Ayzaya 39 - Krio Fɔs Oli Baybul

Mɛsenja Dɛn Kɔmɔt Babilɔn

¹ Da tɛn de Mɛrodak Baladan, we na kiŋ na Babilɔn, ɛn sɛf na Baladan in bɔypikin, bin sɛn ambasedɔ dɛn wit lɛta ɛn prɛzɛnt to Ɛzikaya, bikɔs i yɛri se i bin sik, bɔt i dɔn wɛl.

² Ɛzikaya tɛl dɛn kabɔ; ɛn sho dɛn usay i kip ɔl in jɛntri, di silva, di gold, di spays dɛm, di dia dia ɔyl, ɔl in wɛpɔn dɛm ɛn ɔl wetin i kip nain sto dɛm. Natin nɔ bin de nain os ɔ in kindɔm we Ɛzikaya nɔ sho dɛm.

³ Nain Ayzaya we na prɔfɛt kam to Kiŋ Ɛzikaya ɛn aks am se, “Wetin dɛn man dɛn ya want? Ɛn usay dɛn kɔmɔt kam to yu?” Ɛzikaya se “Dɛn kɔmɔt na wan fawe kɔntri kam to mi. Dɛn kɔmɔt Babilɔn.”

⁴ Nain i aks se, “Wetin ɛn wetin dɛn si insay yu os? “Ɛzikaya ansa se, “Dɛn dɔn si ɔl wetin de na mi os; natin nɔ de na mi sto dɛm we a nɔ sho dɛm.”

⁵ Nain Ayzaya tɛl Ɛzikaya se, “Yɛri wetin PAPA GƆD Ɔlmayti se:

⁶ A de tɛl yu, di tɛm de kam we dɛn go kɛr ɔl wetin de na yu os, ɛn ɔl wetin yu fɔstɛmpapa dɛm dɔn gɛda te to dis de yaso, go Babilɔn; natin nɔ go lɛf, na so PAPA GƆD se.

⁷ Ɛn dɛn go kɛr sɔm pan yu bɔypikin dɛn we yu bɔn, go; ɛn dɛn go tɔn dɛn to okobo na di kiŋ na Babilɔn in pales.”

⁸ Naim Ɛzikaya tɛl Ayzaya se, “PAPA GƆD in wɔd we yu dɔn tɔk, gud.” Bikɔs in bin tink se, “Wanwɔd ɛn sikyɔriti go de mi yon tɛm.”