Ayzaya 29 - Krio Fɔs Oli Baybul

Wetin Go Apin To Jerusɛlɛm

¹ E Eriɛl, Eriɛl, di siti we Devid mek in kamp! Ad wan ia to in kɔmpin lɛ di fist dɛn ɔl kam ɛn go wan bay wan.

² Stil a go mek trɔbul mit Eriɛl, ɛn na soso pini ɛn bita bita kray go de de; ɛn i go tan to mi lɛk ɔlta fayasay.

³ Ɛn a go kamp rawnd yu ɛn a go blɔk yu rawnd wit tawa dɛm ɛn a go bil wɔl rawnd we go blɔk yu.

⁴ Dɔn na frɔm ɔnda ɔnda di grɔn yu go tɔk, na frɔm bɔtɔm di dɔst yu wɔd dɛn go kɔmɔt; yu vɔys go kɔmɔt na grɔn lɛk gost vɔys, ɛn yu go tɔk kwayɛt wan kɔmɔt na di dɔst.

⁵ Bɔt una bɔku bɔku ɛnimi dɛn go tan lɛk smɔl dɔst, ɛn dɛn bɔku bɔku pipul we nɔ de luk biɛn fɔ du bad, go tan lɛk chaf chaf we briz de blo. Ɛn bifo Jako kɔt yay, wantɛm wantɛm,

⁶ PAPA GƆD Ɔlmayti go go sɛn tɛnda ɛn atkwek ɛn bi-big nɔys pan una, wit da traŋa briz we de tɔn wan ples ɛn grap, ɛn ɛlɛba ɛlɛba briz ɛn di faya we nɔ de lɛf natin.

⁷ Ɛn di bɔku bɔku neshɔn dɛn we de fɛt Eriɛl, ɔl di wan dɛn we de fɛt in ɛn di ples we i abop, ɛn distrɛs, go tan lɛk drim, lɛk vishɔn na nɛt.

⁸ Lɛk we man we aŋri drim se i de it ɛn wek wit di aŋri stil de pan am, ɔ wɛn man we tɔsti drim se i de drink ɛn wek wik wan, wit tɔsti stil de pan am, na so dɛn bɔku bɔku neshɔn we de fɛt mawnt Zayɔn, go tan.

Wɔnin Dɛn We Pipul Dɛn Nɔ Lisin

⁹ Drink bɔku rɔm ɛn mek unasɛf styupid, blɛn yusɛf ɛn mek unasɛf blɛn! Drɔnk we nɔto wayn una drink; staga we nɔto traŋa rɔm mek una staga.

¹⁰ Bikɔs PAPA GƆD dɔn put, spirit we de mek pɔsin slip dip dip wan, pan una, ɛn i dɔn lɔk una yay, una di prɔfɛt dɛm, ɛn i dɔn kɔba una ed, una di lukgrɔn man dɛm.

¹¹ Ɛn di vishɔn bɔt ɔl dis tan to una lɛk di wɔd dɛm na buk we lɔk. We pipul dɛn gi am to pɔsin we sabi rid se, “Rid dis,” i go se, “A nɔ go ebul bikɔs i lɔk”

¹² Bɔt wɛn dɛn gi di pɔsin we nɔ sabi rid se, “Rid dis” in se “A nɔ sabi rid.”

¹³ Ɛn PAPA GƆD se: “Bikɔs dɛn pipul ya kam nia mi wit dɛn mɔt ɛn ɔna mi wit dɛn lip, we dɛn at nɔ de to mi, ɛn di fred we dɛn de fred mi, na mɔtalman lɔ we dɛn kram;

¹⁴ fɔseka dat, a go du tin wit dɛn pipul ya we dɛn go kɔle pan, wɔndaful tin we dɛn go kɔle pan; ɛn di sɛns we dɛn sɛnsman dɛn gɛt go dɔn, ɛn di no we dɛn man dɛn we de no wetin gɛt fɔ apin, go ayd.

Op Fɔ Bambay

¹⁵ Swɛ go fɔdɔm pan dɛm, dɛn wan dɛm we de ayd ayd dɛn plan pan PAPA GƆD, di wan dɛn we de du tin na dak, ɛn de se “udat de si wi? Udat no wi?”

¹⁶ Una de tɔn tin dɛn ɔpsay dɔŋ! Di man we de wok wit kle, dɛn go luk am lɛk kle; di tin we i mek go tɔk bɔt di wan we mek am se, “nɔto in mek mi”; ɔ di tin we dɛn mek go tɔk bɔt di wan we mek am se “I nɔ gɛt sɛns.”?

¹⁷ Nɔto smɔl tɛm lɛf fɔ Libanɔn go tɔn fil we de bia frut, ɛn dɛn go si di fil we de bia frut lɛk tik tik bush?

¹⁸ Da de de, dɛf yes man go yɛri wetin dɛn go rid na buk, ɛn insay dɛn pwɛl at ɛn daknɛs, blɛnyay man go si.

¹⁹ Dɛn wan we put dɛn yay dɔŋ go gɛt frɛsh gladi gladi insay PAPA GƆD ɛn di po wan dɛn pan mɔtalman, go gladi insay di Oli Wan na Izrɛl.

²⁰ Bikɔs di wan we de du tin nɔ luk biɛn, go kam to natin ɛn di man we de provok, go tap, ɛn dɛn go kɔt ɔf ɔl dɛn wan we de wach fɔ du bad,

²¹ we na wan wɔd i go tɔk, i go put pɔsin pan trɔbul, ɛn sɛt trap fɔ di wan we de tɔk di rayt wɔd na kɔt, ɛn wit kes we i nɔ gɛt rayt, kin win di wan we gɛt rayt.

²² Na dat mek PAPA GƆD we ridim Ebram, tɔk bɔt Jekɔb in os, se: “Jekɔb nɔ go shem igen, pwɛl at nɔ go sho nain fes igen

²³ Bikɔs wɛn i go si in pikin dɛm, we na mi mek, dɛn de wit am, dɛn go mek mi nem oli; dɛn go mek Jekɔb in Oli Wan oli, dɛn go fred Izrɛl dɛn Gɔd.

²⁴ Ɛn dɛn wan we dɔn mek mistek, go kam fɔ ɔndastand, ɛn dɛn wan we de grɔmbul go gri du wetin dɛn se fɔ du.