Ayzaya 31 - Krio Fɔs Oli Baybul

PAPA GƆD go Protɛkt Jerusɛlɛm

¹ Swɛ go fɔdɔm pan dɛn wan we de go na Ijipt fɔ mek dɛn ɛp dɛm ɛn abop pan ɔs, we abop pan chariɔt bikɔs dɛn plɛnti ɛn pan di man dɛm we de rayd ɔs bikɔs dɛn gɛt trɛnk bad, bɔt dɛn nɔ de luk to Izrɛl in Oli Wan ɔ fɛnɔt to PAPA GƆD!

² Pan ɔl we i gɛt sɛns ɛn i de briŋ big waala, wetin i dɔn se, i nɔ de chenj am, bɔt i go tinap agens dɛn wikɛd pipul dɛn, ɛn agens di wan dɛn we de ɛp pipul we de kɔmit sin.

³ Di Ijipshian dɛn na mɔtalman, dɛn nɔto Gɔd; ɛn dɛn ɔs na flɛsh ɛn blɔd, ɛn nɔto spirit. We PAPA GƆD tret in an, di wan we de ɛp go bɔkfut, ɛn di wan we dɛn ɛp go fɔdɔm, ɛn dɛn ɔl go day togɛda.

⁴ Bikɔs na dis PAPA GƆD tɛl mi, Lɛk we layɔn ɔ yɔŋ layɔn de grɔmbul we i kech tin fɔ it, ɛn we dɛn shɛpad dɛn fɔ gɛda go atak am, di ala we dɛn de ala nɔ de skyad am ɛn dɛn nɔys nɔ de shek am, Na so PAPA GƆD Ɔlmayti go kam dɔn fɔ fɛt na Mawnt Zayɔn ɛn nain il.

⁵ Lɛk bɔd we de flay flay rawnd, na so PAPA GƆD Ɔlmayti I go protɛkt Jerusɛlɛm; I go protɛkt am ɛn mek nɔbɔdi nɔ tɔch am, I go sɔri fɔ am ɛn sev am.

⁶ Una dɛn Izɛrlayt dɛn, una put at bak to di wan we una bin dɔn tɔn una bak pan ɛn nɔ gɛt natin fɔ du wit am.

⁷ Bikɔs da de de, ɔlman go trowe in silva ɛn gold laylay gɔd, we una an dɔn tek sin mek fɔ una.

⁸ “Ɛn sɔd go kil Asirian, nɔto mɔtalman; na sɔd, nɔto mɔtalman go kil am; ɛn i go rɔnawe frɔm di sɔd, ɛn dɛn go mek in yɔŋman dɛn go wok bay fos.

⁹ In rɔk go rɔnawe go wit fred, ɛn in ofisa dɛn go rɔnawe lɛf dɛn post wit fred,” na so PAPA GƆD we in faya de na Zayɔn se, ɛn di wan we in big big ovin de na Jerusɛlɛm.