Ayzaya 13 - Krio Fɔs Oli Baybul

PAPA GƆD Go Pɔnish Babilɔn

¹ Wetin PAPA GƆD se go apin to Babilɔn we Ayzaya, we na Amɔz in bɔypikin, bin si.

² Put sayn na wan ɛmti il, ala kɔl dɛn; wev yu an to dɛn fɔ kam insay di get we dɛn bigman dɛn de pas.

³ Misɛf dɔn kɔmand mi yon dɛn we klin na mi yay, a dɔn sɛn kɔl mi pawaful man dɛn fɔ du di tin we a go du we a vɛks, dɛn mi prawd man dɛn we a de gladi fɔ.

⁴ Lisin, kɔnfyushɔn de na di mawnten dɛn we tan lɛk bɔku bɔku pipul vɔys! Lisin, kata kata de na di kindɔm dɛn, lɛk we difrɛn kɔntri dɛn gɛda wan say! PAPA GƆD Ɔlmayti de gɛda sojaman dɛn fɔ go fɛt.

⁵ Dɛn kɔmɔt fawe kɔntri, usay di skay dɛn tap, PAPA GƆD ɛn di wɛpɔn dɛn fɔ in vɛksteshɔn, fɔ kam distrɔy di wanol wɔl.

⁶ Kray o! PAPA GƆD in de dɔn de rich, di de we go kam lɛk we di Ɔlmayti de distrɔy!

⁷ Fɔseka dat, ɔl dɛn an go fɛkɛ fɛkɛ, ɛn ɔlman go fred bad bad wan,

⁸ ɛn dɛn at go pwɛl. Dɛn go de fil ɔlkayn pen; dɛn go de fil pen lɛk we uman de sɔfa fɔ bɔn. Dɛn go lɛf mɔt de luk dɛn kɔmpin. Dɛn fes go rɛd lɛk we yu layt faya.

⁹ Biliv mi, PAPA GƆD in de, go kam, i go kruɛl, wit vɛksteshɔn, ɛn bad bad wamat fɔ mek di wɔl ɛmti ɛn fɔ distrɔy di sina dɛn kɔmɔt de.

¹⁰ Bikɔs di sta dɛn na ɛvin ɛn dɛn kɔmpin dɛn we kin de bay grup nɔ go sho layt; di san go dak we i kɔmɔt ɛn di mun nɔ go shayn.

¹¹ A go pɔnish di wɔl fɔ in bad bad tin we dɛn de du, ɛn di wikɛd pipul dɛn fɔ dɛn sin; Di wan dɛn we prawd, a go brok dɛn fɛda dɔŋ, ɛn go mek di wan dɛn we gɛt maynd, dɛn prayd kan dɔŋ.

¹² A go mek pipul at fɔ si pas piɔ gold, ɛn mɔtalman go at fɔ si pas gold we kɔmɔt Ofir.

¹³ Fɔseka dat a go mek di skay dɛn trimbul ɛn di wɔl go shek kɔmɔt nain ples we PAPA GƆD Ɔlmayti go vɛks di de we in at go wam bad bad wan.

¹⁴ Lɛk dia we dɛn de ɔntin, ɔ lɛk ship we nɔ gɛt udat fɔ gɛda dɛn, na so ɔlman go tɔn go bak to in yon pipul dɛn, ɛn ɔlman go rɔnawe go nain yon kɔntri.

¹⁵ Dɛn go chuk ɛnibɔdi we dɛn fɛn, wan say lɛ i bɔs di ɔda say, ɛn ɛnibɔdi we dɛn kech, dɛn go kil am wit sɔd.

¹⁶ Dɛn go smash dɛn bebi dɛn mek dɛn skata bifo dɛn fes; dɛn go tif ɔltin na dɛn os dɛn ɛn rabish dɛn wɛf dɛm.

¹⁷ A de tɛl una, a go mek dɛn Mɛdis, we nɔ tek silva mek natin ɛn nɔ tek gold mek natin, dɛn at wam pan dɛn.

¹⁸ Dɛn bo dɛn go kil di yɔŋnam dɛm; dɛn nɔ go ivin sɔri sɛf fɔ di bebi we de nain mama bɛlɛ; dɛn nɔ go sɔri fɔ pikin sɛf.

¹⁹ Babilɔn, we na di kindɔm dɛn glori, Di fayn fayn kɔntri we di Babilonian dɛn de mek mɔt fɔ, go tan lɛk Sɔdɔm ɛn Gɔmɔra we PAPA GƆD dɔn dɛm kpatakpata.

²⁰ Nɔbɔdi nɔ go tap de igen ɛn nɔbɔdi nɔ go lib de te di wɔl dɔn; nɔn Arab nɔ go mek in tɛnt de, ɛn nɔn shɛpad nɔ go mek in ship dɛn lidɔm de.

²¹ Bɔt na dɛn wayl bist dɛn go lidɔm de, ɛn na dɛn animal dɛn we de kray sɔri wan lɛk dɔg, go ful na di os dɛn; na de ostrich dɛn go tap ɛn na de dɛn dɛbul we na af man, af bist, go dans.

²² Na aina dɛn go kray nain tawa dɛn, ɛn dɛn Jakal dɛn go kray nain fayn fayn kiŋ os dɛn; in tɛm dɔn rich nia ɛn dɛn nɔ go shub di tɛm go biɛn igen