Ayzaya 41 - Krio Fɔs Oli Baybul

Di Ashɔrans We PAPA GƆD gi Izrɛl

¹ Una lisin mi kwayɛt wan, una di kɔntri dɛn we de nia di si, lɛ di neshɔn dɛn gɛda dɛnsɛf; lɛ dɛn kam nia, dɔn lɛ dɛn tɔk; lɛ wi kam togɛda fɔ jɔjmɛnt.

² Udat shek pɔsin kɔmɔt na di ist we viktri de mit am ɛni mas we i mas? I mek neshɔn dɛn sɔrɛnda bifo am so dat i de sɔprɛs kiŋ dɛn; i de mek dɛn lɛk dɔst wit in sɔd, ɛn lɛk chaf we briz de blo go, wit in bo ɛn aro.

³ I rɔnata dɛn ɛn pas sef wan, na rod dɛn we in fut nɔ waka wande.

⁴ Na udat dɔn wok ɛn du dis kayn tin, de kɔl di jɛnareshɔn dɛn nem frɔm di biginin? Na mi, PAPA GƆD we na di fɔs, ɛn di las; na mi na Im.

⁵ Dɛn kɔntri we de nia wata dɔn si ɛn de fred, usay di wɔl tap, de trimbul; dɛn dɔn gɛda kam nia.

⁶ Ɔlman de ɛp in neba, ɛn de tɛl in brɔda se, “bɔk ɔp!”

⁷ Di man we de wok wit in an de ɛnkɔrej di goldsmit, ɛn di wande de smut wit ama, de ɛnkɔrej di wan we de nak di anvil, ɛn de tɔk bɔt di soda we I soda se, “I sabi wok;” ɛn dɛn nel am so dat dɛn nɔ go ebul muf am.

⁸ Bɔt yu Izrɛl, we na mi wokman, Jekɔb we a dɔn pik, dɛn na Ebram we na mi padi, in pikin dɛm;

⁹ Yu we a tek kɔmɔt usay di wɔl tap, ɛn kɔl yu kɔmɔt na di fa fa kɔna dɛn, de tɛl yu se, “Yu na mi wokman, a dɔn pik yu ɛn nɔ trowe yu”;

¹⁰ Nɔ fred, bikɔs a de wit yu, nɔ pwɛl at, bikɔs mi na yu Gɔd; a go gi yu trɛnk, a go ɛp yu, a go ol yu ɔp wit mi raytan we de win ɔltɛm.

¹¹ A de tɛl yu, ɔl dɛn wan we vɛks pan yu bad bad wan go shem ɛn go sɔprayz; Dɛn wan we de fɛt yu go tan lɛk natin ɛn day.

¹² Yu go luk fɔ di wan dɛn we de fɛt yu, bɔt yu nɔ go si dɛm; dɛn wan we mek wa pan yu go tan lɛk natin.

¹³ Bikɔs, mi PAPA GƆD we na yu Gɔd, ol yu raytan; na mi de tɛl yu se, “Nɔ fred, A go ɛp yu.”

¹⁴ Nɔ fred, yu Jekɔb we na wɔrɔm, una di man dɛn na Izrɛl! PAPA GƆD se, a go ɛp una; di wan we de sev una na di Oli Wan na Izrɛl.

¹⁵ Luk, a go mek una di mashin fɔ bit kanda kɔmɔt pan rɛs, we nyu ɛn shap, ɛn gɛt tit; Una go wok pan di mawnten dɛn ɛn nyamanyama dɛn, ɛn una go mek di il dɛn tan lɛk chaf chaf;

¹⁶ una go fana dɛm, ɛn briz go blo dɛn go, ɛn ebi ebi tinada go skata dɛn. Ɛn yu go gladi insay PAPA GƆD; nainsay di Oli Wan na Izrɛl, una go glori.

¹⁷ Wɛn po pipul ɛn dɛn wan we nɔ gɛt de fɛn wata, ɛn wata nɔ de, ɛn dɛn tɔŋ dɔn dray wit tɔsti, Mi we na PAPA GƆD go ansa dɛm, Mi we na di Gɔd na Izrɛl, nɔ go tɔn mi bak pan dɛn.

¹⁸ A go opin riva dɛn na dɛn dray mawnten, ɛn wata go bɔs ɔnda grɔn, shut ɔp midul dɛn vali; A go tɔn di dray ɛn ɛmti ples to watasay, ɛn wata go de bɔs ɔnda grɔn na di dray land.

¹⁹ A go put sida, akeshia, matul ɛn ɔliv tik dɛn, na di dray ɛn ɛmti ples; A go put sayprɛs, plen ɛn payn tik dɛn togɛda na di dray ɛn ɛmti ples we pipul nɔ go ebul tap;

²⁰ so dat mɔtalman go si ɛn no, ɛn kɔnsida ɛn ɔndastand togɛda, se, na PAPA GƆD in an dɔn du dis, na di Oli Wan na Izrɛl, dɔn mek am.

Di Chalenj We PAPA GƆD Chalenj Dɛn laylay gɔd

²¹ PAPA GƆD se, una mek una kes, Jekɔb in kiŋ se, briŋ yu ɛvidɛns.

²² Lɛ dɛn briŋ dɛm, ɛn tɛl wi wetin gɛt fɔ apin. Tɛl wi wetin bin dɔn apin, tɛl wi bɔt dɛn, mek wi go tink bɔt dɛm, so dat wi go no aw dɛn pas; ɔ mek wi no wetin gɛt fɔ apin.

²³ Tɛl wi wetin gɛt fɔ bi tumara; so dat wi go no se una na god dɛm; una du gud or du bad lɛ wi go pwɛl at ɛn fred bad bad wan.

²⁴ Luk, una na natin, ɛn una wok na natin; di wan we pik una, nain na di bad bad tin we PAPA GƆD nɔ lɛk.

²⁵ A shek pɔsin kɔmɔt na di nɔt, ɛn i dɔn kam, kɔmɔt usay di san de kan ɔp, ɛn i go de pre to mi; I go mas mas di rula dɛm na pɔtɔ pɔtɔ kle, lɛk we man we de wok wit kle, kin de mas mas am.

²⁶ Udat bin tɔk am frɔm di biginin, lɛ wi go no, ɛn bifo di tɛm, lɛ wi go se “I rayt”? Nɔbɔdi nɔ de we bin tɔk am, nɔbɔdi nɔ bin anawns am, nɔbɔdi nɔ bin yɛri wetin yu se.

²⁷ Na mi fɔs bin tɔk am to Zayɔn ɛn a gi Jerusɛlɛm wan mɛsenja wit gud nyuz.

²⁸ Bɔt wɛn a luk, nɔbɔdi nɔ de; pan ɔl dɛn wan ya, nɔn advaysa nɔ de we, wɛn a aks ɛnitin, go gi mi ansa.

²⁹ A de tɛl yu, dɛn ɔl na laylay; dɛn nɔ ebul du natin; dɛn laylay gɔd dɛm na lɛk ɛmti briz.