Ayzaya 45 - Krio Fɔs Oli Baybul

PAPA GƆD Apɔynt Sayrɔs

¹ Na dis PAPA GƆD tɛl Sayrɔs we i dɔn anɔynt, we nain raytan a dɔn ol tayt, fɔ put neshɔn dɛn ɔnda in fut ɛn fɔ disgres kiŋ dɛn, fɔ opin domɔt dɛn fɔ am so dat get dɛn nɔ go lɔk:

² A go lid yu ɛn lɛbul di mawnten dɛn, A go brok di bras do dɛn pis pis ɛn kɔt kɔt dɛn ayɛn ba dɛn.

³ A go gi yu di jɛntri we de na dak ɛn di tin dɛn we ayd na dɛn sikrit ples, so dat yu go no se na Mi, PAPA GƆD, Izrɛl dɛn Gɔd, we kɔl yu bay yu nem.

⁴ Fɔseka Jekɔb we na mi wokman ɛn Izrɛl we a pik, A kɔl yu bay yu nem, a gi yu sɔn nem, ɔlwe yu nɔ no mi.

⁵ Na mi na PAPA GƆD, ɛn nɔn ɔda wan nɔ de, apat frɔm mi, nɔn ɔda Gɔd nɔ de; A de gyad yu, ɔlwe yu nɔ sabi mi,

⁶ mek mɔtalman go no se, frɔm usay di san de grap ɛn frɔm di wɛst, nɔn ɔda wan nɔ de apat frɔm mi; Na Mi na PAPA GƆD ɛn nɔn ɔda wan nɔ de.

⁷ A mek layt ɛn daknɛs, A mek gladi gladi ɛn waala, na Mi na PAPA GƆD, we de du ɔl dɛn tin ya.

⁸ “Sɛn ren kan dɔŋ, yu skay, ɛn lɛ di skay dɛn sɛn raychɔsnɛs kan dɔŋ lɛ di grɔn opin so dat salveshɔn go bɔs kɔmɔt, ɛn lɛ i mek raychɔsnɛs insɛf bɔs kam ɔp; na mi PAPA GƆD dɔn mek am.

PAPA GƆD We Mek Di Wɔl Ɛn Istri

⁹ “Swɛ go fɔdɔm pan pɔsin we de fɛt in Meka, lɛk kle pɔt wit di wan we mek am! Di kle kin aks di wan we de mol se, ‘Na wetin yu de mek?’ Ɔ, ‘Di tin we yu de mek nɔ gɛt andul?’

¹⁰ Swɛ go fɔdɔm pan di wan we aks in Papa se, “Wetin mek a tan so? Ɔ uman se, ‘Na wetin yu de pini fɔ bɔn?’”

¹¹ Na dis PAPA GƆD se, in we na di Oli Wan na Izrɛl, ɛn dɛn Meka; “Una go kwɛshɔn mi bɔt mi pikin dɛm, ɔ kɔmand mi bɔt mi wok we a dɔn du?

¹² Na mi mek dis wɔl, ɛn mek mɔtalman de de; na mi an mek di skay ɛn opin am wayd, ɛn a kɔntrol ɔl wetin de de.

¹³ A dɔn wek am wit raychɔsnɛs, ɛn a go mek i waka tret pan ɔl wetin i de du; I go bil mi siti ɛn fri mi pipul dɛn we de ɛgzayl, we a nɔ go gɛt fɔ pe am ɔ gi am natin,’” Na dis PAPA GƆD Ɔlmayti se.

¹⁴ Na dis PAPA GƆD se: “Ijipt in jɛntri ɛn Itiopia in makit, ɛn di Sabian dɛn we na man dɛn we big ɛn ay, go kam oba to una ɛn go blant una, dɛn go de wit una; dɛn go chen dɛn briŋ dɛn kam oba to una, ɛn dɛn go butu to una. Dɛn go beg una se, “Na una nɔmɔ PAPA GƆD de wit, ɛn nɔn ɔda Gɔd nɔ de, nɔn ɔda gɔd nɔ de apat frɔm am;”

¹⁵ Fɔ tru tru, yu na Gɔd we de ayd yusɛf, Yu Izrɛl dɛn Gɔd we na di Seviɔ.

¹⁶ Dɛn ɔl shem ɛn kɔnfyus, di wan dɛn we de mek laylay gɔd de go wit kɔnfyushɔn togɛda.

¹⁷ Bɔt PAPA GƆD sev Izrɛl wit salveshɔn we de so te go, dɛn nɔ go mek una shem ɔ kɔnfyus una fɔ ɛva ɛn ɛva.

¹⁸ Bikɔs na dis PAPA GƆD se, we mek di skay (nain na Gɔd!), We mol dis wɔl ɛn mek am (i mek i tinap, i nɔ mek i bi ples we nɔ gɛt ɔda, i mek am fɔ pipul fɔ tap!). “Na Mi na PAPA GƆD, ɛn nɔn ɔda wan nɔ de.

¹⁹ A nɔ tɔk sikrit, na land ɔf daknɛs; A nɔ tɛl Jekɔb in pikin dɛm se, luk fɔ mi wit kɔnfyushɔn.’ Mi PAPA GƆD de tɔk tru, A de anawns wetin rayt.

PAPA GƆD We Na Gɔd Fɔ di Wɔl, ɛn Babilɔn in Laylay gɔd Dɛm.

²⁰ Una gɛda unasɛf kam, una kam togɛda, una we lɛf pan di neshɔn dɛn! Dɛn nɔ no natin, dɛn wan we de waka waka wit dɛn bod laylay gɔd dɛn, ɛn fasin fɔ de pre to gɔd we nɔ ebul sev dɛm.

²¹ Tɔk ɛn put una kes; lɛ dɛn ɛŋed togɛda! Udat bin tɔk dis lɔntɛm? Udat bin anawns am frɔm di biginin? Nɔto bin Mi, PAPA GƆD? Ɛn nɔn ɔda Gɔd nɔ de apat frɔm mi, Gɔd we de waka tret ɛn we de sev; nɔn ɔda wan nɔ de apat frɔm mi.

²² Una tɔn to Mi so dat una go sev, ɔl di kɔna dɛn na di wɔl! Bɔkɔs na Mi na Gɔd ɛn nɔn ɔda wan nɔ de.

²³ A dɔn swɛ wit mi nem, raychɔs wɔd dɔn kɔmɔt na mi mɔt, ɛn na wɔd we nɔ go tɔn bak; Na to mi ɔlman go baw ɛn kɔnfɛs,”

²⁴ “Dɛn go tɔk bɔt mi se, na PAPA GƆD nɔmɔ de waka tret ɛn gɛt trɛnk; ɔl di wan dɛn we bin de vɛks pan am go shem ɛn kan to am.

²⁵ Ɔl Izrɛl in pikin dɛn go gɛt viktri ɛn mek nem insay PAPA GƆD.