Ayzaya 18 - Krio Fɔs Oli Baybul

PAPA GƆD Go Pɔnish Itiopia

¹ E, land we dɛn bɔd dɛn wiŋ de mek sawnd ɔltɛm, we de oba di riva dɛn na Itiopia;

² we de sɛn ambasedɔ dɛn we de pas na Riva Nayl, insay bot dɛn we na papirɔs dɛn tek mek dɛn! Una go, una dɛn mɛsenja we gɛt spid to wan neshɔn we dɛn pipul gɛt ayt ɛn dɛn bɔdi smut, pipul dɛn we dɛn de fred ɔlɔbɔt, neshɔn we pawaful ɛn de kɔnka ɔlsay, we na riva dɛn divayd dɛn land.

³ Una di pipul dɛn na di wɔl, una we tap na di ath, wɛn dɛn es di signal na di mawnten, una luk! Wɛn dɛn blo di trɔmpɛt, una lisin.

⁴ Bikɔs na dis PAPA GƆD tɛl mi; “A go luk kwayɛt wan frɔm usay a tap lɛk we di ples kin ɔt ɛn klia santɛm, lɛk we klawd we gɛt dyu, gɛda santɛm we dɛn kin de avɛst.”

⁵ Bikɔs bifo di avɛst, wɛn flawa tɛm dɔn dɔn, ɛn di flawa dɔn tɔn grep we dɔn rɛp, I go kɔt kɔt di an dɛm wit da sizɔs fɔ tek trim flawa, ɛn i go chap di branch dɛn we prɛd.

⁶ Dɛn ɔl go lɛf to dɛn bɔd we de na dɛn mawnten de ɔntin ɛn kil ɔda animal dɛn fɔ it, ɛn to dɛn animal dɛn we de na di wɔl. Di bɔd dɛn we de ɔntin ɛn kil ɔda animal dɛn fɔ it, go it dɛn durin dray sizin, ɛn di animal dɛn na wɔl go it dɛn ren sizin.

⁷ Da tɛm de, dɛn go briŋ prɛzɛnt dɛn to PAPA GƆD Ɔlmayti frɔm di pipul dɛn we gɛt ayt ɛn dɛn bɔdi smut, pipul dɛn we dɛn de fred ɔlɔbɔt, neshɔn we pawaful ɛn de kɔnka ɔlsay, we na riva dɛn divayd dɛn kɔntri, na Mawnt Zayɔn, di ples we PAPA GƆD Ɔlmayti in nem de.