Ayzaya 10 - Krio Fɔs Oli Baybul

¹ Swɛ go fɔdɔm pan una we de pas dɛn wikɛd lɔ fɔ sɔprɛs pipul, ɛn dɛn wan we dɛn wok na fɔ rayt wetin fɔ tek sɔprɛs pipul,

² fɔ mek di wan dɛn nɔ gɛt, nɔ gɛt jɔstis, ɛn fɔ tif di wan dɛn we po pan mi pipul dɛn, dɛn rayt, so dat dɛn go du ɛnitin we dɛn wan du to uman dɛn we dɛn man dɛn dɔn day, ɛn tek advantej pan di pikin dɛn we dɛn papa dɛn dɔn day.

³ Wetin una go du di de we a go pɔnish una, we dombolo go kɔmɔt fawe kam? Udat una go rɔn go to fɔ ɛp una ɛn usay una go lɛf una jɛntri?

⁴ Natin nɔ lɛf, pas fɔ butu wit dɛn prizina ɔ day wit di wan dɛn we dɛn go kil. Na fɔseka ɔl dɛn tin ya mek in at nɔ stil kol, ɛn i stil de pɔnish una.

Di Kiŋ Na Asiria Na PAPA GƆD In Tul

⁵ E Asiria we na mi wamat in ratlan, di tik fɔ mi bad bad vɛksteshɔn.

⁶ A de sɛn am to wan neshɔn we nɔ no Gɔd, ɛn a kɔmand am fɔ go fɛt di pipul dɛn we vɛks a pan, fɔ tek dɛn tiŋs dɛn ɛn tif dɛn bay pawa, fɔ mas dɛn lɛk pɔtɔ pɔtɔ na trit.

⁷ Bɔt nɔto so in mek ɔp, ɛn nɔto so i de tink; bɔt i de nain maynd fɔ pwɛl, ɛn fɔ distrɔy neshɔn dɛn ɛn nɔto tu tri nɔmɔ;

⁸ bikɔs i se: “Ɔl mi kɔmanda dɛn nɔto kiŋ?

⁹ Kalno nɔ tan lɛk Kakɛmish? Emat nɔ tan lɛk Apad? Sameria nɔ tan lɛk Damaskɔs?

¹⁰ Lɛk we mi an dɔn rich pan dɛn kindɔm dɛn we de wɔship dɛn laylay gɔd, we dɛn laylay gɔd dɛn bin plɛnti pas di wan dɛn we de Jerusɛlɛm ɛn Sameria,

¹¹ so a nɔ fɔ du Jerusɛlɛm ɛn in laylay gɔd dɛn di sem tin we a du Sameria ɛn in laylay gɔd dɛn?”

¹² We PAPA GƆD go dɔn dɔn ɔl in wok pan Mawnt Zayɔn ɛn pan Jerusɛlɛm, I go pɔnish di kiŋ na Asiria fɔ di blɔf tɔk dɛn we i de tɔk, ɛn fɔ di fulish prayd we i de mek.

¹³ Bikɔs i se, “na wit mi yon an a du am, ɛn na mi sɛns a yuz, bikɔs mi na man we klɛva: A dɔn pul pipul dɛn bawndri dɛn, ɛn a dɔn klia ɔl dɛn jɛntri; a dɔn pul ɔl dɛn wan we sidɔm na dɛn tron dɛn lɛk man kaw.

¹⁴ Lɛk aw dɛn de fɛn bɔd os, na so a dɔn fɛn di pipul dɛn jɛntri; ɛn lɛk aw pipul dɛn de gɛda eg we dɛn dɔn lɛf, na so a dɔn gɛda di wanol wɔl; ɛn nɔbɔdi nɔ kres shek, ɔ tɔk ɛnitin ɔ grɔmbul.”

¹⁵ Di aks fɔ fil se in bɛtɛ pas di wan we de yuz am, ɔ di sɔ fɔ mek insɛf big pas di wan we de wok wit am? Lɛk se na di ratlan fɔ gɛt pawa pas di wan we ol am ɔ lɛk se na di waka tik fɔ es di wan we nɔto bod!

