Ayzaya 22 - Krio Fɔs Oli Baybul

Mɛsej Bɔt Jerusɛlɛm

¹ Wetin PAPA GƆD se bɔt di Vali ɔf Vishɔn. Wetin una min we una se una dɔn go ɔp, una ɔl dɔn go ɔp pantap di os dɛn,

² una we ɔltɛm na so so ala ala una de pan, siti we pak wit nɔys, siti we lɛk gladi gladi? Una we nɔto sɔd ɔ wa kin kil di wan dɛn we de day pan una.

³ Ɔl una rula dɛn dɔn rɔnawe togɛda, ɔl we dɛn nɔ ol bo ɛn aro, dɛn kapchɔ dɛn. Dɛn kapchɔ una ɔl we dɛn fɛn, ɔl we dɛn bin dɔn rɔnawe go fawe.

⁴ Na dat mek a se: “Nɔ luk mi lɛf mi mek a kray bita bita wan; nɔ waala yusɛf fɔ koks mi fɔseka di nyakanyaka we dɛn nyakanyaka mi pipul dɛn gyal pikin.”

⁵ Bikɔs PAPA GƆD Ɔlmayti gɛt in yon de fɔ ala ala ɛn fɔ mas mas pipul ɛn fɔ mek kɔnfyushɔn na di Vali ɔf Vishɔn, fɔ bata wɔl kan dɔŋ ɛn fɔ ala to dɛn mawnten dɛn.

⁶ Ɛn Ilam bɔn dɛn bo ɛn aro bag wit chariɔt dɛm ɛn man dɛn we de rayd ɔs, ɛn di land ɔf Kir pul di kɔba klos pan dɛn big shild dɛn.

⁷ Di vali dɛn we una lɛk pas ɔl, ful wit chariɔt, ɛn man dɛn we de rayd ɔs, tinap na di get dɛn.

⁸ I dɔn pul Juda in kɔba klos kɔmɔt. Na da de de una bin abop pan di wɛpɔn na di Fɔrɛst Os,

⁹ ɛn una bin si se di say dɛn we pwɛl na di wɔl dɛn na Devid in siti, bin plɛnti, ɛn una bin de gɛt wata na di watasay we de dɔŋ say,

¹⁰ ɛn una bin kɔnt di os dɛn na Jerusɛlɛm, ɛn una bin brok di os dɛn fɔ mek di wɔl go traŋa.

¹¹ Una dig say fɔ gɛda ɛn kip wata bitwin di tu wɔl fɔseka di ol watasay. Bɔt una nɔ bin abop to di wan we du am ɔ gɛt rɛspɛkt fɔ di pɔsin we bin dɔn plan am lɔlɔntɛm.

¹² Da de de, PAPA GƆD Ɔlmayti bin se ɔlman fɔ kray ɛn fil sɔri, fɔ krep ed ɛn wɛr saklɔth;

¹³ bɔt wetin apin? Jɔy ɛn gladi gladi, de kil kaw ɛn kil ship, de it bif ɛn drink wayn. “Lɛ wi it ɛn drink bikɔs wande, wi gɛt fɔ day.”

¹⁴ PAPA GƆD Ɔlmayti dɔn sho insɛf na mi yes: “Fɔ tru, a nɔ go fɔgiv una fɔ dis sin we yu dɔn kɔmit te te una day.” Na so PAPA GƆD Ɔlmayti se.

Dɛn Wɔn Shɛbna

¹⁵ Na dis PAPA GƆD Ɔlmayti se, “Kam, go to di stiwɔd na Shɛbna, we de inchaj ɔf di os, ɛn aks am se:

¹⁶ Wetin yu gɛt fɔ du na ya ɛn udat yu gɛt na ya, we yu dɔn dig grev fɔ yusɛf, yu we dɔn dig grev fɔ unasɛf ɔp di il ɛn dɔn kav ples fɔ yusɛf fɔ tap na dɛn big big ston?

¹⁷ A de tɛl yu, PAPA GƆD go es ɛn trowe yu wit trɛnk, yu traŋa man. I go bɔkul yu tayt tayt wan,

¹⁸ ɛn tɔn tɔn yu rawnd ɛn rawnd ɛn trowe yu lɛk bɔl na wan big big land; na de yu gɔ day ɛn na de yu fayn fayn chariɔt dɛn go de, yu we de briŋ shem to yu masta in os.

¹⁹ A go push yu kɔmɔt na yu ɔfis wit trɛnk ɛn yu go fɔdɔm kan dɔŋ kɔmɔt na yu wokples.

²⁰ Da de de, a go kɔl Ilayakim we na mi wokman ɛn na Ilkaya in bɔypikin,

²¹ ɛn a go wɛr yu klos pan am ɛn tay yu bɛlt pan am, ɛn go gi am yu pawa; i go bi dadi fɔ di wan dɛn we tap na Jerusɛlɛm, ɛn dadi fɔ Juda.

²² A go put di ki fɔ Devid in os nain an; i go opin, ɛn nɔbɔdi nɔ go lɔk; i go lɔk, ɛn nɔbɔdi nɔ go opin.

²³ A go fasin am lɛk pɛg na ples we wan ambɔgin nɔ go de, ɛn i go bi di tron we gɛt rɛspɛkt, nain papa in os.

²⁴ Di lod nain papa in os go de nain ed; di pikin we dɛn bɔn ɛn di wan we dɛn mɛn, ɛnitin; frɔm dɛn lili kɔp to dɛn big big jɔg.

²⁵ PAPA GƆD Ɔlmayti se, da de de, di pɛg we bin fasin na di ples we wan ambɔgin nɔ de, go kɔmɔt; ɛn dɛn go kɔt am mek i fɔdɔm, ɛn di lod we bin de pan am, go kɔmɔt, bikɔs na PAPA GƆD dɔn tɔk am.”