Ayzaya 42 - Krio Fɔs Oli Baybul

PAPA GƆD In Wokman

¹ Dis na mi wokman we a de sɔpɔt, di wan we a dɔn pik, we mi sol de gladi fɔ; A dɔn put mi Spirit pan am, i go mek ɔl mɔtalman na wɔl trit in kɔmpin di sem.

² I nɔ go kray ɔ ala lawd wan, ɔ ivin mek dɛn yɛri in vɔys na trit;

³ gras we de na watasay we dɔn wik, sɛf i nɔ go brok, wik we de bɔn lo wan na lamp, sɛf i nɔ go ɔt; i go waka tret wit PAPA GƆD fɔ mek ɔlman trit in kɔmpin di sem.

⁴ I nɔ go fel ɔ diskɔrej te i dɔn mek jɔstis sidɔm traŋa wan na wɔl; ɛn di kɔntri dɛn nia di si de wet fɔ in lɔ.

⁵ Na dis PAPA GƆD se, PAPA GƆD, we mek di skay ɛn opin am wayd wan, we mek di wɔl ɛn ɔl wetin de de; we gi layf to di pipul dɛn we tap de ɛn spirit to di wan dɛn we de waka de:

⁶ Na mi na PAPA GƆD, A dɔn kɔl una fɔ waka tret na mi yay, A dɔn ol una an ɛn kip una; A dɔn gi una as Kɔvinant to di pipul dɛm, ɛn layt to di neshɔn dɛm,

⁷ fɔ opin dɛn yay we blɛn, fɔ pul di prizina kɔmɔt na jel, dɛn wan we sidɔm na daknɛs kɔmɔt na jel.

⁸ Na mi na PAPA GƆD, na dat na mi nem; a nɔ de gi mi glori to ɛni ɔda pɔsin, ɔ mi prez to dɛn laylay gɔd.

⁹ A de tɛl yu, di fɔstɛm tin dɛm dɔn bi, ɛn na nyu tin dɛn a de tɛl una bɔt; Bifo dɛn apin a de tɛl una bɔt dɛm.”

Prez Siŋ

¹⁰ Siŋ wan nyu siŋ to PAPA GƆD, siŋ in prez usay di wɔl tap! Le di si ala ɛn ɔl wetin de de, di kɔntri dɛn nia di si ɛn di wan dɛm we tap de.

¹¹ Lɛ di ɛmti ples we pipul nɔ go ebul tap ɛn in siti dɛn, siŋ lawd lawd wan, Di vilej dɛn we Keda tap; ɛn lɛ di wan dɛn we tap na Sela siŋ wit gladi Lɛ dɛn ala pantap di mawnten dɛn.

¹² Lɛ dɛn gi PAPA GƆD glori, ɛn prez am na di kɔntri dɛn we de nia di si.

¹³ PAPA GƆD de go lɛk pawaful man, i de bigin in bad bad vɛksteshɔn lɛk sojaman; I de ala, I de ala lawd wan, i de sho insɛf pawaful wan agens in ɛnimi dɛn.

PAPA GƆD Prɔmis fɔ Ɛp in Pipul Dɛn

¹⁴ I dɔn te we a sɛt mi mɔt, A sidɔm saful de bia; naw a go ala lɛk uman we in bɛlɛ de at am fɔ bɔn, A go fɛt fɔ blo ɛn blo fasfas.

¹⁵ A go mek di mawnten dɛn ɛmti ɛn yuslɛs, ɛn dray ɔl di gras dɛn; A go tɔn dɛn riva to ayland dɛn ɛn dray di watasay dɛn.

¹⁶ Ɛn a go pas dɛn blɛn yay na rod we dɛn nɔ no A go gayd dɛm na rod we dɛn nɔ no wande. A go tɔn di daknɛs we de bifo dɛm to layt, ɛn mek di rɔf ples dɛn to lɛbul grɔn. Na dɛn tin ya a go du, ɛn a nɔ go tɔn mi bak pan dɛm.

¹⁷ Dɛn wan dɛn we abop pan dɛn laylay gɔd, we de tɛl dɛn laylay gɔd dɛn se, “una na wi gɔd dɛn,” go disgres bad bad wan, ɛn dɛn go drɛb dɛn.

Izrɛl Nɔ Gri Fɔ Lan

¹⁸ Una yɛri o, una we dɛf; ɛn luk, una we blɛn, lɛ una go si!

¹⁹ Udat blɛn, pas mi wokman, ɔ dɛf lɛk mi mɛsenja we a sɛn? Udat blɛn lɛk di wan we de wit mi wit ɔl in at, ɔ blɛn lɛk PAPA GƆD in wokman?

²⁰ I de si bɔku tin, bɔt i nɔ de notis dɛn; in yes opin, bɔt i nɔ de yɛri.

²¹ PAPA GƆD bin gladi fɔ di waka we i de waka tret wit am, fɔ mek in lɔ big na pipul yay ɛn mek dɛn rɛspɛkt am.

²² Bɔt dɛn wan ya na pipul dɛn we dɛn dɔn tif ɛn kɛr ɔl dɛn tin dɛn go, dɛn trap dɛn ɔl na ol dɛn ɛn ayd dɛn na jel; dɛn dɔn tɔn lɛk tin fɔ kech ɛn it, ɛn nɔbɔdi nɔ de fɔ sev dɛn, dɛn dɔn tɔn tin fɔ tif we nɔbɔdi nɔ de fɔ se, “put am bak!”

²³ Us wan pan una go lisin dis, we go put atɛnshɔn ɛn lisin fɔ bambay?

²⁴ Udat bin gi Jekɔb to di wan dɛn we de pwɛl, ɛn Izrɛl to di wan dɛn we de tif? Nɔto PAPA GƆD, we wi sin agens, di wan we dɛn nɔ gri waka nain rod, di wan we dɛn nɔ gri obe in lɔ?

²⁵ So I put in ebi ebi vɛksteshɔn pan am ɛn in pawa fɔ fɛt; I put faya rawnd am, bɔt i nɔ bin ɔndastand; I bɔn am, bɔt I nɔ tek am mek natin.