Ayzaya 11 - Krio Fɔs Oli Baybul

Di Pisful Kindɔm

¹ Smɔl plant go bɔs kɔmɔt na Jɛsi in af tik we lɛf na grɔn, ɛn branch go gro kɔmɔt nain rut.

² Ɛn PAPA GƆD in Spirit go sidɔm pan am, di spirit fɔ sɛns ɛn fɔ ɔndastand, di spirit fɔ gi advays ɛn fɔ pawa, di spirit fɔ sabi tin ɛn fɔ fred PAPA GƆD.

³ Ɛn di tin we i go lɛk pas ɔl, na fɔ fred PAPA GƆD. I nɔ go jɔj bay wetin in yay de si, ɔ disayd bay wetin in yes de yɛri;

⁴ Bɔt na bay wetin rayt na PAPA GƆD in yay, i go jɔj di po man, ɛn go disayd di sem we fɔ kwayɛt pipul na wɔl, ɛn i go pɔnish di wɔl wit traŋa wɔd dɛn we i de tɔk, ɛn na di briz we de kɔmɔt nain mɔt i go tek kil wikɛd pipul.

⁵ Na wetin rayt na PAPA GƆD in yay, i go tek tay in wes, ɛn na fɔ waka tret wit PAPA GƆD i go tek tay in trɔsis.

⁶ Wulf ɛn ship pikin to tap wan say, ɛn lɛpɛt go lidɔm wan say wit got pikin, ɛn kaw pikin ɛn layɔn, ɛn animal we dɛn kin fid fɔ mek i fat, go de togɛda, ɛn na lili pikin go de mɛn dɛm.

⁷ Di kaw ɛn di bia go it togɛda; dɛn pikin dɛn go lidɔm togɛda; ɛn layɔn go it dray gras lɛk man kaw.

⁸ Pikin we de sɔk bɔbi go ple oba dɛn bad bad snek dɛn ol, ɛn di pikin we dɛn dɔn pul na bɔbi go put an na di snek in ol.

⁹ Natin nɔ go ambɔg ɔ pwɛl ɛnisay na mi oli mawnten; bikɔs di wɔl go no bɔt PAPA GƆD bɛtɛ bɛtɛ wan, lɛk we si ful.

Di Pipul Dɛn We De Ɛgzayl Go Kam Bak

¹⁰ Da de de, Jɛsi in rut go bi sayn to di neshɔn dɛn; naim di neshɔn dɛn go luk fɔ, ɛn ɔlman go kɔle pan di say dɛn we i go tap.

¹¹ Da de de, PAPA GƆD go ɛp sɛkɛn tɛm fɔ briŋ di balans pan in pipul dɛn we bin lɛf, kɔmɔt Asiria, Ijipt, Patrɔs, Itiopia, Ilam, Babilonia, Emat ɛn di land dɛn we de na di kost.

¹² I go gi di neshɔn dɛm sayn, ɛn i go gɛda di Izrɛlayt dɛn we bin de na ɔda neshɔn dɛn, ɛn gɛda Juda in pipul dɛn we skata, kɔmɔt ɔlsay na di wɔl.

¹³ Di jɛlɔs we Ifrem de jɛlɔs go dɔn, ɛn dɛn wan we de tɔmɛnt Juda go day; Ifrem nɔ go jɛlɔs Juda, ɛn Juda nɔ go tɔmɛnt Ifrem.

¹⁴ Dɛn go atak di Filistin dɛn we tap na di wɛst, lɛk we bɔd de flay kan dɔŋ wit spid, ɛn dɛn go jɔyn an fɔ tif ɔl wetin di pipul dɛn na di ist gɛt. Dɛn go fɛt Idɔm ɛn Moab ɛn di Amonayt dɛn go obe dɛn.

¹⁵ PAPA GƆD go mek usay di wata de rɔn kɔmɔt go insay Ijipt pwɛl kpatakpata; ɛn I go pas in an oba di Riva wit in ɔt ɔt briz, ɛn tɔn am to sɛvin rod so dat pipul dɛn go wɛr dɛn sus waka krɔs.

¹⁶ Wan men rod go de we kɔmɔt Asiria fɔ di balans we lɛf pan in pipul dɛn, lɛk aw i bin bi fɔ Izrɛl wɛn dɛn bin kɔmɔt Ijipt.