Ayzaya 15 - Krio Fɔs Oli Baybul

PAPA GƆD Go Distrɔy Moab

¹ Wetin PAPA GƆD se go apin to Moab. Bikɔs dɛn go ɛmti A go insay wan nɛt bɛtɛ nɔ go de fɔ Moab igen; bikɔs dɛn go ɛmti Kir insay wan nɛt bɛtɛ nɔ go de fɔ Moab igen

² Daybɔn in gyal pikin dɔn go ɔp na di ay ples dɛn fɔ go kray; Moab de kray fɔ Nibo ɛn Mɛdiba. Ɔlman krep in ed, ɛn ɔlman shev in bia bia;

³ dɛn ɔl rap dɛnsɛf wit saklɔth na trit; pantap dɛn os, ɛn na dɛn say fɔ gɛda ɔlman de kray ɛn pul wata na yay.

⁴ Ɛshbɔn ɛn Ilɛelɛ bin ala, ɛn dɛn de yɛri dɛn vɔys sote rich Jeaz; so di Moab sojaman dɛn ala; in at trimbul.

⁵ Mi at de kray fɔ Moab; di wan dɛn we rɔnawe, runawe go Zoa, ɛn Ɛglat Shɛlishia. Bikɔ, na di rod fɔ klem go Luit, dɛn de kray we dɛn de go ɔp; na di rod fɔ go Orɔnaim dɛn de ala se, dɛn yon dɔn dɔn;

⁶ nɔbɔdi nɔ de go na Nimrim watasay; di gras dɔn wida, di wan we jɛs bɔs dɔn fɔdɔm, nɔn grin plant nɔ lɛf.

⁷ So ɔl di bɔku bɔku tin we dɛn bin dɔn gɛt ɛn wetin dɛn bin dɔn gɛda nain dɛn de kɛr go krɔs oba Wilo Watasay.

⁸ Bikɔs di kray dɔn go ɔl rawnd Moab; di kray dɔn rich Ɛglaim, di kray dɔn rich Bierilim.

⁹ Alwe riva Daybɔn ful wit blɔd; a go stil briŋ mɔ pan Daybɔn, layɔn fɔ di wan dɛn we rɔnawe kɔmɔt Moab, ɛn fɔ di wan dɛn we lɛf na di land.