Ayzaya 1 - Krio Fɔs Oli Baybul

¹ Ayzaya we na Emɔz in bɔypikin, in vishɔn dɛn we i si bɔt Juda ɛn Jerusɛlɛm, di tɛm dɛn we Uzaya, Jotam, Eaz ɛn Ɛzikaya bin bi kiŋ na Juda.

PAPA GƆD Tɔk Pan in Pipul Dɛn

² Di Ɛvin dɛn, una yɛri o! Ɛn lɛ di ath sɛf opin in yes! Bikɔs na PAPA GƆD dɔn tɔk: “A dɔn men ɛn tren una mi bɔypikin dɛm, bɔt dɛn tɔn pan mi.

³ Man kaw no udat i blant, ɛn dɔŋki no di say we in masta put in it, bɔt Izrɛl nɔ no, mi pipul dɛn nɔ ɔndastand.”

⁴ E, neshɔn we gɛt sin, pipul we de du so so bad, pikin we bad pipul bɔn, bɔypikin dɛn we kɔrɔpt! Dɛn dɔn kɔmɔt biɛn PAPA GƆD, dɛn nɔ rɛspɛkt di Oli Wan na Izrɛl dɛn dɔn kɔmɔt biɛn am kpatakpata.

⁵ Wetindu una stil wan lɛ dɛn pɔnish una, we una fasin fɔ traŋayes? Di wanol ed sik ɛn di wanol at wik.

⁶ Frɔm bɔtɔm di fut te rich di ed, nɔn say nɔ de we bɛtɛ, pas so so brus brus ɛn sofut ɛn wund dɛn we de blid; dɛn nɔ kwis di tɔf kɔmɔt ɛn dɛn nɔ tay dɛn, ɔ ivin put mɛrɛsin de.

⁷ Una kɔntri lɛf ɛmti wan, faya dɔn bɔn di siti dɛm; bifo una yon yay, fɔrina dɛn pwɛl una land; i ɛmti lɛk aw di fɔrina dɛn bin lɛf am.

⁸ Dat mek Zayɔn in gyal pikin dɔn lɛf lɛk bafa na greps fam, i yuslɛs lɛk os na kɔkumba fam, lɛk siti we ɛnimi dɔn sɔrawnd.

⁹ If PAPA GƆD Ɔlmayti, nɔ bin lɛf tu-tri pan wi we nɔ day, wi bin fɔ dɔn tan lɛk Sɔdɔm, ɛn bi lɛk Gɔmɔra.

¹⁰ Una yɛri wetin PAPA GƆD se una we de rul Sɔdɔm! Opin yes to wetin wi Gɔd de tich, una di pipul dɛn na Gɔmɔra.

¹¹ PAPA GƆD se, “Wetin ɔl dɛn bɔku bɔku sakrifays we una de mek min to mi? A dɔn gɛt tumɔs man ship ɔfrin we dɛn de bɔn na faya ɛn fat we kɔmɔt pan animal dɛn we dɛn fid gud gud wan; Man kaw blɔd o, ship pikin blɔd o, ɔ ivin man got blɔd, nɔ de mek a gladi.

¹² “We una kam fɔ wɔship mi, udat se una fɔ de pas pas dis kayn pas pas na mi kɔtyad?

¹³ Una nɔ briŋ mɔ fɔnatin ɔfrin kam igen; Insɛns na tin we a et bad bad wan. Nyu mun o, de fɔ blo ɛn rɛst o, ɛn we una kin gɛda fɔ wɔship mi- A nɔ go ebul bia sin insay ɔl dɛn fɛstival dɛn de igen.

¹⁴ Mi sol et una nyu mun ɛn una fɛstival dɛn we una pik; dɛn dɔn tɔn ebi lod pan mi, A nɔ go ebul bia dɛm igen

¹⁵ We una tret una an dɛn to mi, A go kɔba mi yay lɛ a nɔ si, i lɛk we una pre bɔku bɔku prea A nɔ go lisin; na so so blɔd de na una an.

¹⁶ Una was una sɛf; una mek una sɛf klin na mi yay; una pul di bad bad dɛn pan wetin una de du kɔmɔt bifo mi; una tap fɔ du bad

¹⁷ una lan fɔ du gud; trit ɔlman di sem, nɔ gri lɛ dɛn trit pipul dɛn du bad; tinap fɔ di wan dɛn we dɛn papa dɔn day, tɔk fɔ uman we in man dɔn day.

¹⁸ PAPA Gɔd se, “Kam naw naw lɛ we ɛŋed togɛda, i lɛk una sin dɛn rɛd lɛk blɔd, dɛn go wayt lɛk shatin; i lɛk dɛn rɛd lɛk krimsin, dɛn go tan lɛk kɔtinwul.

¹⁹ If una gri fɔ du wetin a se ɛn obe mi, una go ɛnjɔy ɔl di gud tin dɛn na di land.

²⁰ Bɔt if una nɔ gri ɛn tɔn una bak pan mi, na wa una go day; bikɔs na PAPA GƆD sɛf sɛf tɔk so.”

Di Siti We Fulɔp Wit Sin

²¹ Da siti we bin de rɛspɛkt mi dɔn tɔn rare gyal, in we bin sabi trit ɔlman di sem! Nainsay am, fɔ waka tret na PAPA GƆD in yay, bin tap, bɔt naw, na mɔdra dɛn tap de.

²² Una silva nɔ gɛt valyu igen, una wayn dɔn miks wit wata.

²³ Una bigman dɛn ɔl na rebɛl ɛn de waka wit tifman dɛm. Ɔlman lɛk fɔ tek brayb dɛn de rɔnata prɛzɛnt. Dɛn nɔ fɛt fɔ di wan dɛn we dɛn papa dɔn day, ɛn nɔ bisin bɔt dɛn uman dɛn we dɛn man dɔn day, dɛn kes.

²⁴ Fɔseka dat PAPA GƆD se, PAPA GƆD Ɔlmayti, di wan we de ay pas ɔlman na Izrɛl: “E! A go lus mi tɛmpa pan mi ɛnimi dɛn ɛn a go pe mi ɛnimi dɛn bak.

²⁵ A go dil wit una A go mɛlt dɔti kɔmɔt pan una lɛk we dɛn mɛlt ayɛn ɛn pul ɔl wetin mek una nɔ piɔ igen.

²⁶ Ɛn a go put una jɔj dɛn bak lɛk fɔstɛm, ɛn una advays dɛn, jɛs lɛk aw una bin bigin. Afta dat, dɛn go kɔl una di siti we de waka tret na PAPA GƆD in yay, siti we de kip Gɔd wɔd.”

²⁷ Na rɛspɛkt fɔ yu kɔmpin mɔtalman go pul Zayɔn pan wahala ɛn na fɔ waka tret wit PAPA GƆD go pul di wan we de insay zayɔn, we ripɛnt.

²⁸ Bɔt dɛn go nyakanyaka di rebɛl ɛn di sina dɛn togɛda, ɛn i go kil dɛn wan we tɔn dɛn bak pan Gɔd.

²⁹ Una go shem bikɔs una bin de gladi fɔ go na dɛn kɔtintri de; dɛn gadin we una bin pik go mek una ayd una fes.

³⁰ Bikɔs una go tan lɛkɛ kɔtintri we in lif dɛn dɔn wida ɛn lɛkɛ gadin we nɔ gɛt wata.

³¹ Ɛn di wan we gɛt trɛnk go tɔn wud chips, we in wok na fɔ mek spak, ɛn dɛn ɔltu go bɔn togɛda ɛn nɔbɔdi nɔ go ebul ɔt dɛm.