Ayzaya 16 - Krio Fɔs Oli Baybul

Wɛn Tin Badɔf Fɔ Moab

¹ Dɛn dɔn sɛn ship pikin dɛn to di wan we de rul di land, kɔmɔt Sila, pas insay di ɛmti ples we pipul nɔ go ebul tap, go na Zayɔn in gyal pikin in mawnten.

² Lɛk bɔd dɛn we de flay flay, lɛk we bɔd pikin dɛn we nɔ ebul flay yet, de difrɛn difrɛn say, na so Moab in gyal pikin dɛn de usay di wata shala na Riva Anɔn.

³ “Gi advays, trit ɔlman di sem we; mek una shed tan lɛk nɛt di tɛm we san de ɔp sansan tɛm; ayd di wan dɛn we pipul nɔ want nia dɛn, nɔ pul pɔsin we de rɔnawe, na do;

⁴ lɛ di wan dɛn we dɛn nɔ want na Moab tap wit una; una kɔba dɛn lɛ di wan we de distrɔy nɔ distrɔy dɛn. We di wan dɛn we de du dɛn bad nɔ de igen, ɛn nyakanyaka biznɛs dɔn tap, ɛn di wan we de mas pipul na grɔn dɔn kɔmɔt na di land kpata kpata;

⁵ datɛnde, dɛn go mek wan tron wit traŋa lɛknɛs ɛn di wan we de jɔj ɛn de si se dɛn trit ɔlman di sem, ɛn nɔ de wɛstɛn fɔ waka tret wit PAPA GƆD go sidɔm na di tron insay Devid in tɛnt, de du wetin rayt.

⁶ Wi dɔn yɛri bɔt Moab in prayd, di i bin prawd; bɔt aw i de fil se in bɛtɛ pas ɔda pipul, di kak we i de kak ɛn di fityay we i fityay- ɔl di bost we i de bost na laylay.

⁷ So lɛ Moab kray, lɛ ɔlman kray fɔ Moab. Fil sɔri, fil am bad bad wan, fɔ da kek dɛn we gɛt kɔrant na Kir Hɛrɛs.

⁸ Bikɔs di fam dɛn na Ɛshbɔn lɛf de pwɛl, ɛn di greps dɛn na Sibma de wes; di rula dɛn na di neshɔn dɛn dɔn brok in branch dɛn kan dɔŋ, we bin prɛd te rich Jeza te go na di ɛmti ples we pipul nɔ go ebul tap; in branch dɛn prɛd ɛn pas go oba di si.

⁹ So a kray di kray we Jeza kin kray fɔ di greps tik na Sibma; A sok yu bad bad wan wit di wata we de kɔmɔt na mi yay, Yu Ɛshbɔn ɛn Ilielɛ; bikɔs na pan una frut ɛn una avɛst di wa dɔn fɔdɔm.

¹⁰ Ɛn dɛn dɔn pul jɔy ɛn gladi gladi kɔmɔt na di fam we de bia bɔku bɔku frut; ɛn dɛn nɔ de siŋ nɔn siŋ na di greps fam, nɔbɔdi nɔ go pul korɔs; di wan we de mas mas greps na di say fɔ mek wayn, nɔ de mas mas am igen; di drɔŋɔ gladi ala dɔn tap.

¹¹ So mi sol de kray lɛk gita fɔseka Moab, ɛn mi at de kray fɔ kir Ɛrɛs.

¹² Ɛn we Moab go sho insɛf, we i taya fɔ de usay dɛn kin pre na dɛn mawnten, wɛn i kam nain oli ples fɔ kam pre, i nɔ go si rod.

¹³ Na dɛn tin ya PAPA GƆD bin dɔn tɔk bɔt Moab.

¹⁴ Bɔt naw PAPA GƆD se, “Insay tri ia, lɛk we dɛn de kɔnt fɔ wokman, Moab in tin dɛn we i de tek blɔf ɛn in jɛntri, go tɔn to disgres, pan ɔl we na bɔku bɔku pipul we de de, di wan dɛn we go lɛf nɔ go plɛnti, ɛn dɛn go wik.”