Ayzaya 47 - Krio Fɔs Oli Baybul

Jɔjmɛnt Pan Babilɔn

¹ Kam dɔŋ kan sidɔm na dɔti grɔn, Yu Babilɔn in vajin gyalpikin; sidɔm na grɔn usay kiŋ chia sidɔm nɔ de, Yu we na dɛn Babilonian dɛn gyal pikin dɛn! Bikɔs dɛn nɔ go se yu bɔdi saf ɛn dɛliket, igen

² Tek pɛpɛ ston ɛn gren tin fɔ it, pul yu vel, pul yu gawn, es yu klos lɛ yu lɛg dɛn sho, ɛn waka krɔs di riva dɛn.

³ Yu nekɛdnɛs go sho, ɛn yu shem go kɔmɔt na do. A go rivɛnj, ɛn a nɔ go lɛf nɔbɔdi.

⁴ Wi Ridima – we PAPA GƆD Ɔlmayti nain nem- na di Oli Wan na Izrɛl.

⁵ Sidɔm kwayɛt, ɛn go na dak ples, Yu we na Babilonian dɛn gyal pikin; Bikɔs dɛn nɔ go kɔl yu di misis fɔ dɛn kindɔm, igen

⁶ A bin vɛks pan mi pipul dɛn, A disgres usay a kɔmɔt; A gi dɛn to yu, bɔt yu nɔ bin sho wan masi; na pan di ol pipul dɛn yu put yu lod we ebi pasmak.

⁷ Yu bin se “A go a bi misis sote go,” ɛn dat bin mek yu nɔ put dɛn tin ya na yu at ɔ mɛmba aw dɛn bin dɔn.

⁸ Fɔseka dat, lisin, yu we lɛk ɛnjɔymɛnt, we sidɔm sef wan, de tɔk na yu at se, “na Mi, ɛn nɔbɔdi nɔ de we bɛtɛ pas mi; A nɔ go sidɔm lɛk unam we in man dɔn day ɔ we no wetin i min fɔ bɛr pikin.”

⁹ Dɛn tu tin ya go apin to yu di sem tɛm, di sem de; yu pikin dɛn go day ɛn yu man go day ɛn i go fɔdɔm pan yu ebi ebi wan, pan ɔl yu bɔku bɔku wich we yu de wich, ɛn di bɔku pawa we yu gɛt pan yu majik.

¹⁰ Yu bin fil se yu sef pan yu wikɛdnɛs, Yu bin se, “Nɔbɔdi nɔ de si mi”; Yu sɛns ɛn yu sabi bin dɔn mek yu go astre, ɛn yu bin tɔk na yu at se, “Nɔbɔdi nɔ de we bɛtɛ pas mi.”

¹¹ Bɔt ivul go kam pan yu, we yu nɔ go ebul beg Gɔd fɔ; trɔbul go mit yu, we yu nɔ go ebul tek pɔnishmɛnt fɔ, ɛn yu go ruin wantɛm wantɛm, we yu nɔ go no natin bɔt.

¹² Tinap traŋa wan wit yu majik ɛn yu bɔku bɔku wich, we yu dɔn lebɔ fɔ frɔm we yu yɔŋ; sɔntɛnde, yu go ebul sɔksid, sɔntɛnde, yu go ebul mek pɔsin fred.

¹³ Yu dɔn taya wit yu bɔku bɔku advays; lɛ dɛn tinap sev yu, dɛn wan we de divayd di skay, ɛn we de wach di sta dɛn, we kin pridikt wetin go bi to yu, we nyu mun kɔmɔt.

¹⁴ Luk, dɛn na lɛk dray gras we faya kin bɔn; dɛn nɔ go ebul sev dɛnsɛf frɔm di faya in pawa. Dis nɔto kol fɔ wam yusɛf, nɔto faya fɔ sidɔm bifo!

¹⁵ Na so di wan dɛn we dɔn wok fɔ yu, nɔ go ebul ɛp yu, we bin dɔn de wok fɔ yu frɔm we yu yɔŋ; ɔlman de skata go inyon we; nɔn nɔ go de fɔ sev yu.