Ayzaya 24 - Krio Fɔs Oli Baybul

PAPA GƆD Go Pɔnish Di Wanol Wɔl

¹ PAPA GƆD go mek natin nɔ lɛf na dis wɔl ɛn nɔbɔdi nɔ go tap de, ɛn i go twis di grɔn ɛn skata di pipul dɛn we tap de.

² Na jɛs lɛk aw i bi to di pipul dɛn, na so i go bi wit di man we de mek sakrifays fɔ pipul sin; aw i bi to di slev, na so i go bi to in masta; aw i bi to di yɔŋ titi we de wok, na so i go bi to in misis; aw i bi to udat de bay, na so i go bi to udat de sɛl; aw i bi to udat de lɛnt, na so i go bi to udat de go lɛnt; aw i bi to udat de trɔs pipul, na so i go bi to udat de go trɔs.

³ Di wɔl go ɛmti kpatakpata ɛn i go pwɛl ɔltogɛda; bikɔs PAPA GƆD dɔn tɔk di wɔd.

⁴ Di wɔl in at de blid ɛn ɔltin de dray, Di wɔl de go biɛn ɛn de dray; Di skay ɛn di grɔn de sɔfa wik togɛda.

⁵ Di grɔn nɔ klin na PAPA GƆD in yay, ɔnda di wan we tap pantap am; bikɔs dɛn dɔn brok di lɔ dɛm, dɛn nɔ du wetin PAPA GƆD se, dɛn dɔn brok di Kɔvinant we na fɔ sote go.

⁶ Fɔseka dat, swɛ de it di wɔl, ɛn di pipul we tap de, de sɔfa bikɔs dɛn gilti; so di wan dɛn we tap de, de bɔn, ɛn na tu tri man dɛn lɛf.

⁷ Di wayn in at de blid, di greps tik de brokat, ɔl dɛn yaŋe yaŋe pipul dɛn de pini.

⁸ Yu nɔ de yɛri di tamborin in api sawnd igen, di nɔys we dɛn pipul we de gladi kin mek, dɔn tap, di gladi sawnd we da instrumɛnt we tan lɛk gita de mek, dɔn tap.

⁹ Dɛn nɔ de drink wayn ɛn siŋ igen; strɔŋ drink dɔn bita to di wan dɛn we de drink am.

¹⁰ Di siti we gɛt kɔnfyushɔn dɔn brok dɔŋ, ɔl di os dɛn lɔk so dat nɔbɔdi nɔ ebul go insay.

¹¹ Pipul dɛn vɛks de ala na trit bikɔs wayn nɔ de; di tin dɛn we de mek pipul dɛn gladi dɔn day; dɛn dɔn drɛb gladi gladi kɔmɔt na di wɔl.

¹² Na ɛmtinɛs ɛn lonlinɛs lɛf na di siti, di get dɛn ɔl dɔn brok brok ɛn pwɛl pwɛl.

¹³ Na so i go bi na di wɔl to di difrɛn neshɔn dɛn; lɛk we greps tik ɛmti we dɛn de pik di tu tri we kin lɛf we dɛn kin dɔn pik ɔltin na di tik dɔn.

¹⁴ Dɛn ala de siŋ wit gladi; fɔseka PAPA GƆD we na kiŋ we pas ɔl, in rɛspɛkt, dɛn de ala na di wɛst.

¹⁵ So, una we de na di ist fɔ glorifay PAPA GƆD; una we de na dɛn kɔntri dɛn we de nia di si, una glorifay PAPA GƆD we na Izrɛl dɛn Gɔd.

¹⁶ Wi de yɛri prez siŋ dɛn de kɔmɔt usay di wɔl tap, siŋ dɛn we de glorifay PAPA GƆD. Bɔt a se “a sik ɛn de lɔs wet, a sik ɛn de lɔs wet. Swɛ dɔn kech mi! Bikɔs rikishi pipul dɛn de du rikishi tin dɛm, rikishi pipul dɛn, de du dɛn bad bad rikishi tin dɛm.

¹⁷ Fred fred, dip ol ɛn trap, de wit una, una di pipul dɛn na di wɔl!

¹⁸ Di wan we rɔn we i yɛri sawnd de mek i fred go fɔdɔm insay di dip ol; ɛn di wan we klem kɔmɔt na di dip ol di trap go kech am. Bikɔs di winda dɛn na evin opin, ɛn di wɔl in fawndeshɔn dɛn, de trimbul.

¹⁹ Di wɔl dɔn brok kpatakpata di wɔl dɔn chɛr tu, di wɔl de shek bad bad wan.

²⁰ Di wɔl de staga lɛk drɔnkɔman i de shek lɛf ɛn rayt lɛk fam os; in sin de pan am ebi ebi wan, ɛn i fɔdɔm, ɛn i nɔ go grap igen.

²¹ Da de de, PAPA GƆD go pɔnish di pawa dɛn na di ɛvin, insay evin, ɛn di kiŋ dɛn na wɔl, insay di wɔl.

²² Dɛn go gɛda dɛn togɛda lɛk jelman dɛn na dip wanol; dɛn go lɔk dɛn ɔp na jel, ɛn afta lɔŋ tɛm, dɛn go pɔnish dɛn.

²³ Di mun go sɔprayz, ɛn di san go shem; bikɔs PAPA GƆD Ɔlmayti go ren na Mawnt Zayɔn ɛn insay Jerusɛlɛm ɛn na frɔnt di bigman dɛn i go sho in pawa.