²³ Na kiŋ dɛn go tek una fɔ mɛn, ɛn na dɛn kwin dɛn go gi una bɔbi. Dɛn go butu dɛn fes na grɔn fɔ baw to una, ɛn lik di dɔti na una fut. Na datɛnde una go no se, na mi na PAPA GƆD; di wan dɛn we de luk to mi, nɔ go ɛva shem.”

²⁴ Dɛn go ebul pul wetin trɛnk man dɔn kech, kɔmɔt nain an ɔ di wan dɛn we wikɛd rula dɔn kech, kɔmɔt nain an?

²⁵ Fɔ tru, na dis PAPA GƆD se; “Dɛn kin pul di wan we di trɛnk man sɛf kech kɔmɔt nain an, ɛn dɛn go sev di wan dɛn we di wikɛd rula dɔn kech, kɔmɔt nain an, bikɔs a go fɛt di wan dɛn we de fɛt yu, ɛn a go sev yu pikin dɛn.

²⁶ A go mek dɛn wan we aras yu, it dɛn yon flɛsh, ɛn dɛn go drɔnk wit dɛn yon blɔd lɛk se na wayn. Na datɛnde ɔl mɔtalman go no se, na Mi na PAPA GƆD we na una seviɔ, ɛn una Ridima, Jekɔb in Mayti Wan.”