Ayzaya 2 - Krio Fɔs Oli Baybul

Kol At Sote Go

¹ Di wɔd we Ayzaya, we na Emɔz in bɔypikin bin si bɔt Juda ɛn Jerusɛlɛm.

² Di tɛm go kam we di mawnten na PAPA GƆD in os go bi di mawnten we ay pas ɔl dɛn mawten dɛm ɛn go ay pas ɔl dɛn il dɛm, ɛn ɔlman go go de,

³ Bɔku pipul go kam ɛn tɔk se: ‘Kam, lɛ we go ɔp PAPA GƆD in mawnten, na Jekɔb in Gɔd in os; mek i go tich wi in we so wisɛf go waka aw i want wi fɔ waka.” Bikɔs na zayɔn di lɔ go kɔmɔt, ɛn PAPA GƆD in wɔd go kɔmɔt Jerusɛlɛm.

⁴ I go jɔj bitwin di neshɔn dɛm ɛn go disayd fɔ bɔku pipul dɛm; ɛn dɛn go tɔn dɛn sɔd dɛn to gɔgɔ, ɛn dɛn spia dɛn go tɔn gadin sizɔs wan kɔntri nɔ go tek sɔd fɔ in kɔmpin igen ɛn wa nɔ go de igen.

⁵ E Jekɔb in os, una kam lɛ wi waka na PAPA GƆD in layt.

Dɛn Go Brok Prawd Pipul Fɛda Dɔŋ

⁶ Bikɔs yu dɔn pul an pan yu pipul, we na Jekɔb in os, bikɔs pan dɛn na mɛrɛsinman dɛm we kɔmɔt na di ist ɛn luk grɔn man dɛn, jɛs lɛk di Filistin dɛm, ɛn dɛn de mek padi wit fɔrina dɛm.

⁷ Dɛn grɔn ful wit silva ɛn gold, ɛn dɛn jɛntri nɔ de dɔn; Dɛn ples ful wit ɔs dɛm, ɛn dɛn chariɔt nɔ de dɔn.

⁸ Dɛn ples ful wit laylay gɔd; ɛn dɛn de butu to di tin we dɛn yon an mek, to di tin we dɛn yon finga mek.

⁹ Na so dɛn go ɔmbul mɔtalman, ɛn na so pipul dɛn kin fɔdɔm na layf- nɔ fɔgiv dɛm o!

¹⁰ Go insay di big ston dɛn, ɛn ayd ɔnda di dɔti pan di bad tin we PAPA GƆD go du, ɛn pan di wɔnda pan in pawa.

¹¹ Di kak we mɔtalman de kak, go brok kan dɔŋ, ɛn prawd pɔsin in fɛda go brok kan dɔŋ; ɛn da de de, na PAPA GƆD wangren dɛn go es ɔp.

¹² PAPA GƆD Ɔlmayti gɛt in yon de fɔ dil wit ɔl dɛn prawd wan dɛn ɛn dɛn wan we tink tumɔs bɔt dɛnsɛf, ɛn ɔl di wan dɛn we de es dɛnsɛf ɔp ɛn de kak;

¹³ agens ɔl Libanɔn in ay ɛn mayti sida tik dɛn we pipul dɛn de kɔle pan, agens ɔl di ok dɛn na Beshan;

¹⁴ agens ɔl dɛn ay mawnten dɛn, ɛn dil wit ɔl dɛn ay il dɛn;

¹⁵ agens ɔl dɛn ay tawa ɛn ɔl dɛn wɔl we pipul abop pan fɔ protɛkshɔn;

¹⁶ agens ɔl dɛn ship we kɔmɔt Tashish, ɛn ɔl dɛn fayn fayn tin dɛn we dɛn de tek an mek.

¹⁷ Dɛn go brok prawd mɔtalman in fɛda dɔŋ, ɛn di kak we pipul dɛn de kak go kan dɔŋ; ɛn na PAPA GƆD nɔmɔ dɛn go es ɔp da de de.

¹⁸ Ɛn dɛn nɔ go si ɔl dɛn laylay gɔd dɛn igen

¹⁹ mɔtalman dɛn go go insay di kev dɛn na dɛn big big ston ɛn di ol dɛn na grɔn, fɔ ayd pan di bad bad tin we PAPA GƆD go du, ɛn pan di wɔnda pan in pawa, we i go grap fɔ mek di wɔl fred am.

²⁰ Da tɛm de, pipul dɛn go trowe dɛn silva laylay gɔd ɛn gold laylay gɔd we dɛn mek fɔ dɛnsɛf fɔ wɔship, to dɛn grɔmpig ɛn dɛn bat,

²¹ fɔ rɔn go insay dɛn big kev na dɛn big big ston, ɛn dɛn ol na dɛn mawnten in ɛj, fɔ ayd pan di bad bad tin we PAPA GƆD go du ɛn pan di wɔnda pan in pawa, we i go grap fɔ mek di wɔl fred am.

²² Pul at pan mɔtalman we nain nos i de blo, aftawɔd, wetin na mɔtalman?