Ayzaya 48 - Krio Fɔs Oli Baybul

PAPA GƆD we Gɛt Di Tumara

¹ Lisin dis, yu Jekɔb in os, yu we dɛn de kɔl Izrɛl, we Juda na yu dadi, we de swɛ wit PAPA GƆD in nem ɛn se yu biliv pan di Gɔd na Izrɛl, bɔt nɔ bin de tɔk tru ɔ wetin rayt.

² Bikɔs dɛn kɔl dɛnsɛf di oli siti in nem, ɛn abop pan Izrɛl dɛn Gɔd; na PAPA GƆD Ɔlmayti nain nem.

³ “A bin dɔn tɛl una lɔntɛm bɔt di tin dɛn we bin dɔn bi, dɛn kɔmɔt na miyon mɔt ɛn a mek una no bɔt dɛn; dɔn wantɛm wantɛm, a du dɛm, ɛn dɛn bi.

⁴ Bikɔs a no se yu traŋayes, ɛn yu nɛk na lɛk ayɛn rop ɛn yu fɔrɛd na lɛk bras,

⁵ A bin dɔn tɛl yu lɔlɔntɛm, bifo dɛn apin, a bin anawns dɛn to yu, bambay yu go se, ‘Na mi laylay gɔd dɛm, na mi bod laylay gɔd ɛn mi ayɛn laylay gɔd du dɛm.’

⁶ “Yu dɔn yɛri; naw kan luk ɔl dis; ɛn yu nɔ go tɔk bɔt am? As frɔm naw te go, a go mek una de yɛri nyu tin dɛm, tin dɛn we ayd we una nɔ no yet.

⁷ Na naw dɛn mek, i nɔ tu te yet; yu nɔ yɛri bɔt dɛn wande, pas tide, bambay yu go se, ‘bo, a bin no dɛm.’

⁸ Yu nɔ ɛva yɛri, yu nɔ ɛva no, frɔm mɔnin, yu yes nɔ bin opin. Bikɔs a bin no se, na rikishi we, yu go du tin, ɛn frɔm we yu bɔn, na rebɛl dɛn bin de kɔl yu.

⁹ “Fɔseka mi nem, a de push mi vɛks go biɛn, fɔseka mi prez, a tap am fɔ yu sek, so dat a nɔ go kil yu.

¹⁰ Luk, a dɔn klin yu fayn, bɔt nɔto lɛk silva; A dɔn tɛst yu na di fɔnes ɔf aflikshɔn.

¹¹ Na fɔ mi yon sek, fɔ mi yon yon sek, mek a du am, bikɔs wetindu mi nem fɔ disgres? A nɔ go gi mi glori to ɔda pɔsin.

Sayrɔs We Na PAPA GƆD in Lida We I Pik

¹² “Lisin mi, yu Jekɔb, ɛn yu Izrɛl we a dɔn kɔl! Na Mi na Im, na Mi na di fɔs, ɛn na mi na di las.

¹³ Na mi le di fawndeshɔn fɔ di wɔl, ɛn mi raytan prɛd di skay; wɛn a kɔl dɛm, dɛn de kɔmɔt tinap togɛda.

¹⁴ Una ɔl gɛda, ɛn yɛri! Uswan pan dɛn bin tɔk se dɛn tin ya go bi? PAPA GƆD lɛk am; i go du wetin i plan fɔ Babilɔn, ɛn in an go fɛt di Babilonian dɛn.

¹⁵ Mi, na Mi semwan, dɔn tɔk ɛn kɔl am, A dɔn briŋ am kam, ɛn i go sɔksid pan ɔl wetin i de du.

¹⁶ Kam nia mi, yɛri dis: frɔm tɛm, a nɔ de tɔk sikrit, frɔm di tɛm we i bi, a bin dɔn de de.” Ɛn naw PAPA GƆD dɔn sɛn mi ɛn in Spirit

PAPA GƆD In Plan Fɔ In Pipul Dɛn

¹⁷ Na dis PAPA GƆD se, Yu Ridima, we na di Oli Wan na Izrɛl: “Na mi na PAPA GƆD we na yu Gɔd, we de tich yu aw fɔ prɔfit, we de lid yu na di rod we yu fɔ waka na layf.

¹⁸ A wish yu bin de obe mi lɔ dɛn! Datɛnde yu kolat bin fɔ tan lɛk riva, ɛn di waka we yu de waka tret na mi yay, go tan lɛk swɛlin na si;

¹⁹ Yu pikin dɛn bin fɔ plɛnti lɛk sansan, ɛn yu pikin pikin dɛn go bɔku lɛk aw sansan bɔku; dɛn nem nɔ go ɔt atɔl ɛn dɛn nɔ go pwɛl am bifo mi.”

²⁰ Una kɔmɔt na Babilɔn, una rɔnawe kɔmɔt na Chaldia, tɔk dis wit jɔy, anawns am ɔlsay, sɛn di wɔd go usay di wɔl tap; tɔk se, “PAPA GƆD dɔn bay in wokman Jekɔb bak.”

²¹ Dɛn nɔ bin tɔsti we i bin pas wit dɛn na di ɛmti ples we pipul nɔ go ebul tap; I bin mek wata kɔmɔt na ston fɔ dɛm; I plit ston ɛn di wata bɔs kɔmɔt wit pawa.

²² PAPA GƆD se, “kolat nɔ de fɔ wikɛd pɔsin.”