Ayzaya 26 - Krio Fɔs Oli Baybul

PAPA GƆD Go Gi In Pipul Dɛn Viktri

¹ Da tɛm de, dɛn go siŋ dis siŋ na Juda; “We siti traŋa; i tek salveshɔn mek wɔl ɛn protɛkshɔn.

² Opin di get dɛm, si dat di neshɔn we de waka tret wit PAPA GƆD ɛn biliv pan am go kam insay.

³ Yu de mek pɔsin we in maynd de to yu de wit kol at, bikɔs i biliv pan yu.

⁴ Biliv pan PAPA GƆD sote go, bikɔs Papa Gɔd we na Gɔd na lɛk akpata we de sote go.

⁵ I dɔn briŋ di pipul dɛn we bin de ɔp di ay siti, kan dɔŋ. I briŋ am kan dɔŋ, dɔŋ na grɔn ɛn ib am na dɔti.

⁶ Fut dɛn mas mas am, po man in fut, di wan dɛn we nɔ gɛt, waka pan am.”

⁷ Layf lɛvul fɔ pɔsin we de waka tret wit PAPA GƆD; na yu mek di pipul we de waka tret wit yu, dɛn rod, smut na layf.

⁸ Na di rod fɔ yu jɔjmɛnt dɛn wi de wet fɔ yu E PAPA GƆD; wetin wi sol want bad bad wan na fɔ de mɛmba yu nem.

⁹ Mi sol kin aŋri fɔ yu na nɛt, mi spirit we de insay mi de luk fɔ yu. Bikɔs we yu jɔjmɛnt dɛn de na wɔl, di pipul dɛn na wɔl de lan fɔ waka tret wit yu.

¹⁰ If dɛn du gud fɔ wikɛd pɔsin, i nɔ go lan fɔ waka tret wit PAPA GƆD; i de du tin we nɔ rayt na soba pipul dɛn land ɛn i nɔ de si PAPA GƆD we na kiŋ we pas ɔl, in rɛspɛkt

¹¹ PAPA GƆD, yu an de ɔp bɔt dɛn nɔ de si am atɔl. Lɛ dɛn si yu zil fɔ yu pipul dɛm mek dɛn go shem. Lɛ di faya fɔ yu ɛnimi dɛn, bɔn dɛn.

¹² PAPA GƆD, yu go mek wi gɛt pis, yu dɔn wok ɔl wi wok fɔ we.

¹³ PAPA GƆD we na wi Gɔd, ɔda masta dɛm apat frɔm yu bin dɔn rul wi, bɔt na yu nem nɔmɔ wi gri fɔ.

¹⁴ Dɛn dɔn day, dɛn nɔ go liv; dɛn na gost, dɛn nɔ go grap; na dat mek yu dɔn distrɔy dɛn ɛn mek pipul dɛn nɔ mɛmba dɛn igen igen

¹⁵ PAPA GƆD, yu dɔn mek di neshɔn bɔku mɔ, yu dɔn mek di neshɔn gro; yu dɔn gɛt glori; yu dɔn ad pan ɔl di bɔda dɛn na di land.

¹⁶ PAPA GƆD, nainsay dip trɔbul dɛn bin de we dɛn de fɛn yu, dɛn bin pre to yu wit ɔl dɛn at, we yu bin de kɔrɛkt dɛm.

¹⁷ Lɛk uman we gɛt bɛlɛ we de twis twis ɛn ala de kray we i de fil pen, wɛn in tɛm dɔn de rich fɔ bɔn, na so wi bin de du bikɔs ɔf yu PAPA GƆD;

¹⁸ wi bin gɛt bɛlɛ, wi bin de twis twis, bɔt as i bi, i tan lɛk na briz wi bɔn. Wi nɔ du natin fɔ ɛp di wɔl, ɛn di wan dɛn we tap na wɔl, nɔ day.

¹⁹ Una dayman dɛn go gɛt layf, dɛn bɔdi go grap. Una we de na grev, una wek ɛn siŋ wit jɔy! Bikɔs una dyu, na dyu we gɛt layt, ɛn una go mek i fɔdɔm na di land we gost de.

Jɔjmɛnt Ɛn Fɔ Briŋ Pipul Bak To PAPA GƆD

²⁰ Mi pipul dɛm, una kam insay una rum dɛm ɛn lɔk una do dɛm; una ayd unasɛf lili wayl te di veksteshɔn dɔn.

²¹ Bikɔs PAPA GƆD de kɔmɔt nain ples kan na do fɔ pɔnish di pipul we tap na wɔl fɔseka dɛn sin, ɛn di wɔl go pul di sikrit bɔt di blɔd we dɛn dɔn shɛd pan am, ɛn i nɔ go kɔba di wan dɛn we dɛn kil, igen.