Ayzaya 43 - Krio Fɔs Oli Baybul

PAPA GƆD Prɔmis fɔ Sev in Pipul Dɛm

¹ Bɔt naw, na dis PAPA GƆD se, in we mek yu, yu Jekɔb, in we mol yu, yu Izrɛl: “Nɔ fred, a dɔn bay yu bak; A dɔn kɔl yu bay yu nem, yu na mi yon.

² We yu de pas na wata, a go de wit yu; ɛn we yu de pas na dɛn riva, yu nɔ go drawn; we yu waka insay faya, yu nɔ go bɔn ɛn di flem nɔ go kil yu.

³ Bikɔs mi na PAPA GƆD we na yu Gɔd, di Oli Wan na Izrɛl we na yu seviɔ. A giwe Ijipt fɔ fri yu, ɛn ɛkschenj Itiopia ɛn Sɛba fɔ yu.

⁴ Bikɔs yu spɛshal na mi yay, ɛn yu gɛt ɔna, ɛn a lɛk yu, A giwe mɔtalman dɛn fɔ gɛt yu, ɛn ɛkschenj pipul dɛm fɔ yu layf.

⁵ Nɔ fred, bikɔs a de wit yu A go briŋ yu pikin dɛm kɔmɔt na di ist ɛn a go gɛda yu kɔmɔt na di wɛst;

⁶ A go tɛl di nɔt se, Sɔrɛnda, ɛn di sawt se, nɔ ol dɛm; briŋ mi bɔypikin dɛn kɔmɔt fawe kam ɛn mi gyal pikin dɛm kɔmɔt usay di wɔl tap,

⁷ ɔl dɛn wan we gɛt mi nem, we a bin dɔn mek fɔ mi glori, we a bin dɔn mol ɛn mek.”

Izrɛl Na PAPA GƆD in Witnɛs

⁸ Briŋ di pipul dɛn we blɛn kam, ɔlwe dɛn gɛt yay; di wan dɛn we dɛf, ɔlwe dɛn gɛt yes!

⁹ Lɛ ɔl di neshɔn dɛn gɛda togɛda, ɛn lɛ di pipul dɛn gɛda wansay. Udat pan dɛn kin tɛl wi wetin de apin, ɛn tɛl wi di tin dɛn we bin dɔn apin? Lɛ dɛn briŋ witnɛs dɛn fɔ sho se na tru, ɛn mek dɛn yɛri ɛn se, dis a tru.

¹⁰ PAPA GƆD se, “Una na mi witnɛs dɛn, ɛn mi savant we a dɔn pik, mek yu go no ɛn biliv mi ɛn ɔndastand se na Mi na Im. Nɔn gɔd nɔ bin de bifo mi, ɛn nɔn ɔda wan nɔ go de afta mi;

¹¹ Mi, na Mi na PAPA GƆD, ɛn apat frɔm mi, nɔn ɔda seviɔ nɔ de.

¹² A tɔk ɛn sev ɛn anawns we nɔn trenja laylay gɔd nɔ bin de wit una; ɛn una na mi witnɛs dɛn.” Na so PAPA GƆD se.

¹³ “Na Mi na Gɔd, ɛn igen, as frɔm naw, na Mi na Im; Nɔbɔdi nɔ de we ebul pul pɔsin kɔmɔt na mi an. We a de wok, udat go ambɔg am?”

Dɛn Ɛskep Kɔmɔt Babilɔn

¹⁴ Na dis PAPA GƆD se, di wan we de sev una, di Oli Wan na Izrɛl: “Fɔ una sek, a go sɛn go Babilɔn go brok ɔl di ayɛn ba dɛn, ɛn di ala we in pipul dɛn de ala, go tɔn kray.

¹⁵ Na mi na PAPA GƆD, una Oli Wan, una kiŋ, di wan we mek Izrɛl.”

¹⁶ Na dis PAPA GƆD se, In we de mek rod na di si, we de mek futpath na dɛn big big wata dɛn,

¹⁷ di wan we de briŋ chariɔt ɛn ɔs, ɛn ami ɛn sojaman; dɛn lidɔm, dɛn nɔ ebul grap, dɛn ɔt dɛn, dɛn ɔt dɛn lɛk wik:

¹⁸ “Una nɔ mɛmba di tin dɛn we dɔn pas, ɛn nɔ tink bɔt di ol tin dɛn.

¹⁹ A de tɛl una, a de du nyu tin; i de bɔs naw, una nɔ no bɔt am? A go mek rod na di ɛmti ɛn dray ples we natin nɔ de, ɛn riva dɛn na ɛmti ples we pipul nɔ go ebul tap.

²⁰ Di wayl animal dɛn go ɔna mi, di jakal ɛn di ostrich dɛm; bikɔs a de gi wata na di ɛmti ɛn dray ples we natin nɔ de, ɛn riva dɛn na di ɛmti ples we pipul nɔ ebul tap, fɔ gi mi pipul dɛn we a dɔn pik, wata fɔ drink,

²¹ “we na di pipul dɛn we a dɔn mek fɔ misɛf so dat dɛn go prez mi.

Izrɛl Dɛn Sin

²² “Pan ɔl dat, una nɔ bin pre to mi, yu Jekɔb; bɔt una dɔn taya wit mi, yu Izrɛl!

²³ Una nɔ briŋ una ship dɛn fɔ mi, fɔ sakrifays dɛn we dɛn de bɔn na faya, ɔ ɔna mi wit una sakrifays dɛn. A nɔ mɔna una fɔ ɔfrin, ɔ mek una taya fɔ gi mi insɛns.

²⁴ Una nɔ bay insɛns fɔ mi wit mɔni, ɔ satisfay mi wit di fat pan una sakrifays dɛn. Bɔt una dɔn pak una sin dɛn pan mi, ɛn una dɔn mek a dɔn taya wit di sin dɛn we una de kɔmit.

²⁵ “Na Mi, na Mi na Im we de wep una sin dɛn kɔmɔt, fɔ mi yon sek, ɛn a nɔ go mɛmba una sin dɛn igen.

²⁶ Una mɛmba mi, lɛ wi agyu; mek una kes, so dat dɛn go pruv se una gɛt rayt.

²⁷ Una fɔstɛmpapa bin sin, ɛn di wan dɛn we de tɔk fɔ yu, dɔn sin agens mi;

²⁸ Fɔseka dat, a nɔ bin rɛspɛkt di bigman dɛn we bin de na di oli ples, A bin mek dɛn nyakanyaka Jekob ɛn mek dɛn fityay Izrɛl.