Ayzaya 40 - Krio Fɔs Oli Baybul

Wɔd Dɛn Fɔ Gi Op

¹ Una koks, una koks mi pipul dɛn na so una Gɔd se.

² Tɔk saful saful to Jerusɛlɛm, ɛn tɛl am se in wa dɔn dɔn, dɛn dɔn padin in sin, se i dɔn gɛt dɔbul pɔnishmɛnt na PAPA GƆD in an fɔ ɔl in sin dɛm.

³ Wan vɔys de ala se: “Mek we fɔ PAPA GƆD na di dray ɛn ɛmti ples we natin nɔ de, Mek wan men rod tret wan fɔ wi Gɔd na di ɛmti ples we pɔsin nɔ go ebul tap.

⁴ Ɔl dɛn vali go fulɔp; ɛn ɔl dɛn mawnten ɛn dɛn il dɛn go flat; di grɔn we nɔ lɛbul, go lɛbul, ɛn di rɔf ples dɛm go mek fayn.

⁵ Ɛn dɛn go mek ɔlman no bɔt PAPA GƆD in glori, ɛn ɔlman na wɔl go si am togɛda, bikɔs na PAPA GƆD in mɔt dɔn tɔk am.”

⁶ Wan vɔys de se “Ala!” Nain a se “wetin a go ala se?” Ɔl mɔtalman na gras, ɛn ɔl in fayn we i fayn, na lɛk flawa na fil.

⁷ Di gras de wida, di flawa de fed, wɛn PAPA GƆD blo pan am; fɔ tru, di pipul dɛn na gras.

⁸ Di gras de wida, ɛn di flawa de fed; bɔt PAPA GƆD in wɔd go tinap sote go.

⁹ Go ɔp na wan ay mawnten, Yu Zayɔn mɛsenja we de briŋ gud nyuz; ala wit trɛnk; Yu Jerusɛlɛm mɛsenja we de briŋ gud nyuz, ala, nɔ fred; tɛl di siti dɛn na Juda se, “Una luk una Gɔd!”

¹⁰ Una luk, Papa Gɔd we na Gɔd de kam wit pawa, ɛn nain an de rul fɔ am; luk, di pe we i de pe pɔsin fɔ di gud we i du, de wit am, ɛn di kɔmpɛnset we i de kɔmpɛnset, de wit am.

¹¹ I go fid in ship dɛm lɛk shɛpad, i go gɛda di ship pikin dɛn nain an, I go bɔn dɛm nain buzɔm, ɛn i go tek tɛm lid di kombra dɛn.

Izrɛl Dɛn Gɔd We Dɛn Nɔ De Kɔmpia Wit Ɛnitin

¹² Udat dɔn mɛnshɔ di si dɛn nain an wande, ɛn mek di skay de fa frɔm grɔn, gɛda ɔl di dɔti na wɔl wan say ɛn we di mawnten dɛn na skel, ɛn di il dɛn na balans?

¹³ Udat dɔn dayrɛkt PAPA GƆD in spirit wande, ɔ dɔn bi in advaysa ɛn dɔn tɛl am wetin fɔ du?

¹⁴ Udat I ɛva aks we sho am sɔntin, ɛn udat sho am aw fɔ trit tu pipul di sem, ɔ tich am mek i no tin, ɛn sho am aw fɔ ɔndastand sɔntin?

¹⁵ Biliv mi, di neshɔn dɛn na lɛk wan drɔp wata na bokit to am, ɛn I si dɛn lɛk dɔst na skel; Luk, i es ɔp di ayland dɛm lɛk fayn dɔst.

¹⁶ Libanɔn nɔ go du fɔ yuz as fuɛl; di animal dɛnsɛf nɔ go du fɔ sakrifays we dɛn de bɔn na faya.

¹⁷ Ɔl di neshɔn dɛm na wɔl na natin bifo am, I si dɛn lɛk wetin wɔs pas natin ɛn ɛmti kpatakpata.

¹⁸ Udat naw yu go se tan lɛk PAPA GƆD, ɔ wetin yu go kɔmpia am wit?

¹⁹ Lay lay gɔd! Na wokman mek am, ɛn goldsmit kɔba am wit gold, ɛn mek silva chen dɛn fɔ am.

²⁰ Di wan we po, de pik wud we nɔ de rɔtin fɔ gi ɔfrin; i fɛn wan masta sabi wokman fɔ mek imej we nɔ go fɔdɔm.

²¹ Yu nɔ no yet? Yu nɔ dɔn yɛri? Dɛn nɔ bin dɔn tɛl yu frɔm di biginin? Yu nɔ bin dɔn ɔndastand frɔm we di wɔl bigin?

²² Nain sidɔm pantap di wɔl, ɛn di wan dɛn we de na di wɔl tan lɛk grasɔpa; in we opin di skay lɛk winda kɔtin, ɛn prɛd dɛn lɛk tɛnt fɔ tap;

²³ di wan we de tɔn bigman dɛn to natin, ɛn mek di rula dɛn na di wɔl tɔn nɔbɔdi.

²⁴ Dɛn nɔ plant dɛn gud yet sɛf, dɛn nɔ ib dɛn sid dɔn yet sɛf, dɛn nɔ trɔŋ na grɔn yet sɛf, we i blo pan dɛn, ɛn dɛn wida, ɛn di ebi ebi briz kɛr dɛn go lɛk dray gras.

²⁵ Di Oli wan se, Udat una go kɔmpia mi wit, we una go se a fiba?

²⁶ Es yu yay ɔp ɛn si: udat mek dɛn wan ya? In we de pul di san mun ɛn sta dɛn, ɛn kɔnt dɛn, de kɔl dɛn ɔl bay nem; bikɔs i gɛt trɛnk bad bad wan, ɛn gɛt pawa bad bad wan nɔn pan dɛn nɔ lɔs.

²⁷ Wetin mek yu de se, E Jekɔb, ɛn tɔk se E Izrɛl, “Mi we ayd pan PAPA GƆD, ɛn mi Gɔd nɔ de gi mi mi rayt.”?

²⁸ Yu nɔ no yet? Yu nɔ dɔn yɛri? PAPA GƆD na di Gɔd we de sote go, na im mek di wanol wɔl. I nɔ de wik, i nɔ de taya pɔsin nɔ de ebul fɛnɔt fɔ no aw I de tink.

²⁹ I de gi di wan we wik, pawa, ɛn di wan we nɔ gɛt trɛnk, i de gi am mɔ trɛnk.

³⁰ Ivin yut dɛn, go wik ɛn taya, ɛn yɔŋman dɛn go fɔdɔm wit bad bad taya;

³¹ bɔt di wan dɛn we biliv PAPA GƆD go gɛt frɛsh trɛnk, dɛn go flay go ɔp wit fɛda lɛk igul, dɛn go rɔn ɛn dɛn nɔ go taya; dɛn go waka ɛn dɛn nɔ go fil wik.