Ayzaya 25 - Krio Fɔs Oli Baybul

Im Fɔ Prez

¹ PAPA GƆD, yu na mi Gɔd; a go es yu ɔp ɛn a go prez yu nem; bikɔs yu dɔn du wɔndaful tin dɛm, plan dɛn we dɛn mek lɔntɛm, yu kip yu wɔd ɛn dawt nɔ de de.

² Bikɔs yu dɔn tɔn di siti to dɔti ip, di siti we gɛt protɛkshɔn dɔn broko broko; dɛn fɔrina dɛn kiŋ os nɔto siti igen, dɛn nɔ go eva bil am bak.

³ Na dat mek traŋa pipul dɛm go glorifay yu; dɛn siti we pipul dɛn we de du bad ɛn nɔ luk biɛn, tap, go fred yu.

⁴ Bɔkɔs na yu po man abop pan, di pɔsin we di wan we nɔ gɛt, abop pan we i gɛt prɔblɛm, di wan we de ayd pipul wɛn tinada de blo, ɛn di wan we de kɔba pipul we san wam; bikɔs wɛn dɛn wan we de du bad ɛn nɔ luk biɛn kin shek, i kin tan lɛk we tinada de blo pan wɔl,

⁵ lɛk we dray ples ɔt pasmak. Yu dɔn tap di nɔys we dɛn fɔrina dɛn de mek; lɛk di ɔt we di klawd we kɔba yu de pul, na so dɛn pipul we de du bad ɛn nɔ luk biɛn, dɛn siŋ kin tap.

PAPA GƆD De Mek Big Pati

⁶ Na pantap dis mawnten PAPA GƆD Ɔlmayti go mek big pati fɔ ɔlman wit fat tin dɛn, wit wayn we gɛt kɛtɛkɛmu, fat tin dɛn we gɛt bif midul di bon ɛn wayn we gɛt kɛtɛkɛmu we dɛn tek tɛm pul, lɛ i nɔ miks.

⁷ Ɛn na pan dis mawnten i go pwɛl di tin we kɔba ɔl di pipul dɛn na di wɔl, di vel we prɛd oba ɔl dɛn neshɔn na wɔl.

⁸ I go swɛla day sote go, ɛn Papa Gɔd we na Gɔd go wep wata kɔmɔt na ɔlman yay, ɛn i go pul di tin dɛn we de mek pipul dɛn disgres kɔmɔt na di wɔl; bikɔs na PAPA GƆD dɔn tɔk am.

⁹ Dɛn go tɔk da de de se, “Yɛs, na wi Gɔd dis; wi dɔn wet am lɛ i go sev wi. Dis na PAPA GƆD; wi dɔn wet am; lɛ wi gladi ɛn gladi fɔ di sev we i sev wi.”

PAPA GƆD Go Pɔnish Moab

¹⁰ Bikɔs PAPA GƆD in an go rɛst pan dis mawnten ɛn i go mas Moab usay i de, lɛk we dɛn de mas mas dray gras na dɔŋ pit.

¹¹ Ɛn i go prɛd in an midul de, lɛk we pɔsin we de swim de skata in an we i de swim. Bɔt PAPA GƆD go brok in prayd ɛn in skil we i gɛt nain an.

¹² Ɛn PAPA GƆD go brok di ay ay wɔl we i de tek protɛkt insɛf, kan dɔŋ na grɔn, ɛn tɔn am to dɔti.