¹⁶ So, PAPA GƆD we na PAPA GƆD Ɔlmayti, go sɛn siknɛs we de kil, pan in tɔf tɔf sojaman dɛn, pan ɔl dɛn glori, i go bigin bɔn dɛn, lɛk aw faya kin bɔn.

¹⁷ Izrɛl in layt go tɔn to faya ɛn in Oli Wan go tɔn faya; ɛn i go bɔn ɛn pwɛl chuk chuk ɛn wayl bush waŋren de.

¹⁸ PAPA GƆD go pwɛl ɔl di fayn tin dɛn na di bush ɛn di land we de bia gud gud wan, kpatakpata, lɛk we sik man in bɔdi kin dɔn.

¹⁹ Wetin go lɛf pan di tik dɛn nain bush go so smɔl dat lili pikin go kɔnt am.

Tu Tri Go Kam Bak

²⁰ Da tɛm de, di pipul dɛn we lɛf pan Jekɔb in os nɔ go ɛva abop pan di wan dɛn we bin de pɔnish dɛn igen, bɔt dɛn go abop pan PAPA GƆD we na Izrɛl in Oli Wan, wit ɔl dɛn at.

²¹ Di wan dɛn we lɛf go kam bak; di wan dɛn we lɛf pan Jekɔb in pikin dɛn, go kam bak to di mayti Gɔd.

²² Ɔl we una pipul dɛn we na Izrɛl, plɛnti lɛk sansan na si, na di wan dɛn we go lɛf pan dɛn go kam bak. I dɔn bi lɔ se dɛn fɔ nyakanyaka dɛm ɛn pasmak ɛvidɛns de se na so i fɔ bi.

²³ Bikɔs PAPA GƆD we na PAPA GƆD Ɔlmayti go si dat ɔltin bi insay dis wɔl lɛk aw i bin dɔn se.

PAPA GƆD Go Pɔnish Asiria

²⁴ So na dis PAPA GƆD we na PAPA GƆD Ɔlmayti se: “E mi pipul dɛm we tap na Zayɔn, una nɔ fred di Asirian dɛn wɛn dɛn bit una wit dɛn ratlan ɛn wɛn dɛn pɔnish una lɛk aw di Ijipshian dɛn bin du.

²⁵ Bikɔs, i nɔ go te igen, di vɛks we a vɛks fɔ tin we a si we nɔ rayt go dɔn, ɛn mi wamat go tɔn fɔ nyakanyaka dɛn.

²⁶ Ɛn PAPA GƆD Ɔlmayti go yuz in pawa fɔ dɛn wit koboko, lɛk aw i bin pɔnish Midian na di big ston na Ɔrɛb; in ratlan go de oba di si, ɛn i go es am lɛk aw i bin du na Ijipt.

²⁷ Na da de de in lod go kɔmɔt na una ed ɛn dɛn go pwɛl di tin dɛn we ɛŋ na una nɛk.” I dɔn kɔmɔt Rimɔn,

Di Inveda Dɛn Atak Dɛn

²⁸ I dɔn kam Ay; I dɔn pas insay Migrɔn, na Mikmash i kip in lod;

²⁹ dɛn dɔn krɔs di lili rod, na Giba dɛn slip da nɛt de; Rama de trimbul, Gibɛa we na Sɔl in siti dɔn rɔnawe.

³⁰ Kray lawd lawd wan! Yu Galim in gyal pikin! Lisin yu Leisha! Ansa am, yu Anatɔt.

³¹ Madmɛna dɔn rɔnawe, di pipul dɛn we tap na Gibim dɔn rɔn go ayd.

³² Na tide tide i go blo na Nɔb, i go flo blo shek shek am na Zayɔn in gyal pikin in mawnten, na di il na Jerusɛlɛm.

³³ A de tɛl una, PAPA GƆD we na PAPA GƆD Ɔlmayti go kɔt di tik in big branch dɛn wit pawa we ɔlman go fred bad bad wan; i go kɔt di wan dɛn we ay pas ɔl, kam dɔŋ ɛn di ay ay wan dɛn go kam dɔŋ na grɔn.

³⁴ I go kɔt dɛn bush we tay tay pan dɛnsɛf wit aks, ɛn Libanɔn we gɛt dɛn wit in ay ay tik dɛn, go fɔdɔm.