Ayzaya 3 - Krio Fɔs Oli Baybul

Kɔnfyushɔn Na Jerusɛlɛm

¹ PAPA GƆD, we na PAPA GƆD Ɔlmayti, de pul kɔmɔt Jerusɛlɛm ɛn Juda, dɛn sɔplay ɛn dɛn sɔpɔt, di it we dɛn fɔ it, ɛn di wata we dɛn fɔ drink,

² di pawaful man ɛn di soja, di jɔj ɛn di prɔfɛt, di luk grɔn man ɛn di bigman,

³ di kapten fɔ fifti soja man, ɛn di man we gɛt ay rank, di advaysa ɛn di kɔni kɔni majikman ɛn di man we sabi ple wit mɛrɛsin.

⁴ Ɛn a go mek yɔŋ bɔbɔ dɛn tɔn di bigman dɛn, ɛn lili pikin go rul dɛm.

⁵ Ɛn pipul dɛn go tek advantej pan dɛn dɛnsɛf, ɛn pan dɛn kɔmpin ɛn pan dɛn neba; dɛn yɔŋ wan dɛm go fityay big wan dɛm ɛn di yuslɛs man go fityay di bigman.

⁶ We wan man go grip in brɔda nain papa os, se, “Yu gɛt kot fɔ wɛr; yu go bi wi lida, ɛn di broko os go de ɔnda yu pawa”;

⁷ da de de, i go tɔk se “A nɔ go mɛn una o: bred ɔ klos sɛf nɔ de na mi os; una nɔ go mek mi lida fɔ di pipul.”

⁸ Jerusɛlɛm dɔn bɔk in fut, ɛn Juda dɔn fɔdɔm; bikɔs di tin we dɛn de tɔk, ɛn di tin we dɛn de du, de agens PAPA GƆD, dɛn nɔ de rɛspɛkt di pawa pan in glori.

⁹ Di pashal we dɛn pashal go pul dɛn sikrit na do, dɛn de anawns dɛn sin lɛk Sɔdɔm, dɛn nɔ de ayd am sɛf. Swɛ go fɔdɔm pan dɛm! Bikɔs dɛn dɔn bay denja pak am pan dɛnsɛf.

¹⁰ Tɛl dɛn wan we de waka tret se ɔltin go fayn fɔ dɛn, bikɔs dɛn go it wetin dɛn plant

¹¹ swɛ go fɔdɔm pan dɛm, dɛn wikɛd pipul. I go bad fɔ dɛm, bikɔs na wetin dɛn du dɛn go tɔn gi dɛm bak.

¹² Mi pipul dɛn na pikin dɛn de mek mi pipul dɛn sɔfa so, ɛn na uman dɛn de rul dɛm. E mi pipul dɛm, na una lida dɛn de mislid una ɛn miks ɔp di rod we una fɔ pas na layf.

PAPA GƆD Jɔj In Pipul Dɛn

¹³ PAPA GƆD dɔn rɛdi fɔ di kes, I dɔn tinap fɔ jɔj in pipul dɛm.

¹⁴ PAPA GƆD go kot wit di edman dɛn ɛn di bigman dɛm fɔ in pipul; “Na una dɔn tif ɔltin na di greps gadin, di tin dɛn we una tif na di po pipul dɛn an, de na una os dɛn.

¹⁵ PAPA GƆD Ɔlmayti se, wetin una min we una de mek mi pipul dɛn sɔfa so, ɛn we una de tek advantej pan po pipul?”

Wɔnin Fɔ Di Uman Dɛm Na Jerusɛlɛm

¹⁶ PAPA GƆD se: Bikɔs di uman dɛn na Zayɔn prawd ɛn de lɔŋ dɛn nɛk we dɛn de waka, de luk fɔ man fɔ lidɔm wit, dɛn de spot chɛp chɛp we dɛn de waka, ɛn di baŋuls dɛn de nak na dɛn fut;

¹⁷ PAPA GƆD go put siknɛs pan Zayɔn in gyal pikin dɛn ed, ɛn PAPA GƆD go mek dɛn nekɛd.

¹⁸ Da de de, PAPA GƆD go pul di fayn fayn baŋuls kɔmɔt na dɛn fut, di ɛdban we dɛn de put rawnd dɛn ed, ɛn di kɔrɔnɛt dɛm;

¹⁹ di chen dɛm, di breslɛt ɛn di skaf dɛn;

²⁰ di ɛnkincha, di baŋuls we dɛn de wɛr ɔp dɛn an, di sash, di pafyum bɔks dɛn ɛn di tin dɛn we pɔsin kin wɛr ɔp in an fɔ protɛkshɔn;

²¹ riŋ we gɛt dizayn, ɛn nos riŋ dɛn,

²² di klos dɛn fɔ wɛr fɔ fɛstival, di gawn dɛm, di lɔŋ kot dɛm, ɛn di anbag dɛm;

²³ klos dɛn we dɛn mek wit les, di klos dɛn we dɛn tek linin mek, di tɔban ɛn di vel dɛm.

²⁴ Bifo una gɛt pafyum, na bad bad sɛnt una go de gɛt; bifo una gɛt gadul, na rop go de; bifo una gɛt ia we mek fayn fayn wan, na bɔled dɛn go gɛt bifo dɛn gɛt dɛn dia dia klos, na saklɔth dɛn go tay; bifo dɛn fayn, na shem dɛn go shem.

²⁵ Na sɔd go kil una man dɛn ɛn una pawaful fɛtman dɛn go day na wa.

²⁶ Ɛn in get dɛn go kray de munin; in go sidɔm na grɔn lɛk udat dɔn lɔs ɔltin na layf.