Ayzaya 17 - Krio Fɔs Oli Baybul

PAPA GƆD Go Pɔnish Siria Ɛn Izrɛl

¹ Wetin PAPA GƆD se go apin to Damaskɔs. A de tɛl una, Damaskɔs nɔ go bi siti igen, ɛn i go tan lɛk ples we broko broko tin dɛn pak.

² Nɔbɔdi nɔ go tap nain siti dɛn sote go, dɛn go tɔn ples fɔ dɛn ship ɛn got, we, we dɛn lidɔm, nɔbɔdi nɔ go mek dɛn fred.

³ Nɔn pan dɛn barik dɛn nɔ go lɛf na Ifrem, ɛn Damaskɔs kindɔm sɛf nɔ go de igen; ɛn di wan dɛn we lɛf na Siria go tan lɛk Izrɛl in pikin dɛn glori; na so PAPA GƆD Ɔlmayti se.

⁴ Da de de, Jekɔb in rɛspɛkt go kam dɔŋ, di fat we de nain flɛsh go ridyus.

⁵ I go tan lɛk we pɔsin we de avɛst dɔn kɔt rɛs ɛn pak am wansay ɛn de pik di rɛs wit in an, ɛn lɛk we pɔsin de gɛda rɛs na Refaim Vali.

⁶ PAPA GƆD we na Izrɛl dɛn Gɔd insay se, af af go lɛf de lɛk we dɛn shek ɔliv tik tu tri bɛri kin lɛf na di branch we ay pas ɔl, fo ɔ fayv kin lɛf na di frut tik in branch dɛn.

⁷ Na da de de mɔtalman go rɛspɛkt dɛn Meka ɛn dɛn go luk to Izrɛl in Oli Wan;

⁸ dɛn nɔ go rɛspɛkt dɛn ɔlta dɛn, we dɛn bil wit dɛn yon an, ɛn dɛn nɔ go abop pan wetin dɛn mek wit dɛn yon finga, lɛk di Ashirim ɔ di ɔlta dɛn fɔ bɔn insɛns.

⁹ Da de de, dɛn pawaful siti dɛn go tan lɛk di Ivayt ɛn di Amɔrayt dɛn ples dɛn we nɔbɔdi nɔ tap, we dɛn rɔnawe lɛf fɔseka di Izrɛlayt dɛn, ɛn di ples go ɛmti ɛn lonsɔm.

¹⁰ Bikɔs una dɔn fɔgɛt di Gɔd we sev una, ɛn una nɔ de mɛmba di Big Ston we protɛkt una; so, i lɛk we una plant fayn fayn plant dɛn ɛn put put af af tik dɛn fɔ sho wan fɔrin laylay gɔd,

¹¹ i lɛk una mek dɛn gro di de we yu plant dɛn ɛn una mek dɛn pul flawa di vɛri mɔnin we una plant dɛn; pan ɔl dat, una nɔ go stil ebul avɛst natin di de we trɔbul ɛn pen we nɔ de wɛl, go kam.

Dɛn Bit Di Enimi Neshɔn Dɛn

¹² E, di sawnd we plɛnti neshɔn dɛn kin mek we dɛn de wansay, kin tan lɛk di sawnd we di si kin mek we wata rɔf! E, di sawnd we plɛnti neshɔn dɛn kin mek we dɛn de wansay, kin tan lɛk di nɔys we dɛn big big si kin mek we wata rɔf!

¹³ Di neshɔn dɛn de mek nɔys lɛk we bɔku bɔku wata de rɔn, bɔt i go tɔk pan dɛn, ɛn dɛn go rɔnawe go fawe; dɛn go ches dɛn lɛk we briz de blo chaf chaf na dɛn mawnten ɛn lɛk dɔti we de tɔn rawnd wit spid ɛn grap we tinada de blo.

¹⁴ Ivin tɛm, na masibo! Bifo mɔnin kam, dɛn nɔ de igen! Na dɛn tin ya go mit di wan dɛn we de pwɛl wi, ɛn di wan dɛn we de tif wi.